-Lalli-

búið

2008-06-03T19:43:00.001Z

Ég er búinn að ákveða að flytja mig um set og fara yfir til Eyrúnar og Bumbulínu á www.eunnarsdottir.net/blog - þar krúttumst við saman öll þrjú.

Endilega kíkið á okkur þar.

Lalli

Bumbus

2008-05-07T10:13:00.002Z

Það er vitleysa að segja að það sé sárt að sakna, það er e.t.v. vont gott, en það er samt gott. Ég var núna á myspace-ferðalagi, eitthvað sem ég geri sára sjaldan, en það var ljúft og ég saknaði þess að geta ekki vitleysast með strumpum af fróni. Ef ég hefði ekki saknað þeirra hefði ég aldrei kíkt á síðurnar og brosað yfir því hvað þeir eru töff og miklir nördar.
Svo er líka gott að eiga hjá mér hérna úti besta vin, unnustu og tilvonandi barnsmóður í sömu manneskjunni. Jámm, fyrir þá sem ekki voru búnir að frétta af því þá eigum við Eyrún von á bumbusi í heiminn, eða núna er viðkomandi Bumbus, en verður svo sjálfstæður, lítill og sætur einstaklingur í byrjun október. Sem sagt spennandi tímar framundan.
-
Síðustu mánuði hef ég verið við og við skrifað greinar á politik.is, ekkert nema gott um það að segja - enda á maður að taka þátt í umræðunni ef maður hefur áhuga á henni.
En ég er oft í erfiðleikum með að setja greinarnar í rétt form, þær verða stundum hálf þurrar og leiðinlegar. En það kemur allt með æfingunni - áður en þið vitið af verð ég meistari!

Lalli

íslenska + þýska = ?

2008-04-17T13:18:00.002Z

Ég er ekki frá því að málfari mínu, stíl og stafsetningu hafi hrakað á þessum vetrum hér í Vínarborg. Scheiße! En sem betur fer hefur mér farið fram í þýsku á þessum tíma, annað væri nú líka lélegt.

Ég veit að það má ekki alltaf leggja saman tvo hluti og fá óhjákvæmilega út þann þriðja, en á sama tíma og íslenskunni hefur hrakað og eftir því sem ég hef verið lendur hérna úti, þá fækkar að sama skapi þeim sem heimsækja síðuna mína. En það þýðir ekki að gráta það, enda fullorðnast ég sem aldrei fyrr þessa dagana orðinn íbúðareigandi og margt merkilegra á leiðinni.

kv.
Lalli

Af sauðburði og vertíðarlokum

2008-04-14T11:21:00.004Z

Maður les það og heyrir frá Íslandi að frónverjar séu orðnir pirraðir á stjórnmálamönnunum sínum. Þetta er né ekkert eins dæmi, ég horfði á þátt í gær á ríkissjónvarpinu hérna í Austurríki þar sem fjallað var um leiðtogakrísu Evrópu, það vantar alvöru leiðtoga í stjórnmálin í álfunni. Ég held að þetta sé komið til vegna þess að það kerfi sem við búum við, var ekki hannað fyrir okkar tíma, þ.e. 21. öldina þar sem fólk er vel menntað og getur sjálft fundið upplýsingar um allt milli himins og jarðar. Við vitum flest öll töluvert margt um flesta hluti og lítum þess vegna síður á ákveðna einstaklinga sem "alvitra snillinga" sem eiga að redda hlutunum - okkur vantar frekar fyrirliða sem heldur hópnum saman og s.s. einn af okkur sem stýrir leiknum.

Á Íslandi var fólk pirrað yfir því að þingmenn réðu sér aðstoðarmenn, en í rauninni finnst mér furðulegt að aðstoðarmenn hafi ekki verið komnir fyrr til þeirra eða fleiri aðstoðarmenn verið til staðar fyrir þingflokkana. Þeir myndu og munu gera þingstarfið skilvirkara, þ.e.a.s ef þeir vinna störf sín vel. Að auki ætti svo að fækka þingmönnum e.t.v. niður í 43 og gera landið að einu kjördæmi, svo innan fárra ára verðum við komin með 5 menn á þingið í Brussel.
Núverandi kerfi var hvorki hannað fyrir Ísland þar sem sauðburðu og vertíð skipta ekki höfuðmáli og heldur ekki fyrir Ísland þar sem tekur aðeins 45 mín að ferðast landshorna á milli. Það að hafa 63 þingmenn í Reykjavík í nokkra mánuði og svo í fríi þess á milli "til að sinna kjördæmunum" á einfaldlega ekki við í dag.
Það væri einnig hægt að gera fleiri tilbreytingar til dæmis að ráðherrar hafi ekki fast sæti á þingi eins og sumstaðar er gert.

Þegar þessar breytingar fara í gegn ætti einnig að auka vald sveitarfélaganna og færa meira af þjónustu yfir til þeirra, þar af leiðandi þyrfti ríkið að gefa þeim eftir skatttekjur. Það myndi auðvelda almenning mikið að koma sínum sjónarmiðum á framfæri, auk þess sem fólk myndi vera áhugasamara um stjórnmál, þar sem það hefði meira að segja.

Er nokkurt vit í öðru en að breyta til í þessu 19. aldar kerfi sem að við búum við? Stjórnmálkerfi sem og stofnanir sem í því vinna eiga að vera í endalausri endurskoðun sem reynir að bæta þær, því eins og önnur sköpunarverk eru þau ekki fullkomin.

Lalli

það er vor, sólin skín á himnum

2008-04-11T16:21:00.004Z

Þáttakendum á Ólympíuleikunum í sumar verður bannað að vera hafa á sér fána Tíbets hvort sem er á keppnissvæðinu eða í Ólympíuþorpinu og þar með talið í sínum herberjum.
Stundum er sagt að Ólympíuleikar og raunar íþróttir yfir höfuð, séu yfir pólitík hafin. Það þýði ekkert að draga Ólympíuhugsjónina niður á það lága plan sem stjórnmál manna eru, því sú dyggð að hlaupa í hringi, synda og stökkva sé ofar argaþrasi hversdagsins. Ekkert í heiminum stendur samt sem áður eitt og sér, óháð umhverfi sínu - allt er háð einhverju öðru og Ólympíuleikarnir eru ekki undanskildir. Þegar íþróttahátíð er haldin í ákveðnu landi, sama hvaða landi, undir leiðsögn leiðtoga þess lands, þá er ekki hægt að aðskilja hátíðina og þá sem að henni standa. Ef þeir kjósa að banna ákveðna uppröðun lita áprentað á efni vegna þeirra hugmynda sem þeir litir tákna - eru Ólympíuleikarnir pólitískir.
Auðvitað er svekkjandi fyrir íþróttamenn að þurfa að hlusta á okkur hin ræða um það hvort þeir eigi eða eigi ekki að taka þátt í leikunum. En þeir standa heldur ekki fyrir utan okkur hin og utan mannlegrar samkenndar vegna þess að þeir eru íþróttamenn. Auðvitað er svekkjandi að stefna að ákveðnu markmiði, ná því og svo gætu pólitíkusar ákveðið að maður fái ekki að komast að leiðarenda.
En þeir mega heldur ekki gleyma því að þeir eru fyrirmyndir, ef að þeir sætta sig við mannréttindabrot afhverju ættu ekki aðrir að gera það líka.

Lalli

eitt

2008-04-06T22:46:00.002Z

Stundum er kvartað yfir kolefnisjöfnun, enn ofar er rifist um hvort eigi að gera eitthvað, s.s. spara raforku, bensín eða nota meira almenningssamgöngur, vegna yfirvofandi hlýnurnar jarðar. En svo er þessu öllu bölvað af snjéníum sem sjá það í hendi sér að þú getir bara ekki kolefnisjafnað þig sí svona og hlýnun jarðar sé bara gabb sett fram af pólitíkus í Bandaríkjunum og fégráðugum vísindamönnum.
Ok, gott og vel segjum sem svo að kolefnisjöfnum virki ekki og þetta "klimawandel" sé bara gabb. Þá mælir samt ekkert á móti því að planta trjám og vernda regnskóg - þó svo að fólki finnist kolefnisjöfnun heimskuleg. Það að spara orku, ganga frekar en aka bíl eða nota hjól og almenningssamgöngur, er að sama skapi frábært - burt séð frá því hvort heimurinn farist eftir 100.000 milljón ár eða 100 milljón ár. Ef hlutirnir fara svo eins og þessir fégráðugu vísindamenn halda fram, þ.e. að þeir hafi ekki verið að gabba, þá hjálpar allt við að draga úr vandanum.
Sama hvort vandamálið er til staðar eða ekki til staðar, þá sakar ekkert að hugsa um umhverfið - það skemmir ekki neitt.
Svo er það ekkert nema frábært að fyrirtæki séu tilbúin að planta trjám í skiptum fyrir viðskipti, t.d. Krombacher sem verndar 1 fm af regnskógi fyrir hvern seldan kassa af bjór. Maður getur ekki annað en grætt, verndað umhverfið með því að drekka bjór? Ekkert nema snilld.

Lalli

mislukkaður fyrirlestur og HHG

2008-04-04T12:07:00.004Z

Ég átti að halda fyrirlestur í gær, var búinn að undirbúa mig undir að minn hluti af fyrirlestrinum væri 10 mínútur um gagnrýni á Réttlætiskenningar Rawls, kenningar Marx um réttlæti og sitthvað fleira. Ég fékk ekki nema 3 mínútur - kennarinn notaði nefnilega 45 mínútur af tímanum til skipulagshluta sem hann hefði getað og átt að gera í tímanum fyrir páska. Ég stóð til að byrja með eins og asni og reyndi að vera eins snöggur að koma hlutunum frá mér og ég gat. - En ok, þetta er kanski líka reynsla í að bregðast við aðstæðum og geta ekki gert hlutina eins og maður vildi í upphafi.
En engu að síður fúlt. Því þetta var ágætur fyrirlestur hjá mér.
-
Annarrs langaði mig að segja tvennt um Hannes Hólmstein og hans mál. Í fyrsta lagi, er það ekki þversögn að safna með samskotum upp í skuld hægrimanns, sem hann komst í af eigin rammleik? Hinir hæfustu lifa af og allt það... Þeir virðast jafnvel nýta sér verk annarra til að reyna að lifa af.
Hannes Hólmstein hefur ekki beint verið sá sem að vílar fyrir sér að þjarma að mönnum í pólitískri umræðu, oft í persónlegum stíl en ekki fræðilegum og á maðurinn engu að síður að heita fræðimaður í stjórnmálafræði.

Stundum endar það þannig ef að maður kemur fram eins og besserwisser og ber ekki snefil af virðingu fyrir skoðunum annarrs þá á endanum kemur það niður á manni. Hannes Hólmsteinn hefur farið mikinn í langan tíma, núna missteig hann sig tvisvar og þarf að gjalda fyrir það, með peningum.
Mér þætti reynar áhugavert að sjá hvernig yrði tekið á svona máli hérna í Vín, ég þarf að skila inn sérstakri "Ritstuldar yfirlýsingu" (plagiats erklärung) með hverju verkefni - ef að kennari yrði svo dæmdur fyrir ritstuld. Svolítið dæmigert fyrir Ísland að sumir benda á að það væru "pólitísk hreynsun" að reka Hannes frá Háskólanum fyrir þetta. Þetta snýst samt ekki um hægri eða vinstri, enda er það bara gott að hafa allt litróf stjórnmálanna við Stjórnmálafærðideildir - þó Hannes mætti reyndar efast aðeins meira um ágæti þess sem hann las í Oxford fyrir aldarfjóðungi og efast og endurskoða eins og fræðimönnum ber að gera. Þetta snýst að mínu mati um prinsip - sá sem er staðinn að ritstuldi á ekki að vinna sem háskólakennari.
--
En ég nenni ekki að eyða meiri tíma í þetta, ég þarf að skreppa í ræktina.

Lalli

Silly walks..

2008-04-02T10:48:00.000Z

Bara svona smá grín. Það má ekki hafa endalausar áhyggjur, enda hef ég þær ekki þó svo að bloggið mitt verði stundum (les. alltaf) fyrir barðinu á áhyggjum/athugasemdum mínum um heiminn og málefni tengd þeim fyrirbærum.
-
Það er margt að brjótast um í heilanum mínum, ótrúlegt en satt. Vonandi kem ég því yfir á skjáinn bráðlega. Þessar hugmyndir eru margar hverjar snjallar - eða virka a.m.k. þannig í hausnum á mér, sjá um hvað gerist ef ég kem þeim út úr hausnum og í skiljanlegra form.

Lalli

ÓL 2008

2008-03-24T23:11:00.005Z

Síðan hvenær hafa Ólympíuleikar ekki verið pólitískir? Íþróttir þar sem að stuðningsaðilar eru ríkustu fyrirtæki í heimi snúast ekki um að allir fái að vera með eða aðrar ungmenna félagshugsjónir. Á síðustu önn var ég í tíma sem hér "Macht Bewegung" Macht=vald og Bewegung=hreyfing s.s. bæði það að hreyfa sig og fjöldahreyfing. Áhugaverður kúrs sem að gaman væri að skoða bara út frá Ólypmíuleikum. (Á þessari önn er ég svo í öðrum sem að fjallar um fótbolta (risaveldissport valdsins). Þegar að stór íþróttahreyfing, með mikil völd, ákveður að veita stórundarlegu risaveldið þá ábyrgð að halda svona mót, með þeirri athygli sem því fylgir, þá verður hreyfingin bara að taka því. En ástandið í Kína lítur út fyrir að vera alvarlegra en hinn venjulegi fréttafíkill gerði sér grein fyrir og fleiri héruð en Tíbet eru á suðupunkti. Og á meðan að óháðir fjölmiðlar mega ekki segja okkur fréttir af því sem fram fer, þá er ekki nema von að við efumst um það sem fram fer.

Lalli

Sérhagsmunir-hverhagsmunir

2008-03-24T11:01:00.003Z

Í páskafríinu er ég ekki búinn að lesa mikið, verð því greinilega að taka mig á í þessari viku. Við Eyrún erum aðallega búin að krúttast hérna tvö í Vínarborg, fórum út að borða og í bíó á laugardaginn, sáum Dan in Real Life og okkur þótti hún afbragð. Í gær elduðum við svo ungverska ali-gæs, með fyllingu, brúnuðum kartöflum og alles, okkur þótti hún einnig vera afbragð. Enda erum við afbragðskokkar.
-
Það sem ég er búinn að vera að lesa, þetta litla smá, eru upplýsingar um Ísland og Evrópusambandið. Þetta eru "Mótum eigin framtíð" sem að SI (Samtök iðnaðarins) gaf út á Iðnþinginu og svo "Hvað með Evruna?". Í bæklingnum frá SI eru öll helst málin tekin fyrir, eitt af öðru og rætt við annað hvort sérfræðinga eða ráðamenn ESB og stundum er rætt við hvoru tveggja. Það skín eiginlega í gegn í hverju einasta máli að hagsmunir heildarinnar liggja á ESB en stundum er sérhagsmunum betur borgið utan þess. En oftast eru til fordæmi sem hægt væri að fylgja til að koma til móts við sérhagsmunina. Ísland liggur t.d. allt norðar en 62 breiddargráða, svo að landbúnaður hér telst heimskautalandbúnaður og á því rétt á meiri styrkjum en annar landbúnaður. Þetta kæmi sér vel fyrir sauðfjárbændur, mjólkurframleiðendur og fleiri í dæmigerðum landbúnaði en ekki fyrir kjúkklingrækt og svínabú. Varðandi fiskveiðar þá hafa þær þjóðir sem að reiða sig mikið á fiskveiðar eins og Malta fengið undanþágur. Reyndar tel ég líklegra að íslenskir útgerðarmenn muni sækja á mið evrópumanna frekar en þeir komi hingað. Það er nefnilega þannig að ef einhver fær að veiða hjá okkur, þá fáum við líka að veiða hjá þeim. En svo eru það auðvitað ekki hagsmunir heildarinnar (ESB) að taka undirstöðu atvinnuveg úr löndum sambandsins. Það er ekki í hag ESB að fá óánægt Ísland inn í sinn hóp og það er eiginlega líklegra að Íslendingar hafi mikið um fiskveiðistjórnun ESB að segja en að einhverjir sem enga reynslu hafa af fiskveiðum stjórni okkar hafsvæði. Íslenskir útvegsmenn hafa ekkert að hræðast, ef þeir halda rétt á spilunum verður allt þeim í hag.
Svo myndi dæmigerð fjögura manna fjölskylda spara 1,7 milljónir í vaxtagreiðslur ef að við værum í ESB, verða á nauðsynjavörum lækka og markaðir opnast fyrir Íslendinga.
Það er svolítið fyndindið að vera líka á móti því að ræða við ESB, allt í lagi að finnast eitthvað vera að Sambandinu eða eftir á að vera á móti samninginum - en að vera á móti því að tala við ESB? Það bara skil ég ekki. En ég held áfram að lesa mér til um þetta í dag.

Svo er svo helvíti fínt að búa í ESB.
Lalli

Guðbergur, ópera, Hitler og kertaljós

2008-03-14T14:49:00.003Z

Á miðvikudaginn síðasta var afmæli Vínarborgarháskóla, ekki var mikið gert úr því annað en að senda engan í skólann. Frekar undarlegt svona eftir á að hyggja, væri ekki betra að heiðra háskólann með mega-session af lærdómi í stað þess að loka, loka og læsa og allt það. En það var fleira markvert á seiði þann 12. mars. Guðbergur Bergsson var í Vínarborg við kynningu á Flatey-Frey sem að var að koma út í þýskri þýðingu. Frábært framtak, því önnur síðan er á íslensku og hin á þýsku svo hún passar mjög vel fyrir þá sem glíma við bæði málin. Jón Bjarni Atlason íslensku kennari við UniWien sá um að kynna Guðberg fyrir þeim sem mættir voru á Shakespeare & Company, sem er skemmtileg bókabúð og mjög sjarmerandi. Mér þótti margt vera skemmtilegt í því sem að lesið var upp, sem dæmi má nefna þetta hér:
En Freyr
þegar orðið verður eingilt eins og í íslenskri list
og gengi þessi endanlega skráð
eins og hjá óhagganlegum skáldum
sem skrifa bækur líkar velreyttum hænum
þá ætti vesælt orðið að liggja á vöxtum í lands-
bankanum
og vera í útláni handa leigupennum fyrir jól.

Eftir upplesturinn voru samt margir í vafa um hvort þeir hefðu skilið eitthvað af því sem að Guðbergur las, það sem helst stóð uppúr var án vafa Orða-Borða óperan sem Guðbergur söng hluta úr. Skemmtileg gagnrýni á ofneyslu orða og mikilvægi þess að melta það sem maður les, því annarrs gubbar maður.
-
12. mars 1938 er dagsetning sem að gleymist seint í Austurríki, þá marseruðu Þjóðverjar inn í landið - án nokkurar mótstöðu þeirra austurrísku. Þjóðin er enn í dag að glíma við söguna og hættir því sjálfsagt aldrei. Sumir vilja meina að Austurríkismenn geti með sanni kallað sig fórnarlömb, aðri vilja ekki heyra á það minnst, enda voru ofsóknir gegn gyðingum löngu byrjaðar og barátta vinstir og hægrimanna staðið yfir í mörg ár, með tilheyrandi blóðsúthellingum.
Til að minnast þessa dags og þeirra 80.000 Vínarborgara sem að myrtir voru af nasistum, var skipulögð athöfn á Heldenplatz þar sem kveikt var á yfir 80.000 kertum. Eftir upplestur Guðbergs löbbuðum við þangað og litum yfir kertahafið. Ég las svo síðar í Der Standard að aðeins 5.000 manns hefðu mætt á minningarathöfnina. Til samanburðar tóku yfir 250.000 manns á móti Hitler 70 árum áður.
Hvað segir það okkur?

Lalli

vændi, mansal, strípiklúbbar og kynlíf

2008-03-13T09:56:00.003Z

Ég er einn af þeim sem að finnst frelsi fólks mikilvægt, hverjum finnst það ekki? Líkast til fáum. En þegar að við lendum í þeim aðstæðum að þurfa að vega og meta frelsi tveggja einstaklinga, þá verður málið oft flóknara. Dæmi sem að oft kemur upp er vændi - þar skarast frelsi karlmanna til að fá að ríða hvenær sem og frelsi stúlkna og kvenna að fá að lifa eðlilegu lífi og sá réttur að vera ekki fórnarlömb. Nú hlaupa eflaust margir upp til handa og fóta, hvað er Lalli að bulla núna. Telur hann sig svo merkilegan mann að hann geti ákveðið hvað sé eðlilegt líf? Og hvað þá heldur, þekkir Lalli sögu allra vændiskvenna heimsins og stimplar þær þar með fórnarlömb. Eins og ég sagði að ofan þá er þetta ekki svona einfalt. En ég met einfaldlega ofar rétt þessara kvenna en karlanna sem ekki fá á broddinn reglulega - vandamál þeirra er líkast til ekki fjöldi kvenna, sem eiga víst að vera u.þ.b. jafnmargar karlmönnum. Lausn á þeirra vandamáli er ekki búa til fórnarlamb úr annarri manneskju.
Vandamálið eru karlarnir, að líta á það sem sjáflsagðan hlut að 10 karlmenn sofi hjá einni og sömu konunni sama daginn - og halda því fram að hún sé bara nokkuð sátt með lífið, er einhver sú ömurlegasta tilraun til sjálfsblekkingar sem ég veit um. Fimmtíu karlmenn með bjór í krús sitja við langborð þar sem ung stúlka fer úr spjörunum og hristir brjóstin framan í þá í von um aur. Það að á 21.öldinni séum við ekki enn komin framar en þetta í samfélagslegri þróun er sorglegt. Enn og aftur liggur rót vandans hjá karlmönnunum. Svo má ekki gleyma því að margar af þessum konum eru beinlínis fluttar inn til þeirra landa sem þær vinna svo í, þær sem komast til ágætra staða eru heppnar. Aðrar sitja eftir fast t.d. á landamærum Þýskalands og Tékklands og búa þar við ömurlegar aðstæður. Svo er líka vinsælt hjá þeim sem verja mansal og áníðslu að benda á að það séu nú margir aðrir sem séu hnepptir í þrældóm - það bætir ekki bölið að benda á eitthvað annað. Sú staðreynd aldrei hafi áður veirð jafnmargir þrælar til í heiminum er skelfileg staðreynd. Lélegustu rökin sem ég hef heyrt hjá þeim sem að tala fyrir vændi, eru þau að nauðgunum fækki ef vændi sé leyft. Hvurslagst djöfuls-dólgar eru karlmenn eiginlega ef að þeir geta ekki hamið sig og skánar það eitthvað ef að við leyfum þeim að ríða hórum í stað þess að nauðga. Vandamálið, það er hálfvita skapur karlmanna, er ennþá til staðar. Það er eitthvað að karlmönnum ef þeir telja þetta eðlilegt, svo einfalt er það.
Þess vegna finnst mér ömurlegt að heyra í fólk, oft á tíðum gáfuðu fólk, sem er vel að sér, nota tíman sinn í jafn ógeðslegan hlut og réttlæta fyrir heiminum þjáningar fórnarlamba.
Það óskar enginn faðir eða móðir sér þess að barnið þess verðir hóra, það óskar enginn systursinn þess að hún dilli rassinum framan í fulla kalla í von um ölmusu. Ekkert barn óskar móður sinni þess að hún sofi hjá tugum karlmanna í viku.

Þeir sem ekki sjá heildarmyndina og halda því fram að þetta sé spurning um kynlíf tveggja einstaklinga á jafnvægis grundvelli, eru á villigötum. Kynlíf þeirra sem báðir koma að borðinu/rúminu (eða hvar sem það nú fer fram) er falleg og yndislegt - þetta er ekki spurning um að borga. Þetta er spurning um virðingu fyrir öllum manneskjum.

Lalli

við eigum þennan heim

2008-03-07T11:06:00.006Z

Ég er ekki alltaf sammála Björk, stundum bullar hún bara. En það að segja Tíbet, Tíbet, Tíbet á tónleikum í Kína var einfaldlega frábært og hugrakt. Tónlistin hennar er að mínu mati frábær og nær yfir rosalega breytt svið, allt frá mestu rólegheitum og til rafpönks af bestu gerð.
Ég er búinn að vera að lesa mér svolítið meira til um Tíbet á netinu, eftir að hún sagði þetta fimm stafa orð. Saga Tíbet frá 1949 er ótrúlega sorgleg og í rauninni fáránlegt að þetta risaríki níðist á friðsælu munka-fjallahéraði. En það er líka eitt sem Björk kennir okkur, alltaf þegar við heyrum "Kína" - hugsum þá Tíbet, Torg hins himneska friðar og Falun Gong. Falun Gong eru eltir uppi, myrtir og líffærin úr þeim notuð. Þegar við heyrum "Rússland" - hugsum þá um Téténíu, ofbeldi gegn minnihlutahópum, ekkert lýðræði. Við erum nú þegar, eða öllu heldur, Bandaríkin eru nú þegar búin að skilyrða sig svona í hugum flestra. Það er ekki hægt að segja flottir skór ("made in China")eða hrósa Kínverjum fyrir frábæran hagvöxt og fussa svo yfir því að aldrei hafa fleiri þrælar verið til í heiminum.
Í dag á sama tíma og menntunarstig fólks útum allan heim hækkar og hækkar, þá hækkar hlutfall fólks sem eru þrælar líka!
En hvað um það, getum við nokkuð gert?
Jú auðvitað látið ekki eins og fokking hálfvitar, auðvitað getum við allt gert. T.d. bara að segja lítið fimm stafa orð "Tíbet". Eða þriggja stafa orð "NEI" og bæta við þetta gengur ekki lengur.
Betri heimur er mögulegur!
--
Viðauki: Teng Biao, kínverskur lögfræðingur sem að barist hefur fyrir mannréttindum í Kína t.d. Falun Gong og gagnrýnt framkvæmd og undirbúning Ólympíuleikanna í sumar, hefur horfið sporlaust. Áður hafði hann verið aðvaraður að láta af gagnrýni sinni og framkomu í fjölmiðlum.
-
Lalli

sólblómakjarnorka

2008-03-02T13:57:00.002Z

Þorrablót Félags Íslendinga í Austurríki var haldið í gær. Að venju var vel mætt og mikið rætt og ótrúlegt en satt líka snætt. Kjammar, pungar og fleira fínerí rann niður með kollum af bjór hjá mjög svo svöngum blótsgestum. Við Eyrún röltum heim á leið um 3 leitið eftir að hafa skemmt okkur vel í hópi góðs fólks.
-
Ég hef aldrei verið jafn tilbúinn að takast á við nýja önn og ég er núna. Eftir að hafa skoðað þau fög sem í boði eru á þessari önn var ég meira en lítið spenntur og ég fann fjölmarga áhugaverða kúrsa, núna á ég bara eftir að raða þeim niður í góða og stóra stundartöflu.
--
Ég er búinn að vera að lesa nokkrar góðar bækur í fríinu og í gær vann Eyrún "Rimla hugans" eftir Einar Má í þorrablótshappadrætti, svo þar kemur ein til viðbótar sem ég get gætt mér á.

vesist blesa
Lalli

the good life

2008-02-23T13:43:00.003Z

Verkefnin sem voru með "dead-line" 21. febrúar eru blessunarlega komin til skila, annars væri ég í vondum málum. Ein ritgerð er eftir, en hún verður létt verk og löðurmannlegt. Ég á aðeins eftir að koma henni í form og þessháttar, en hún fjallar um velferðarríkið, uppruna þess og þróun. Svolítið annað en ég hef oft verið að vinna með, en það er líka áhugavert og spennandi að gera nýja hluti.
-
Húsið á bak við mig á myndinni er Leopold Museum, þar er stærsta safn Egon Schiele mynda í heiminum og nokkuð magn af Gustav Klimt líka. Við Eyrún tókum eftir því að hann Gustav bjó ekki langt frá nýju íbúðinni okkar. Hann var mikill snillingur og reyndar Egon Schiele ekkert síðri, þessir gömlu Vínarborgarar... Ég reyndar las það í grein að ungir menn á þessum tíma hafi verið svo uppteknir af því að vera gamlir og reyndir og listamannalegir að þeir ekki bara gengu í skósíðum frakka með hatta heldur lang flestir gengu þeir við staf, án þess að þurfa þess. Þeir höltruðu eins og gamal menni því það var kúl. Hégóminn er víst ekki bara nútíma fyrirbæri.
--
En núna ætla ég að haltra á markaðinn og kaupa góðgæti.

pís át
Lalli

ljómandi hress...

2008-02-13T23:33:00.002Z

Ég hef aldrei heyrt neinn afneita "ellefta september" eins og Egill Helgason segir á bloggsíðunni sinni. Aftur á móti er ótrúlegt ef að fólk efast ekki um upplýsingarnar sem að "liggja" fyrir og hvernig málið hefur verið skoðað. Það er að mínu mati einfaldlega barnalegt að taka við tyggjóklessunni frá Kananum og jórtra glaður á henni. Það þýðir samt ekki að ég styðji hryðjuverkamenn eða hafi óskað eða óski enn 3000 N.Y. búum dauða. - Ef það er eitthvað sem við eigum að læra af fortíðinni og framkvæma í dag og í framtíðinni þá er það að efast, spyrja spurninga og leita svara. Ekki segja já og amen við öllu sem okkur er sagt og sérstaklega ekki ef það skiptir sköpum fyrir framgang heimsmálanna.
Það afneitar enginn 9/11 en það er skynsamlegt að velta því fyrir sér, leita upplýsinga, EFAST, vega og meta, e.t.v. kemst fólk svo að sömu niðurstöðu og Bush og Egill Helgason og kanski ekki.
-
Ég skrifaði grein á politik.is um daginn, þið getið lesið hana þar. Í þessari mjög svo stuttu grein vildi ég bara hvetja fólk til að tala um innflytjendamál, ekki fela þau og leyfa rasistum að sjá um umræðuna því það er að mínu mati stórhættulegt. Við verðum að tala um hlutina og þegar einhver segir að útlendingar séu fífl, þá verðum við að benda því fífli á að hann sé fíflið á málefnalegan og rökstuddan hátt.
Við vinnum ekki á nauðgunum með því að vorkenna fórnarlambinu og tala ekki um hlutinn. Við þurfum að hlúa að fórnarlambinu og taka á gerandanum - en fyrst og fremst þurfum við að koma í veg fyrir að fleiri gerendur verði til.

Lalli

febrúar fyrir vinnufrídaga

2008-02-03T11:54:00.000Z

Loksins! Febrúar er runninn upp, afhverju gleðst ég svo mjög yfir því? Át ég úldinn Schnitzel sem ruglaði þannig í líkamstarfsemi minni að ég sit hér í Bandgasse og fagna gríðarlega febrúar að tilefnislausu? Ekki er það nú svo gott, slæmt eða ágætt. Febrúar er einfaldlega fínn mánuður, því þá er ekki gert ráð fyrir því að maður mæti í tíma, ekki heldur að maður taki próf, en því frekar er gert ráð fyrir því að verkefni séu unnin og ritgerðir skrifaðar og ég er svo undarlegur að það finnst mér skemmilegt.
-
Fyrir utan verkefnavinnu þá má líka nota febrúar til annarra góðra verka, eins og að gera íbúðina okkar fínni, skoða nýfæddan pandabjörn í dýragarðinum í Vín, lesa góðar bækur (e.t.v. slæmar líka) og njóta þess að búa í fallegri borg. Miðað við allt það sem ég ætla að taka mér fyrir hendur veitir mér ekkert ef því að hafa páksana snemma í ár og fá örlítið marsfrí líka, svo ég geti hvílt mig eftir annasamt febrúar"frí".

Lalli

Ball ballanna

2008-01-31T16:25:00.000Z

Viðbót þar sem mér blöskraði áðan: Silfrið Rúv

Spilling eða ekki spilling, þetta er ógeðslegt - hvaða heilvita einkafyrirtæki ræður mann til sín með því að borga honum 300 milljónir (!). Svo er þetta trekk í trekk réttlætt með því að ef mönnunum séu ekki borguð hærri laun heima þá fari þeir bestu úr landi, hefur einhverjum þeirra svo mikið sem verið boðin staða við stóran erlendan banka? Var það ekki þannig að forstjórar íslensku smáfyrirtækjanna eru með hærri laun en forstjórar Skandinavískra stjórfyrirtækja eins og Ericsson. Þessir menn sem taka á móti þessum greiðslum hafa ekki vott af siðferðiskennd í sér og það fólk sem ver þetta hérna að ofan varla heldur. Ef þú ert með milljón á mánuði, þá ertu ríkur og getur leyft þér nánast allt, en 300 milljónir fyrir að byrja í vinnunni! Svo um leið og einhver dirfist að segja eitthvað á móti þá er það "öfund" - ég þekki ekki neinn sem öfundar þetta siðblinda og spillta fólk. Það eru greinilega einhverstaðar til peningar í þessu samfélagi þó að leikskólar séu ekki mannaðir, elliheimili undirmönnuð og að því er virðist er siðferðiskennsla við íslenska skóla í algjöru lágmarki.

En passið ykkur að mótmæla þessu nú ekki of kröftuglega, þið gætuð umbreyst í skríl.
--
Í dag gleðjast velstæðir Vínarborgarar, það er komið að sjálfu Óperuballinu. Þar keppast þeir sem aur eiga að sýna hversu flottir þeir eru og svolgra í sig Kampavíni milli þess sem þeir dansa Vínarvals við tónlist Óperu Sinfóníunar. Miðinn inn í húsið kostar 270 € í stæði, s.s. þá máttu vera niðri og dansa o.s.frv.. Þeir sem að eru í alvörunni flottir, fínir og frægir þeir leigja sér bás (loge) í Óperunni og geta þannig lokað sig af og notið þess að fá hvíld frá skítugum almúganum á götunni og verið með fólk sem er fínu fólk sæmandi. Það þarf að loka götum og 700 lögreglumenn verða á vakt í kringum Óperuhúsið til að koma í veg fyrir að skríllinn komist ekki nálægt ballinu. Reyndar hefur oft komið til þess að alvöru skríll, s.s. ekki í morgunblaðs/sjálfstæðisflokks túlkun á því orði, heldur grjót- og molotovkokteilakastandi rugludallar mæti á svæðið til að "berja fína fólkið í augun". Þeir sem að bara vilja púa á eyðsluna og oflætið hætta sér ekki í svoleiðis skrílslæti.
-
Þessi veisla skilar Staatsoper líklega meiri tekjum en allt annað sem að hún setur upp, enda ekki nema örfáir skemmtikraftar sem þarf að borga og þeim mun meira af Kampavíni sem selst. En þeir sem að geta eytt í þetta mættu líka gefa svolítið með sér og því væri snjallt fyrir Óperuna að gefa fólki möguleika á því að borga í góðgerðarsjóð eða eitthvað slíkt á sama tíma og miðinn er keyptur. Reyndar veitir Óperunni heldur ekkert af aurunum því þar koma fram á hverjum einasta degi tugir listamanna á heimsmælikvarða. Það er einmitt það fallegast og skemmtilegasta við ballið, að sjá balletinn, sem að þessu sinni var Fussballet í tilefni af EM í fótbolta og svo söng sjálfur Carreras, svolítið gamall orðinn en flottur engu að síður. Svo tekur við snobb, snobb og aftur snobb. Íslenskir auðkylfingar og bankaræningjar væru flottir þar að láta rigna kampavíni upp í nefið á sér.
--
Þeir sem að lesa bloggið mitt en eru ekki búnir að lesa Rottumanns bakþanka Óla Sindra, ef einhverjir eru, þá eru þau hér með hvött til þess.

Lalli

eigoobiguM

2008-01-29T20:45:00.000Z

Fyrsta próf búið og fyrirlestur sama dag, hvort tveggja gekk vel - ég bullaði um Open Source og Póstfordisma í Arbeit am Ich og náði að skrifa góða ritgerð í Gesellschaftstheorien, kennarinn virtist líka ánægður með bókina sem ég valdi að skrifa ritdóm um "The Protestant Ethic and the Spirit of Capitalism" vonandi verður hann bara jafn ánægður með útkomuna.
-
Stundum þegar ég les blogg þá verð ég að kommenta á þau, hálfleiðinlegur kvilli en ég held að þetta sé frekar af því að mig langi að segja hæ yfir hafið frekar en að ég sé uppáþrengjandi mófó. Ég setti til dæmis tilgangslaust komment inn á síðuna hans Óla Sindra áðan. En hvað um það.
--
Ég er búinn að sniðganga mbl.is síðan eftir að borgarstjórnin féll ekki af fúlleika og svekkelsi heldur vegna þess að það er fáránlegt að sætta sig við svona umfjöllun. Der Standard sem að ég les hefur u.þ.b. 300.000 lesendur og er mjög svo kraftmikill og málefnalegur fjölmiðill. Ég bíst nú ekki við því að nokkur taki uppá því að starta nýju blaði núna, það væri eins og að framleiða Túbusjónvörp í massavís. Það væri samt mjög gott að fá kraftmikinn vefmiðil, sem kafar dýpra í málin en Eyjan - þó hún sé afbragð.
---

En í bili segi ég bless kex.
lalli

Framhald frá í gær...

2008-01-25T13:24:00.000Z

Í mogganum í dag stendur eitthvað á þessa leið:
"Þeir sem missa völdin geta verið ósáttir við þessa breytingu en þeir eiga engan annan kost en að kyngja breytingunni og leitast svo við að snúa henni við í næstu borgarstjórnarkosningum, sem fram fara eftir rúmlega tvö ár."

Bíddu nú við? Samkvæmt þessu hefðu Sjálfstæðismenn átt að "kyngja breytingunni og leitast svo við að að snúa henni..." Já, eins og ég sagði í gær þá er öll vitleysan eins.
-
En það er a.m.k eitt jákvætt við allt þetta rugl, í svona aðstæðum sjáum við íhaldið í sínu rétta ljósi - í ritstjórnargreinunum, í viðtölum og á heimasíðum sjálfstæðismanna koma þeir undan bleiku sauðagærunni og sína drulluskítugar krumlurnar. Ætli það séu ekki bara spennandi tímar framundan í íslenskri pólitík?
--
En það sem ég reyndi að koma frá mér í gær með Volksbegehren, en begehren þýðir að sækjast eftir, köllum það bara "Þjóðarsókn" þar sem þjóðin sækist eftir því að fá umfjöllunum um mál. Og það er eins og ég hélt, 100.000 manns þurfa að skrifa undir áskorunina, en eftir að tillagan er lögð með a.m.k. 8.000 staðfestum og trúverðugum undirskriftum sem er ca. 1 % íbúa Austurríkis, hefur sá hópur 10 taga til að fá 100.000 og þá fjallar Nationalrat/Þingið um málið. Frá 1964 til 2004 náðu 29 tillögur inn á þingið - í rúmlega helmingi tilfellanna voru það samt ekki borgararnir sjálfir heldur stjórnarandstöðuflokkarnir sem að lögðu tillögurnar fram og því voru þær felldar. Einnig þurfa tillögunar að vera settar fram tilbúinn texti sem stenst lög, sem að minnkar möguleikann á því að einhver vitleysa komsti inn. En möguleikinn er a.m.k. fyrir hendi, annað en heima.
---

lalli

Öll vitleysan er eins...

2008-01-24T15:59:00.000Z

Borgarstjórnarbrölltið í Reykjavín City er með undarlegri sýningum á pólitískuleiksviði Íslands í langan tíma - allt í senn harmleikur, gamanleikur og svo dramatísk sjúkarhússaga (sem má ekki tala um. Það eina sem vantar í þetta er spenna og þó það er jú spennandi að fylgjast með bullinu í mbl.is og þeim sem greinilega eru hægri sinnaðir bloggarar þar. Skrílslæti og afbökun á lýðræðinu heitir það að hrópa og kalla í ca. klukkutíma og labba svo sjálfur út!
-
Svo ég sleppi nú klisjum og týpísku tuði á íslenskan bloggmáta.
--
Nú hef ég ekki tíma til að leita að upplýsingum um rétt íslenskra borgara til að leggja fram tillögur á þingi. Í Austurríki geta borgararnir sjálfir með undirskriftarlista 100.000 manna af rúmlega 8. milljónum, en þá getur s.s. fólkið í landinu lagt fram tillögu um lög eða reglur sem þingið síðan fjallar um. Þetta væri e.t.v. eitthvað sem nytsamlegt væri á Íslandi núna.

lalli

íslandistar

2008-01-16T10:07:00.001Z

Ótrúlegt hvað maður eins og Egill Helgason, sem telur sig mjög gáfaðan og leikur sitt hlutverk eftir því getur verið þröngsýnn. Umræðan á síðunni hans um Íslam og hryðjuverk er undarleg í meira lagi, umræður hans og kolbeins í athugasemdakerfinu eru fróðlegar - í það minnsta til að átta sig á þeim takmörkunum og hömlum sem trufla þennan "áhrifamesta fréttaskýranda" landsins.
-
Annarrs er það helst að frétta frá Austurríki að Frjáslindir (FPÖ, die Soziale Nationalpartei (sic!)) í Graz reyndu að veiða atkvæði með því að benda á þá staðreynd, að þeirra mati, að Muhammed hafi verið m.a. barnaníðingur. Fyrir vikið er búið að hóta konunni sem þetta sagði, Susanne Winter, lífláti. Frekar mikil dramatík hjá bókstafstrúuðum Múslimum eins og svo oft áður, aðrir í Austurríki s.s. forsetinn og fleiri fordæma þetta harðlega og alvörublöð eins og Standard taka FPÖ fíflin í gegn í greinum. En "die Globale Islamische Medienfront" hótuðu einfaldlega að drepa hana. Ef að einn flokkur myndi taka íslenska innflytjendur fyrir og leggja okkur í einelti þá myndi ég sletta á þau skyri - er það ekki svipað á þeirra mælikvarða - við slettum skyri - þau drepa fífl (eða fólk sem þau telja vera fífl-fólk sem hefur samskipti við fífl osfrv)? Nei kanski er þetta ekkert líkt. En mér finnst samt gaman að sjá að íslendingar vilja greinilega vera með í alheimsumræðunni og ræða um hryðjuverkamenn eins og aðrir, þó þeir séu kanski ekkert á leiðinni á klakann.
--
Okkar vandamál á Íslandi eru oftar en ekki lúxus-vandamál, auðvitað mætti fjölmargt betur fara en þó er flest í lagi - eða kanski vinnum við bara svo mikið að við sjáum ekki vandamálin. En hvað um það maður myndi halda að þetta gæfi okkur forskot t.d. í umræðum um vandamál og málefni sem eru okkur fjarlæg eins og Íslam - við gætum tekið á þeim Theoriskt en ekki í upphrópana stíl a la Jörg Haider, sem að sá sér leik á borði og bætti við umræðuna í Austuríki í ræðu nýlega: "grüss gott" sagði hann, sem þýðir heilsaðu guði og fólk segir þetta í staðinn fyrir Góðan dag, má maður ekki ennþá segja Grüss gott? bætti hann við, þarf nokkuð að segja "Allah ist groS".
Við þurfum nefnilega að passa okkur að viðhalda umræðunni og þeir sem að hafa eitthvað til málanna að leggja verða að tala - það er stórhættulegt að láta fólk eins og Winter og Haider að ógleymdum H.C. Strake sjá um umræðuna.
---
Lesendur La Rusl hafa að sjálfsögðu mörgu við þessa umræðu, sem og aðrar, að bæta svo þið látið í ykkur heyra - annað er einfaldlega hættulegt.

Auf wiedersehen,
Lárus

hljóðheimur=ljósheima+hurð

2008-01-09T17:26:00.000Z

Mikið er gott að vera kominn heim, þ.e. í íbúðina okkar í Vín - en það er líka alltaf svolítið skrítið að yfirgefa hinn staðinn sem við köllum heim. Ísland er yndislega skrítið og þær taugar sem maður ber til þess eru jafn skrítnar og það sjálft er skrítið. Við vitum öll hvernig það er - kalt, dimmt og blautt bróðurpart ársins og yfir sumarmánuðina vex þar gras og nýlega innfluttar haustplöntur frá meginlöndunum beggja vegna við okkur. Fólkið er líka (ég þar á meðal) undarlegt svo ekki sé meira sagt, en kanski er það einmitt það sem gerir landið gott. Á Íslandi er t.d. hægt að segjast hafa farið niður í bæ að skoða mannlífið og gera það í orðsins fyllst merkingu. Einfaldlega sitja á kaffihúsi og horfa á annað fólk. Frænka mín sem bjó lengi í Stokkhólmi þótti alltaf undarlegt að koma heim og labba niður Laugarveginn eða vera á öðrum fjölförnum stöðum því þar horfðu allir á hana og henni fannst eins og hún ætti að þekkja þetta fólk og heilsa því, á meginlandinu glápir maður ekki á fólk sem maður þekkir ekki. Nema ég, þegar ég er í Neðanjarðarlest, Strætó eða Sporvagni þá eru allir svo uppteknir við að horfa á nákvæmlega ekki neitt, að Íslendingurinn ég get leyft mér að glápa, en auðvitað bara pínu. Reyndar virðist það vera samþykkt af samfélaginu að dást að hundum og börnum í almenningssamgöngukerfi Vínarborgar, enda eru bæði hundar með múl og börn með snuð vita meinlaus.
-
Mætingin í íslensku tímana mína sló með í dag þegar að svo mikið sem núll nemendur mættu. Jón Bjarni Atlason íslenskukennar í Vín sagði mér þá að nemendur væru lengur í gang en við kennararnir.
--

vesist blesa,
lalli

áramótaheit

2007-12-31T07:32:00.000Z

Þetta ár var gott, mér leið vel og ég stóð mig vel - vei ég! Næsta ár verður betra, enda liggur leiðin bara upp á við, líka blogglega séð. Gamaldagsblogg koma til baka á nýju ári netdagbækur þar sem viðkomandi segir vinum sínum frá því hvað á daga sína hefur drifið og skrifar um sín áhugamál. Íslendingar hætta vonandi að gera sig að fíflum á mbl.is.
-
Ég ætla ekki að láta þetta vera lengra í bili en áramótaheitið mitt í ár er eins og öll önnur ár að verða betri maður og sýna þar með sjáflum mér og öðrum að ég hafi lært eitthvað af síðasta ári. Þar á meðal ætla ég að blogga meira, enda finnst mér gott og gaman að láta vini og vandamenn heima heyra frá okkur í Vín með svoleiðis pistlum.

En í bili segi ég bara, farsælt komandi ár og takk fyrir allt gamallt og gott!
Lalli

hohoho hahaha hihihi

2007-12-21T22:30:00.000Z

Skemmtilegar þessar fjótfærnisvillur sem ég geri stundum, það þarf auðvitað gáfumenni eins og Emma til að átta sig á villunum mínum - hann er þrautþjálfaður í því að þefa uppi flóknar rökvillur. Ég ætlaði að sjálfsögðu segja þegar ég verð EKKI heima, þá get ég sem sagt gefið blöðin mín og einhverjir sem engan Standard fá geta lesið hann í tætlur.
-
Jólin eru að koma. Skatan er að koma. Jólagrautur og stess sem ég skil ekki. Hver nennir að vera stressaður - hlustaði það fólk ekki á Hemma Gunn? Hann sagði þetta "Verið hress - ekkert stress - bless" einfaldara getur það ekki verið.
--
Það voru 3 hæfari til að skrifa þetta blogg.
---
Lalli

heim á leið

2007-12-13T12:15:00.000Z

Það er ekki mikið eftir af þessari viðburðaríku önn, við förum heim á morgun - sem þýðir að það er nóg að gera í dag.
-
Vínarborg á aðventu er alveg einstök, það eru jólamarkaðir á hverju torgi og tilheyrandi skraut og gleði. Svo skemmir sætur ilmur af Glühwein ekki fyrir. Mér finnst eiginlega ótrúlegt að ferða- og kaupóðir íslendingar skuli ekki streyma til Vínar um þetta leyti - en líklegast á höfuðborg Habsburgaranna ekkert í Mall of Amerika og svoleiðis undur.
--
Ég sendi Der Standard tölvupóst um daginn og sagði að ég vildi ekki fá dagblaðið til mín þá daga sem ég verð heima. Þá buðu þeir mér skemmtilegan díl, að ég gefi blaðið mitt til heimila sem að fá ekkert blað en vildu það gjarnan, eins og athvarfs fyrir heimilislausra eða "Konukot". Að sjálfsögðu tók ég þessu boði enda er sælla að gefa en þiggja.

nokixel-tluacuoF

2007-12-10T22:36:00.000Z

Það hefur verið nóg að gera - það er samt ekki afsökun fyrir hryllilega-arfaslöku og yfirhöfuð og allt lélegs ástands á þessu bloggi. Ég tók það í gegn og skrifaði svo ekkert meir. Ekki gott.
En það sem gott er, er að í stað þess að blogga hef ég lært, flutt inn í nýju íbúðina, kennt íslensku og verið almennt hress og kurteis við vini og ókunnuga. Við Eyrún erum væntanleg til Íslands 14.des og ef veður leyfir förum við beinustu leið til Akureyrar þann dag. ´
Gáttaþefur kom á jólaball Íslendingafélagsins, ég misst því miður af honum, en fólk sagði mér að hann hefði verið í nokkru stuði, en samt frekar vitlaus greyið.

Ég ætla að vera duglegri við að blogga núna svo ef þú ert að lesa þetta, kíktu þá oftar við.
bless kex,
Lalli

nú vinnuvikan er liðin í ársins skaut...

2007-11-09T15:23:00.000Z

Ég hef undanfarna mánudaga náð mér í í tónhlöðuna mína þætti frá Rás1 sem heita Krossgötur, Hjálmar Sveinsson er stjórnandi þessar þáttar og er að gera mjög góða hluti - hann talar ekki bara við þessa sem venjulega fá að tjá sig um málin, heldur leitar annað og lengra og finnur oftar en ekki fólk með mjög áhugaverðar skoðanir. Það sem undanfarið hefur verið fjallað um eru fólksfluttningar milli landa og það sem Hjálmar kallar Landnám II, sárafáir fluttu til landsins frá hinu eiginlega landnámi og í 8-900 ár. En þetta er að breytast segir hann. Mjög áhugaverðar umræður um innflytjenda "vandamálið" og eins og svo oft áður í þessum þætti eru umræðurnar á allt örðu plani en í öðrum miðlum.
-
Eitt af því sem minnst var á í þættinum 3.11.07 var þýska orðið "gastarbeiter", orð sem óþarft er að þýða, það var sem sagt litið á þá sem fluttust inn í landið sem vinnuafl en ekki fólk og þar liggur rót vandans - Þjóðverjar og þeir sem til þeirra fluttust, langflestir Tyrkir - bjuggust við því að vinnuaflið færi svo í burtu þegar þess væri ekki þörf. En það gleymdist að gera ráð fyrir því að þetta var ekki vinnuafl sem kom til landsins heldur fólk, manneskjur. Ef að frá upphafi hafi verið litið á fólkið sem fólk og komið fram við það sem slíkt en ekki "farandverkamenn" eða "gestavinnuafl" hefði verið hægt að koma í veg fyrir fjölmörg vandamál í Þýskalandi nútímans. Fyrst ég fór að tala um Þýskaland í dag, þá er það þannig að þann 9. nóvember 1989 voru þýsk-þýsku landamærin opnuð, múrinn féll eða öllu heldur var brotinn niður.
--
En núna ætla ég að hitta hana Eyrúnu mína á Westbahnhof - við ætlum út í kvöld og vera hress og góð eins og alltaf.
---
passið ykkur á bílunum,
Lalli

ok,ok - nú er ég til!

2007-11-03T16:18:00.000Z

Takk fyrir að hafa beðið eftir mér kæra blogg - sumir hefðu fyrir löngu látið sig hverfa en þú beiðst og beiðst enda tryggur og traustur vinur sem að nennir að geyma bullið sem stundum kemur frá mér.
-
Allt þetta venjulega er komið af stað (fyrir löngu meira að segja) skólinn, veturinn, Vínarborg o.s.frv. Nýtt í fréttum er að ég er leiðbeinandi í íslensku við Skandinavíudeild Háskólans í Vínarborg, það er ágætis tilbreyting.
En annarrs erum við skötuhjúin í Vín komin á fullt í íbúðarkaupum - við fyltjum í okkar eigin íbúð í Vínarborg um mánaðarmótin Nóv-Des. Þetta er mjög falleg gömul íbúð, nýuppgerð með nýjum gluggum og gestaherbergi fyrir ferðalanga. Við erum ennþá að plana allt það sem hægt verður að gera við þá íbúð, en það verður ótrúlega gaman að standa í því.
--
Þetta væri nú ekki Lalla blogg ef ég segði ekki frá pólitískumálum af einhverju tagi. Ég las frétt um Enzo Rossi, ítalskan iðnjöfur sem ákvað að prófa að lifa af lámarkslaunum í 1 mánunuð. Hann reiknaði sér og konu sinni samtals 2000 € í mánaðarlaun og þau ásamt börnunum sínum tveimur reyndu að lifa á því í mánuð - þau fóru einu sinni öll í bíó og á pizzeríu, annarrs fóru peningarnir í venjulega reikninga og mat úr kjörbúðum. Þessi tilraun endaði þannig að þegar 20 dagar voru liðnir áttu þau 20€ eftir og gátu því ekki klárað mánuðinn. Enzo (not the baker!)sá með þessari tilraun sinni að sér og hækkaði laun starfsfólks í sínum verksmiðjum um 200€. Ef ekkert yrði að gert myndu samfélög okkar færast aftur til 19. aldar þar sem á hans slóðum menn voru annað hvort aðalsmenn eða daglaunafólk. - Sjáið þið ekki íslenska bankastjóra eða aðra alvöru karla fyrir ykkur gera svona "samfélagslegatilraun".
Mæli líka með áhugaverðri grein á Kistunni um hvarf verkalýðshreyfingarinnar á Íslandi, greinin var skrifuð í kjölfar útkomu bókar sem fæst líkast til ekki í Thalia á Mariahilferstrasse.
---
ástar og saknaðar kveðjur frá heimaborg Habsborgaranna

Dachs - Gerlich - Gottweis - Kramer - Lauber - Müller - Tálos (Hrsg)

2007-06-14T15:28:00.000Z

14. júní, næstum öll verkefni búin, aðeins eftir að ditta að hinu og þessu í ritgerðum, það gæti tekið sinn tíma, en þar sem ég er búinn að skrifa þær þá ætti þetta að vera í lagi. Á morgun fer ég í próf, á laugardaginn í síðasta tímann í "Kyn í alþjóðasamskiptum", á mánudaginn er svo eitt verkefni (sem ég á eftir að gera) og lítið próf, svo er ekkert fyrr en 25.06 þá er stórt próf í "Austurrísk stjórnmál og Evrópusambandið", þann 27.06 er próf í tímanum "Grunþekking um ESB" og 28.06 í "Stjórnmála-umhverfis greiningu". - Rosalega var erfitt að þýða þessi nöfn yfir á íslensku, ég hef gott að því að komast heim og læra íslensku almennilega. 30. júní er svo loka skiladagur fyrir þrjár ritgerðir, en ég ælta að skila þeim í næstu viku frekar. Þann 4.júlí lendum við svo á Akureyrarflugvelli.. það verður næs, ógeðslega næs...
-
Ef ég verð duglegur, þá ætti ég ekki að blogga neitt fram til 29.júní. Sjáum til hvernig það gegnur, reyndar hef ég ekki sagt frá mörgu merkilegu undanfarið. Það þykir mér leiðinlegt, en ég hef bara verið með skriftregðu.
--
Ættu fleiri glæpamenn að heimta að fá sérstakt svæði úthlutað undir sína starfsemi eins og hraðakstursfíklar vilja?
"Fyrst þið viljið ekki hafa okkur á 170 á götunum, þá ætttuð þið bara að byggja fyrir okkur sérstakar brautir"
Hvernig væri að hætta frekar að keyra hratt, það er ekki lífsnauðsynlegt að aka eins og bjálfi.
---
pís
Lalli

sjö fingur vs. tíu puttar

2007-06-04T20:11:00.000Z

Í gær vorum við Eyrún svo ótrúlega heppin að Júlíus, íslenskur söngnemandi í Vín sem er héran í tveggja mánaða söngtíma- og tónleikaferð, bauð okkur á tónleika með Thomas Quasthoff þar sem hann söng Winterreise eftir Franz Schubert. Þvílíkur flutningur! Þvílíkur listamaður! Þvílíkur söngvari! Þetta var án vafa eitthvað það fallegast sem ég hef heyrt, hann söng í 70 mínútur tilfinninga þrungin ljóð og allir sem hlustuðu á hann gátu ekki annað en sýnt það í verki með því að trekk í trekk klappa hann upp, kanski allir nema konan sem sat einu sæti frá Eyrún sem hraut í næst síðasta ljóðinu. Svona kvöldstund á eftir að lifa lengi í minningum mínum. Að auki, þ.e. fyrir utan að hann gæti sungið hvar sem er vegna raddarinn og tækninnar, þá er Thomas Quasthoff líkamlega fatlaður. Þessa lýsingu fann ég á netinu: "1.34 meter groß, kurze Arme, sieben Finger - vier rechts, drei links - großer, relativ wohl geformter Kopf, braune Augen, ausgeprägte Lippen; Beruf: Sänger." Það er sérstak að sjá hann koma upp á sviðið, en þegar hann syngur tekur maður ekki eftir því hvernig hann lítur út, röddin og útgeislunin nær til allra í salnum. Jafnvel líka þeirra sem sofna undir lokin.
-
Á leiðinni heim mættum við svo frægari manni, með minni rödd en af mörgun talinn með meiri kynþokka. Á sunnudags kvöldgöngu á Kärtnerstasse var enginn annar en Justin Timberlake.

Ekki amalegt það.

bless í bili,
Lalli

af næs einræðisherrum og illa lyktandi mótmælendum

2007-05-29T19:54:00.000Z

Hugo Chavés fer á kostum sem einræðisherra herstjórnar þessa dagana, reyndar er ljótt að segja að hann fari á kostum, 10 manns voru myrtir þegar þeir mótmæltu lokun einkarekinar sjónvarpsstöðvar í Venisúela. Þrátt fyrir þessi átök og þessa kúgun "Sósíalistans" Húgó heyrist varla hósti né stuna frá vestrænum fjölmiðlum, í það minnsta á Íslandi. Fyrir örfáum dögum þótti mbl.is frekar en Vísi það fréttnæmt að lögrelgumaður á frívakt í Chicago lamdi 15 ára ungling. Svipað má segja af herskáum palestínum mönnum, stundum palestínskum hryðjuverkamönnum og ísraelska hernum. Ef palestínskir hermenn myrða einstakling í Ísrael kallast það morð, en Palestínumenn þeir falla oftast. Því þeir falla í stríð, en hinir eru myrtir af hryðjuverkamönnum. Pútín Rússlandsforseti stendur fyrir pólitískum ofsóknum, kúgunum og morðum gegn þeim sem ekki eru honum sammála. Fjölmiðlarnir segja frá því en stjórnmálamennirnir þora ekki að kvarta því þeir vilja ekki loka á olíuflæðið. Vinstrimenn gagnrýna aldrei Kúbu af gömlum vana, þeir eru örlítið líklegri til að kvarta yfir Kína.
Fjölmiðlungar taka ekki upp á neinu nýju, þýða einungis fréttir frá AP, Reuters o.s.frv. Hvernig ætli fréttaveiturnar fái sínar fréttir, þýða þær úr fréttum annarra landa? Internet fjölmiðlar og ókeypis miðlar ganga bráðum af aðhaldi "fjóðra valdsins" dauðu, sundurtættu og óendurlífganlegu. Össur Skarphéðinsson segir frá því hvernig spurningar hann hefur fengið frá því hann varð ráðherra, ekkert efnislegt, bara bölvað blaður. En það er hvorki hægt né skynsamlegt að pína fólk til að lesa, skrifa eða spyrja einhvers sérstaks, sbr. dæmið með Venesúelska skógardýrið Húgó.
-
Eruð þið búin að lesa ykkur til um G8 og mótmælin tengd þeim lokaða einræðisherra fundi? (Ég bið ykkur samt fyrir alla muni að muna að þegar ég gagnýrni G8 - ég styð aldrei ofbeldi eða skemmdarverk)
Þýsk yfirvöld vita í rauninni ekki hversu margir láta sjá sig í þessum mótmælum, ég væri ekki hissa ef yfir 100.000 gagnrýnendur alheimsvæðingarinnar mættu á svæðið. Auglýsingar um rútuferðir frá Wien og Salzburg til Heiligendamm hafa verið uppi í skólanum mínum í töluverðan tíma. Þessar ferðir eru á vegum Attac samtakanna. Ég vil ekki lengaja þess bloggfærslu með því að lýsa hvernig þau eru, en hvet ég ykkur til að kynna ykkur þau. Flestir þeir sem mótmæla í Heiligendamm eru ekki eins og þeir eru rangnefndir í fjölmiðlum, andstæðingar alheimsvæðingar, heldur gagnrýnendur vilja þeir sjá sanngjörn viðskipti en ekki bara frjáls viðskipti. - Enda er það heimskulegt að þeir einu sem hafa alþjóðlegar reglur um sín mál séu þeir sem þeir sem stunda viðskipti, en þeir sem vinna hafi mismunandi reglur tvist og bast!
Eitt sem svipaðir hópar og þeir sem mótmæla innan tíðar í Þýskalandi klikka samt oft á er að gangrýna ekki alla sem mikið er að hjá. Þegar Bush kom til Vínar í fyrra og ræddi við Evrópusambandsmenn, þá héldu sameinuðust svona hópar um að halda ráðstefnu sem bar yfirskriftina "Alternativas - eine andere welt ist möglich". Meðal gesta á þessari ráðstefnu var títtnefndur Chavés, hann arkaði þar um eins og Muhammed Ali á egótrippi og var fagnað eins og hetju. Ef svona mótmælahópar hefðu í andstöðu við Chavés viljað halda ráðstefnu í Venesúela, hefði lögreglunni líklega verið sigað á þá.
-
Það er enginn alslæmur, en allir eiga skilið gagnrýni og allir hafa rétt á því að gagnrýna.

pís
Lalli

!"#$%&/()=

2007-05-27T10:16:00.000Z

Í gær sveik sólin okkur Eyrúnu, bjarta fallega sólin faldi sig bak við ský þegar við fórum í fyrstu sundferðina okkar í ár. Í kring um hádegið þegar við fórum í innkaupaleiðangur skein hún á allt og alla sem vildu láta skína á sig, en klukkan 14.30 var hún horfin bak við ský. Við spurðum skýin hversu lengi þau ætluðu að vera og hvort líklegt væri að þau sendu regndropa niður til jarðarinnar. Skýn svöruðu engu, ekki frekar en fyrri daginn, fyrir utan eitt lítið ský sem söng mjóróma að það væri bara að horfa á leiki mannanna. Þrátt fyrir líkur á rigningu héldum við af stað í átt að baðstaðnum, við borguðum aðgangseyrinn og skiptum yfir í sundbúninga. Þykkir skýjabakkar skýldu þeim kroppum sem bursluðu í pollunum, við settumst á bekk og reyndum að lesa í úr skýjunum hversu lengi þau myndu loka fyrir aðgang sólarinnar að fölbleikum líkkömum íslenskra námsmanna. Eftir að hafa dvalið dágóða stund töldum við líklegast að skýin væru komin til að vera og ekki nokkurt vit væri í því að sitja fáklædd við kaldaburslupolla mikið lengur. Við gáfumst upp og fórum. Á leiðinni heim tók að birta til og þegar við fórum út úr Ofanjarðarhluta-neðanjarðarlestar nr. U-6 var nánast heiðskýrt og sólin, fallega og bjarta, skein aftur á þá sem vildu láta skína á sig.
-
Ég get ekki annað sagt en að mér líst ljómandi vel á þessa ríkisstjórn, fyrir utan að Björn Bjarnason er áfram ráðherra. Samfylkingin kemur með ferskan blæ inn í stjórnina, konur fá til jafns við karla að takast á við ráðherraembætti (ráðfrúar) og um leið og Samfylingin tekur við er lagst í að breyta til í ráðuneytum. Að mínu mati hefðu frekari breytingar verið til hins góða, en ég skal hafa biðlund um hríð, því allt tekur sinn tíma.
--
Það er nóg að gera hjá mér þessa dagana í skólanum 4 verkefni framundan og leið og þeim líkur, PRÓF og nóg af þeim.
---
Um síðastliðna helgi var fór ég í handboltabulluferð til Essen og horfði á Dóra stýra Tusem Essen upp í úrvaldsdeild í þýskaboltanum. Mikið rosalega var ég kátur og hás, enda hef ég aldrei öskrað svona mikið, né lengi. Allan síðari hálfleikinn stóðum við og klöppuðum og til skiptist fórum við á taugum eða öskrðum úr okkur lungun.
----
pís,
lalli

p.s. kein macht für G8! bölvaðir hræsnarar að hittast 8 (reyndar 9) saman og ræða framtíð heimsins.

nú híja einhverjir á mig..

2007-05-17T14:49:00.000Z

Miðað við fréttir í dag og síðust færslu skaut ég mig e.t.v í fótinn, Framsókn og Sjálfstæðisflokkur hættu við að mynda stjórn og Geir H. Haarde sagði að líklegast væri að þeir myndu ræða við Samfylkinguna varðandi nýja stjórn. Þá er fyrsta takmarki X-S náð, því að stjórnmál snúast númer 1,2 og 3 um það að koma sínum málum á framfæri. En núna er svo líka tækifæri fyrir grasrótin hjá x-s að láta í sér heyra og hlífa hvorki x-s né x-d frá gagnrýni ef eitthvað er í ólagi. Án þess að ég haldi að nokkuð verði að, Samfylkingin stendur sterk á sínu og þá er allt í lagi.
-
Annarrs ætla ég ekki að segja neitt meira fyrr en eftir helgi, þá verður Dóri kominn upp í úrvalsdeild í þýskaboltanum og Samfylkingin komin í stjórn.

lalli

ég viðurkenni..

2007-05-15T12:03:00.000Z

ég er hundfúll!
-
Ég var svo ánægður um miðnætti þegar fyrstu tölur komu. Við á kosningavöku Samfylkingarinnar í Vínarborg, misstum ekki vonina þegar stjórnin náði aftur "meirihluta". En þegar ég vaknaði um morguninn og úrslitin voru ljós, hvarf sólin bak við ský og ólykt gaus upp úr holræsum Vínarborgar!
En í alvörunni, þá liggur við að manni líði svona, því að allt stefnir í að þessi stjórn haldi áfram, með eins þingmanns meirihluta og 48% atkvæða á bakvið sig. Þessi stjórn er ekki búin að vinna að neinu af viti síðustu ár, mestu máli hefur skipt að passa upp á stólana, að sem flestir fái að prófa sem flest ráðuneyti og enginn fari í hættulega mikla fýlu. Valgerður, Guðni og Sif nenna engan vegin að hanga sem óbreyttir þingmenn í 4 ár svo þau heimta frekar að fá fín ráðuneyti til að reka. Svo koma varamenn inn á þing í stað þeirra. Þessi stjórn hefur hvorki getu, þor, dug né metnað til að takast á við þau vandamál sem blasa við á Íslandi í dag.
--
En í rauninni er þetta ekki skelfilegt, vegna þess að þessi stjórn nær aldrei flugi, hún hefur á móti sér stóra og kraftmikla stjórnarandstöðu sem vex ásmegin við hverja hindrun. Ef að Íhaldinu dettur í hug að selja Landsvirkjun eða "finna" þá snilldar lausn að leysa vandamálin í mennta- og heilbrigðiskerfinu með eintómum einkavæðingum þá munu þeir einfaldlega fá fólkið í landinu upp á móti sér og þá mun stjórnin springa! Þetta verður líklega í desember og við kjósum aftur í Janúar og þá - LOKSINS - fellur stjórnin almennilega og til valda kemst stjórn sem að virðir fólkið í landinu.
---
En svo getur líka vel verið að ég hafi algjörlega rangt fyrir mér og það sé í rauninni þannig að 36% kjósenda á íslandi séu rúmlega fimmtugir, mjög vel stæðir karlmenn af Stór-Reykjavíkur svæðinu, sem reka sitt eigið fyrirtæki, eiga gríðarstóra bankareikninga, sem að þrá ekkert frekar en þeir hagnist sem mest á sem skemmstum tíma og er nákvæmlega sama á hvaða hátt það gerist eða með hvaða afleiðingum! Er fólk í alvörunni ekki búið að fá nóg af þessari óstöðvandi græðgi.
----
Það er eins og einhverskonar þoka liggi yfir Íslandi, þessi þoka blindar okkur og gerir það að verkum að við höldum að það sé náttúrulögmál: að vinna lengstu vinnuviku í Evrópu, að allir frá 17 ára aldri þurfi að eiga bíl, að þeir sem lægst hafa launin hafi ekki efni á því að lifa af í "ríkasta landi í heimi", að þeir sem tali um evrópusambandið vilji gefa "landið okkar", að bankar geti verið með vexti sem okurlánarar væru stoltir af, að matvælaverð heimskulega hátt.

Það er hægt að breyta þessu öllu, við þurfum bara að ákveða það. 52% þjóðarinnar vilja það en einhvervegin er það skrítið ætla að 48% ráða!

við felldum þessa ríkistjórn, höldum því bara áfram þar til hún hættir!

kveðja frá Rauðu-Vín
Lalli

kíkið á þetta og kjósið rétt

2007-05-10T12:11:00.000Z

ljómandi

2007-05-08T19:32:00.000Z

Síðasta helgi var góð, það var meira en nóg að gera í skóla og skemmtun. Íslendingafélagið hélt sitt mánaðarlega bjórkvöld á föstudaginn og á laugardaginn hélt Bess, sambýlismaður Jóns, elskhugi hans og ástmaður*, upp á 30 ára afmælið sitt, auk þess sem High5 kjallarapöbbinn "okkar" átti eins árs afmæli. Við mættum að sjálfsögðu á alla þessa merkilegu viðburði. Auk þess kusum við á föstudaginn, en fengum hvorki svart né sykurlaust hvað þá bakkelsi að kosningu lokinni. Eftir kosninguna fór ég í heimsókn með Gundkurs: Österreichische Politik und EU í sjálft þinghúsið í Vínarborg, ákaflega falleg bygging og sjálfsagt væri hægt að koma íslenska þinghúsinu mörgum sinnum inn í það. Annar þingsalurinn var sprengdur í seinni heimstyrjöldinni (flott að við íslendingar gerum bara ráð fyrir fyrri og síðari), og gjöreyðilagðist hann við það, í kjölfarið var hann byggður upp í nútímastíl = 1950 stíl! Skrambans ólukka, stærri salurinn, þar sem Bundesversamlung (sameinað þing) kemur saman t.d. til að staðfesta kjör forsetans og minningarathafnir eru haldnar, er í ótrúlega fallegum gömlum stíl með styttum af heims- og stjórnmálaspekingum liðinna alda og einstaklega fallega innréttaður. Nóg af innlit útlit.
-
Auk þess sem að ég skemmti mér um helgina, lærði ég líka slatta þar sem ég þurfti að skila tveimur verkefnum á mánudeginum.
-
Þingkosningar nálgast óðfluga og mér sýnist Samfylkingin vera að toppa á réttum tíma. Jafnvel gæti farið svo að Sjálfstæðisflokkurinn og Framsókn fái bara frí eftir kosningar! Einkavinavæðingu væri lokið. Virðing fyrir fólki tæki við. Stuðningi við morð lokið. Utanríkistefna friðar tæki við. Biðlistar þeirra sem minnst mega sín lengjast ekki meir. Heilbrigðiskerfið myndi vera rekið mannúðlega. Stöðnun í menntmálum væri lokið. Fjárfesting í framtíðinni í gegnum vel menntað fólk tæki við.
Vonandi verða íslendingar svo heppnir að sjálft sig í stjórn, þ.e. venjulegt fólk.

ps. hvernig virkar Morgunblaðið sem stjórnarandstöðusnepill?
-
kveðja úr Kupkagasse,
Lalli
*tekið skal fram að þeir eru samkvæmt því sem ég best veit og þeir sjálfir líka gagnkynhneigðir.

1.maí

2007-04-30T22:41:00.000Z

Einu sinni á ári fer fólk sem trúir því að frelsi, jafnrétti og bræðralag eigi að vera leiðarljós í samfélögum heimsins út á götu, allskonar fólk, frá flest öllum löndum, úr margskonar atvinnugeirum, misróttækt en allt þetta fólk marserar engu að síður saman - í alþjóðlegri samstöðu á degi verkalýðsins, alþýðunnar, fólksins. Í baráttunni fyrir þessum degi hefur fólk verið myrt, lokað inni, lamið og niðurlægt. Það að fara í kröfugöngu þýðir ekki að þú haldir að þú sér verkalýður, ein þjáð sál þúsunda frá þúsund löndum. Það þýðir að þér fannst baráttan sem þetta fólk stóð í þess virði að gefa henni tvær klukkustundir einu sinni á ári og minnast hennar. Ennfremur þýðir kröfugangan einfaldlega að þú vilt setja manneskjuna í fyrsta sæti, það er hægt að útrýma fátækt og það er meira að segja ekki dýrt, hugarfars breytingu þarf bara til. Vegna þess að kerfið okkar í dag virkar ekki fyrir fólk, bara fyrirtæki, peninga og tilbúinn hagvöxt - en án hamingjusamra jafnra borgar sem lifa í frjálsu samfélagi sem kemur vel fram við alla, óháð kyni, þjóðfélagsstöðu, heilsufari og aldri. Þá skiptir það bara engu máli.
-
Gleðilegan 1.Maí
Lalli

lærdómur á föstudagskvöldi...

2007-04-27T20:41:00.000Z

Einn sit ég og skrifa
inní gömlu húsi
enginn kemur að sjá mig
ekki litla músin

hæj

2007-04-23T20:12:00.000Z

Ef sá sem þetta les er ekki búin að fara inn á síðuna hennar Eyrúnar og hlusta á tónleikaupptökurnar hennar, þá skipa ég þeim einstaklingi að gera það strax og koma svo til baka og klára að lesa bloggið mitt. Það er einfaldlega hollt og gott fyrir hjartað að hlusta á Eyrúnu syngja.
--
Hægt og bítandi færast þingkosningarnar nær og alveg jafn hægt og bítandi verða mis-málefnalegir stjórnmálablaðrarar í sjónvarpsþáttum, í dagblöðum og á internetinu heitari og æstari yfir eigin snilld og því hversu flokkurinn þeirra er ótrúlega frábærir. Til að klára röksemdafærslurmar er svo bent á að ýmist vinstri eða hægri menn séu það ógeðslegasta sem fyrirfinnst í gjörvallri veröldinn og að lokum er fólk uppnefnt sem kratar eða kommar, græningjar eða femistar og svo fasistar og íhaldsfúskar og ljóskur. Ég þarf varla að taka það fram að ég er áhugamaður um stjórnmál, ég læri stjórnmálafræði og ég hef verið upptekinn af stjórnmálum frá því ég kastaði snjóboltum ofan af svölum Alþýðuhúsins á Akureyri í átt að strákum sem pissuðu á vegg bak við sjoppuna Turninn, þá fór fram einhver fundur Alþýðubandalagsins. Stjórnmál eru skemmtileg, málefnaleg umræða um þjóðfélagið er lykillinn að því að það verði betra, en það lykillinn að því að við getum gert það betra, er að hlusta á hvort annað, án þess er umræðan tilgangslaus. Ef ekki þá getum við alveg eins bara kastað snjóboltum eða handsprengjum hvort í annað. Ég varð bara að létta á mér eftir að hafa lesið nokkur mogga- og vísisblogg. Sem betur fer eru margir þeirra sem koma í spjallþætti betur að sér í mannasiðum en sumir bloggarar Moggans og Vísis. Það eru ekki gerðar merkilegar kröfur á þá sem vilja verða þingmenn og -konur en við skulum í það minnsta vona að fólk taki starfið sitt alvarlega og sé málefnalegra en sumt fólkið sem styður það.
-
Jeltsín er dáinn. Undarlegt hvað allir verða alltaf góðir þegar þeir gefa upp öndina. Hann er kallaður lýðræðissinni, hvatamaður frjálsra viðskipta og einkavæðingar í Rússlandi og frelsishetja. En var ef til vill bara popúlisti, þegar hann meikaði það ekki í Kommúnistaflokknum og Sovétið var að liðast í sundur greip hann tækifærið og seldi allt sem hann gat selt á spott prís til þeirra sem voru honum þóknanlegir.
-
Þangað til seinna..
lalli

Aftur blogg eftir páska

2007-04-16T19:49:00.000Z

Þessir páskar voru rosalega góðir, ferð til Essen, dagsferð um Köln, matur og vín, síðan ferð til Vínar. Hérna var frábært veður 22-25c° og glampandi sól alla dagana, svo að mamma og pabbi fengu sumarfrí um páska og Hanna og krakkarnir fengu sárabætur fyrir austurríska maíhretið sem þau lentu í í fyrra. Pabbi og mamma voru með nýju myndavélina sína, við Eyrún erum alvarlega að hugsa um að fara ekki til sólarstrandar eins og við áætluðum, heldur kaupa svona vél:)
Það er samt varla hægt að skrifa um allt fríið, það var bara einfaldlega gott.
-
Lalli

stubbaknús frá Knúti ísbjarnahún

2007-04-04T11:46:00.000Z

Mikið rosalega eru stríð ljót, ég fór var að skoða tengil sem Atli setti inn á síðuna sína yfir á undermars.com, síðu þar sem hermenn í Írak birta sínar eigin myndir. Þar er hellingur af myndur af hauslausum búkum, hausum án búka og þar fram eftir götunum. - Ljótt og ekki fyrir viðkvæma.

Ég las nokkrar greinar um síðustu helgi í kynjafræðitímanum um Írak og Afganistan, í ljósi þess að ein helstu rök Bandaríkjamanna til að fara inn í Afgansitan var framkoma Talibana við konur. Reyndar voru stjórnin í Washington komin langt á leið með olíu- og viðskiptasamninga við Talibana á fyrri hluta ársins 2001, en hættu skiljanlega við það eftir 9/11, enda hafa viðskiptasamningar og sameiginlegir hagsmunir aldrei hjálpað þjóðum að hætta illindum og þessháttar. En aftur að konunum, feministasamtök í Bandaríkjunum höfðu bent Bandaríkjastjórn á ástandið í jafnréttismálum í Afganistan frá árinu 1996. Þessi feminstasamtök voru samt ekki rótæk, heldur meira svona liberal, en beittu sér engu að síður fyrir bættum hag kvenna í Afganistan. Miðað við hvað ég las í "Bóksalanum frá Kabúl" þá hefur ástandið ekkert skánað í Afganistan. Enda eru stríðsherrarnir í Norðurbandalaginu engu meiri herramenn, mannréttindafrömuðir eða jafnréttissinnar en Talíbanar. Ég skil aldrei afhverju stjórnmálamenn, úr upplýstum samfélögum, sem að myndu aldrei kenna barninu sínu að lemja gaurinn sem að var vondur við það. Telja að ofbeldi í alþjóðasamfélaginu sé raunhæflausn á vandamálum. Stjórnleysi Realista í alþjóðasamskiptum og -fræðum er ömurlegasta túlkun á samfélagi manna sem til er. Evrópa á róaðist ekki fyrr en allar þjóðirnar höfðu sameiginlegra hagsmuna að gæta. - Ef ég nenni skal ég skrifa betri grein um þetta síðar.. en núna verður þetta bara svona.
-
Núna eru páskarnir að koma. Því er fagnað víða um heim með auknu súkkulaðiáti, hvort sem eggið er tákn lífsins og sigurs þess eða bara gott á braðið. Á Íslandi virðast líka trúaðir og djammarar takast á um hvort sé mikilvægara að eiga frí eða fara á rall. Trúaðir vilja a.m.k. fá að hafa Föstudaginn Langa fyrir sig, en djammarar vilja halda brandarakeppni þá, miðað við hvað ég sá á einum fréttamiðlinum áðan. Í umræðum um fréttina kvörtuðu margir yfir frekju kirkjunnar að vilja halda í þessa frídaga, einn vildi fá að úthluta sínum "kirkju"frídögum sjálfur ásamt örðum frídögum. - Fyrir mér má fólk djamma og líka hugsa um flóknari hluti eins og trúmál, tilvist og gleðjast yfir gulum páskaungum. En er það samt fyndið að vera ekki trúaður, en vilja samt fá frídagana og flytja þá bara annað.. æj mér fannst það bara pínu kómískt. Sama manni finnst líklega ömurlegt að börn fermist og þyki ekkert verra að fá nokkra pakka með.
-
Annarrs förum við Eyrún til Essen á morgun, ég er alveg sáttur við þetta páskafrí...
-
ciao
Lallao

já halló halló, nú ert þetta þú ég þekki þig...

2007-03-27T16:18:00.000Z

Mig langar að biðjast velvirðingar á því að stundum, eftir að ég skrifa bloggin mín þá les ég þau ekki vel yfir og þess vegna eru stafsetningarvillur e.t.v. algengar hjá mér. Kanski er það vegna þess að ég er vitlaus, kanski vegna þess að ég er óheyrilega latur en líklegast vegna þess að ég flýti mér að blogga um allt og ekkert og ýti á "publish" simm-salla-bimm. Batnandi mönnum er best að lifa og ég skal bæta mig hvað þetta varðar. Einhverja fleiri galla veit ég um en nenni ekki að blogga um þá, ég held þeim bara fyrir sjálfan mig um stundar sakir í það minnsta.
-
Ég er, eða á að vera, að vinna í ritgerð ég skila henni á föstudaginn og svo eftir einn tíma á laugardaginn er ég kominn í páskafrífrífrífrí... Þá verðum við Eyrún fyrst hérna í kotinu okkar og höfum það gott og lærum ef við verðum dugleg. Svo förum við til Essen og hittum Hönnu, Dóra, Maju og Torfa og mamma og pabbi koma líka, eftir nokkra góða dag í Essen, fer svo allt liðið að Dóra undanskildum til Vínar þar sem við eigum eftir að eiga góðar stundir. Hér og þar, er og verður næs, ógeðslega næs!
-
Ég sá þýsk-franska heimildarmynd í gærkvöldi á ARTE, um nýnasista, rasista, kristna-hvíta gyðingahatara og fleiri slíka hættulega hópa. Hún sýndi svart á hvítu og í lit að alþjóðleg tengsl eru á milli þessara hópa, sérstaklega frá þeim sem kalla sig "Blood and Honour" sem að eru með mjög sterktengsl sín á milli og svo líka yfir til austurevrópu, en þar er örtvaxandi kynþátta, innflytjenda og útlendingahatur stórt vandamál og mikið áhyggju efni. Talað var við svona gaura frá a.m.k. þessum löndum Svíþjóð, Bretlandi, Bandaríkjunum, Serbíu og Rússlandi. Hóparnir í Svíþjóð framleiddu mikið af ljótum áróðursmyndböndum, þar sem m.a. voru byrt nöfn og heimilisföng meðlima anti-fasista hreyfinga í Skandinavíu og þeir þar með gerðir að skotmörkum nýnasista. Þessi þróun ætti að vekja meiri ugg meðal almennings, enda eru ekki nema 60 að hópar af þessu tagi komust til valda í Evrópu og reyndu að útrýma öllum þeim sem ekki voru þeim þóknanlegir. Hópurinn í Rússlandi var virkilega ógnvekjandi, skipulagður og með tengsl inn í Dúmuna og forkólfarnir þar stóðu eins og ekkert væri fyrir framan Kreml og réttu fram höndina og heilsuðu Hitler. Hóparnir í Bandaríkjunum voru beintengdir gömlu KKK hreyfingunni sem og kirkjum og prestum sem að höfðu vægast sagt undarlegar hugmyndir um heiminn. - Okkur sem líkar vel við lýðræði og mannréttindi verðum vera vakandi fyrir þessu og þora að mótmæla þessu, en umfram allt, taka mönnum alvarlega sem hata lýðræðið, hata litað fólk, hata almennt fólk sem ekki er 100% eins og það vill hafa það, taka þeim alvarlega því þeir eru vopnaðir, hættulegir og of þeir hika ekki við að drepa, pína og niðurlægja fólk og skemma fyrir því að við getum byggt um réttlátt samfélag.
-
Svo hef ég án vafa eitthvað til þess að tuða yfir á laugardaginn eða sunnudaginn.. þangað til þá
prumpkveðja,
Lalli

umhverfið, alheimurinn og litli ég

2007-03-21T19:49:00.000Z

Ég veit ekki hvort mér leyfist að skrifa um umhverfismál, hvað þá heldur reyna að halda því fram að ég sé umhverfissinni eða hafi almennt gaman að útiveru í náttúrinni. Það sem setur mig í þau spor að fá líklega ekki leyfi fyrir þessum skoðunum mínum, hjá þeim sem líklega lesa ekki bloggið mitt, er afstaða mín gagnvart Kárahnjúkavirkjun. Ég er s.s. hlynntur henni, ég veit að hún skemmir landið sem hún er á og setur ör á einn stað á Íslandi. En að mínu mati eru kostirnir fyrir Norðausturland einfaldlega fleiri. Þýðir þetta að ég sé ósjálfkrafa hlynntur öllum örðum virkjunum og álverum á Íslandi, nei engan veginn. Raunar held ég að núna sé fínt að staldra við, enda megum við varla menga meira samkvæmt Kyotobókuninni. Engu að síður þá er ég umhverfissinni og sem slíkur leiðist mér hryllilega umræðan um umhverfismál sem að ein og sér dóminerer allt annað á Íslandi í dag. Hún snýst um virkjanir og álver. Raunverulegar ógnir við heiminn, s.s. hlýnun jarðar fær varla að komast að, eyðing regnskóga ekki heldur, nei vatnsaflsvirkjanir. Fyrir mér eru umhverfismál, eins og flest öll önnur mál, alþjóðlegmál. Ef við á vesturlöndum myndum draga úr notkun einkabíla og minnka orkunotkun við t.d. upphitun húsa, einangra þau betur og nota minna gas. Á sama tíma og við myndum fella niður skuldir þriðja heimsins og aðstoða þar með þær þjóðir við koma sér upp betri aðstæðum gætum við breytt miklu. Því að fátækt þeirra gerir það að verkum að þau taka ekki þátt í baráttunni, þau hafa um annað að hugsa. Þetta myndi samt ekki leiða til kreppu, í fyrsta lagi hafa hagfræðingar svör við því þeim vandamálum sem upp gætu komið og með samstöðu gætum við tekið á þeim. Í hnattvæddum heimi getur ekkert eitt land sama hversu lítið eða stórt það er tekið einhliða ákvarðanir.
Heimurinn er langt því frá að vera jafn hættulegur og sumir á Íslandi virðast halda. Sameiginleg mynt Evrópu myndi ekki drepa Íslendinga, raunar las ég það í dag hjá Ásgeiri Jónsyni hagfræðingi að mikill meirihluti gjaldmiðla hafi verið gengistengdur við gull í upphafi 1900. Alþjóðleg samvinna á aðeins eftir að aukast, það þýðir ekki að ætla sér hvert í sínu eigin horni að hugsa um sín mál og þá lenda þjóðir heimsins í því að finna allar upp hjólið trekk en engin þeirra getur einbeitt sér að einhverju nýju. Til dæmis eyðum við Íslendingar/Evrópubúar (sumir) tíma og peningum í grænmetisrækt í gróðurhúsum, með að fólki í sólríkari löndum kemur sínum vörum ekki á markaðinn því hann er verndaður.
Vestur-Evrópu hefur aldrei vegnað betur en þau 50 ár sem hún hefur í sameiningu reynt að vinna úr sínum málum, auðvitað er Evrópusambandið ekki fullkomið, þess vegna er alltaf hægt að bæta það.
-
Til þess að geta skrifað lengra um þetta þyrfti ég að fara í hagfræði og tíminn minn "Politik und Ökonomie" byrjar á föstudagin... og núna er ég að fara (og ætti að hafa verið) að vinna í fyrirlestri fyrir kúrs um Kyn í Alþjóðasamskiptum.

kv.
Lalli

p.s. myndir úr hjólatúrnum okkar eru á myndasíðunni okkar Eyrúnar.

góð helgi, yndislegur sunnudagur, erfið skólavika, ljúft líf,

2007-03-19T21:15:00.000Z

Síðasti sunnudagur var ljómandi fínn, í alla staði. Við Eyrún vöknuðum á góðum sunnudagstíma, ekki of-sofin og ekki van, bara alveg passlega. Jón kom til okkar með Semmel (rúnstykki) og smjör, við fengum okkur soðin egg, tvo kaffibolla, lýsi, góð semmel, vítamín, appelsínusafa og síðast en ekki síst þá bakaði Eyrún kanilsnúða (umm). Svo héldum við af stað á hjólunum okkar og hittum Kristínu, sem að var við það að verða morgunhress, hún leigði sér hjól og kom með okkur í leiðangur. Við hjóluðum eftir Donau Insel meðfram borginni í dágóða stund en skiptum yfir á meginlandið til að komast meðfram Kalinberg og til Klosterneuburg. Þar sem við gæddum okkur á snúðunum og öðru góðgæti. Hjóluðum svo til baka inn í borgina aftur og stoppuðum næst við fallega brú, sem að sást í kærustuparamyndinni "Before Sunrise". Eftir hjólatúrinn elduðum við svo hörkufínt pasta saman og til þess að fullkomna daginn fórum við á jasstónleika, með hljómsveitinni Kelomat. Mjög snjallir spilarar, sem að léku sér mikið með tónlistina sína og tóku hlutunum ekki alvarlega, en voru samt ekki með óþarfa fíflaskap. Eftir að hafa tekið nokkur frumleg/nútíma jasslög, með tilheyrandi ískrum í blásturshljóðfærunum kölluðu þeir vin sinn inn á sviðið. Hann var með gervikúk á hausnum og kallaðist á við saxafóninn. Það er ekki á hverjum degi sem flinkur tónlistarmaður (saxófónleikarinn) kallar aula upp á svið til sín með gervikúk á hausnum til þess að herma eftir hljóðunum sem hann framkallar. Í laginu sem þeir léku eftir uppklapp fór trommarinn svo á kostum, skipti um tónlistarstefnur á nokkura sekúntna fresti: leiddi hljómsveitina á ca. 2 mínútum úr nútímajassi, yfir í brjálað fönk og hiphop sem síðan fór yfir í argasta rokk og að lokum lentu þeir í mjúklega hefðbundunum jassi þar sem lagið einfaldlega dó út....
Snilld.
Alltaf gaman að eiga góðan dag og leyfa náttúrinni, gróðri, vindi og veðri sem og mönnunum sjálfum að hreyfa við manni.
Ég sofnaði sæll og glaður í gærkvöldi.
-
Seinna skal ég blogga um pólitík, skóla, vandamál heimsins, illsku og heimsku mannanna. En eftir að hafa séð gaur með kúk á hausnum jassa, er ég bara of hress.
-
svo verður líka nóg að gera í skólanum á þessari önn, sem ég virkilega fíla...
kveðja,
lalli (ekki með kúk á hausnum)

Skólinn er hafinn og hafið er ekki hér

2007-03-14T10:57:00.000Z

Skólinn kominn á fullt, mér líst eins og alltaf í upphafi önnin líta einstaklega vel út. Ég er í þremur tímum um Evrópusambandið, einum um stjórnmál og efnahag, áfanga um kyn í alþjóðasamskiptum, svo er áfangi um Öryggis- og samvinnumálastofnun Evrópu og Politikfeld analyse.
-
Svo er hausinn minn að fyllast af kosningaáróðri handa lesendum mínum. En ekkert ykkar telst til íhaldsmanna, svo að þið eigið öll eftir að kjósa Samfylkinguna 12. maí. Ekki nema einhver lesenda minna þrái ríkisstjón þar sem alþjóðlegsamvinna yrði skammaryrði og tal um jafnrétti myndi ekki komast að fyrir netlögreglu og tilraunum til að skilgreina klám og síðar sannfæra þá sem eru ósammála um að þeir séu hálfvitar. Nei, kæru vinir, ég veit að þið viljið það ekki.
-
kv.
Lalli

p.s. kanski skal ég vera málefnalegri næst. En ég læt Árna Pál Árnason um það í bili.

ó blogg mitt blogg

2007-03-10T16:10:00.000Z

Blogg er nördismi, Íslendingar hafa nú, og fyrir nokkru meira að segja, algjörlega misst sig í bloggi. Það virðist enginn geta átt heimasíðu á Íslandi nema hún sé skráð hjá mogga-bloggi, í það minnsta ef einhver á að fara inn á hana. Stjórnmálamenn nýta sér þetta og skrifa um allt og ekkert og sumir leyfa örðum að segja skoðun sína á málinu, en ekki allir. Er það samt tilviljun að enginn málsmentandi Sjálfstæðismaður haldi úti flottri heimasíðu, ok, fyrir utan Björn Marskálk. Annarrs er það bara Eyþór Arnalds sem þótti það nógu mikilvægt til að blogga um að ISG hefði skroppið til Kanarí. En aftur að nördismanum, Íslendingar eru mega-nörd, sem dæmi um það er að ég er Íslendingur og nota orðið mega. Við misstum okkur yfir Rockstar og elskum Evróvisjón, íslenskir íþróttafréttamenn þykjast líka alltaf vera vinir íþróttamannanna. En nóg um það, við erum bara púkó.
-
Áðan sá ég í dagskránni hjá Rúv, Aplasyrpu.. svo kíkti ég aftur og sá að það var Alpasyrpa, það þótti mér leitt.
-
Ég er hress ekkert stress, bless, kex
Lalli

framkallaðu bros fyrir heiminn

2007-03-08T19:48:00.000Z

Hjartanlega til hamingju með baráttudaginn konur! Bara ef þið hefðuð meiri völd í heiminum, þá væri markt líklega einfaldara. Til dæmis ef fer sem mögulegt er að konur verði í æðstu embættum Þýskalands, Bandaríkjanna, Frakklands og Íslands. Fram-sam-fylking!
-
George Bush er í heimsókn í Suður-Ameríku þessa dagana, Bandaríkjamenn hafa ekki verið óvinsælli í háa herrans tíð. Hugo Chávez kallaði Gogga djöful úr ræðustól fyrir ekki alls löngu, Brasilíumenn ákváðu að fyrst það þyrfti að taka fingraför af öllum frá Brasilíu sem vildu komast til Bandaríkjanna væri best að gera svoleiðis við þá Bandaríkjamenn sem vilja koma til Brasilíu. Mótmæli gegn honum hófust með 6 milljón manna mótmælum í Sao Paulo, samkvæmt því sem ég las á Brasilískum fréttavef áðan. Það er búist við því að hann reyni að hvetja Brasilíumenn til aukinar framleiðslu á Etanóli, framleiddu úr sykurreyr, sem að þeir nota sem eldsneyti. Með því minnka jafnframt viðskipti þeirra við Venesúela, tilgangur þessa hjá Bush er ekki náttúruvernd heldur tilraun til að minnka áhrif Chávez í álfunni. Síðar mun hann fara til Úrúgvæ, Kólumbíu, Guatemala og Mexíkó.
Ef það verður erfitt að verja Bush í Brasilíu veit ég ekki hvernig það verður þegar hann kemur til Kólumbíu síðar í ferðinni, þar sem hann mun leggja áherslu á baráttu gegn kókaínframleiðslu. Það er hættulegt fyrir venjulega ferðalanga að þvælast til Kólumbíu, þá hlýtur jafn óvinsæll maður og Bush að eiga virkilega erfitt að ferðast um, sérstaklega ef hann vill berjast geng þeim sem stjórna helmingi landsins.

Þegar hann kom til Vínarborgar í fyrra vor, voru heilmikil mótmæli, hann stytti dvöl sína um 2 daga vegna þess og hin eiginlega mótmælaganga var í rauninni farin þegar hann var á leiðinni úr borginni. Af öryggisástæðum var þetta gert, enda leynast oftar en ekki mislitir ofbeldissauðir í svona hópum. Eins og kom svo á daginn þegar nokkrir hlupu beint að löggunni þegar að Hofburg var komið og grýttu hana. - Enda er öllum ljóst að lögreglumenn í Austurríki stjórna gangi heimsmálanna.
-
En það er bara að vona að hann komist lifandi frá þessu. Hvað ætli Bandaríkjamenn myndu gera ef Bush yrði ógnað að ráði? Ógnað að ráði, hvað meina ég, það eru 6 milljónir að öskra á hann að koma sér heim núna... Bara vonandi að þetta fari friðsamlega fram, því þessi lönd þurfa ekki á óvild Bandaríkjamanna að halda.. nóg hafa Vesturlönd gert þeim í gegnum tíðina.
-
Annarrs svona í lokin, þá fékk ég 1 einkun í tímanum sem ég átti eftir að fá einkun úr. 1 er hæsta einkunin hérna í skólanum, svo að ég fékk 10!

Lalli

tekinn í misgripum

2007-03-05T11:53:00.000Z

Vín. AP.
Íslendingafélagið í Vínarborg hélt sitt árlega þorrablót á góu á síðastliðinn laugardag. Blótið fór fádæmavel fram og annað eins hrútspunga- og sviðakjammaát og brennivínssvolgr hefur ekki áður þekkst utan landhelgi Íslands. Skemmtun kvöldsins fólst helst í því að eilítið ölvaðir söngvarar klöppuðu hvern annan upp og létu félaga sína syngja óæfðar aríur. Þegar tenórinn Snorri Wium var kallaður upp í annað skipti ákvað hann að láta ekki leika svo auðveldlega á sig og hnippti í öxlina á unga gullbarkanum og stórsöngvaranum Lárusi Heiðari Ásgeirssyni. Einar Guðmundsson bað Snorra um að synga "O sole mio", til að kynna Lárus fyrir áhorfendum eða til að koma honum í vandræðalega stöðu ákvað Snorri að láta Lárus fá hljóðnemann í augnarblik áður en lagið hófst. Þá komst upp um misgripin, Snorri hafði farið mannavilt og dregið með sér stjórnmálafræðinörd í stað óperusjarmatrölls. Allt kom fyrir okki og gítarspilið hófst og Snorri byrjaði á línunni "ó sóle mínó" sem hvert mannsbarn þekkir og kláraði það með sóma, að því loknu rétti hann Lárusi hljóðnemann og gerði Lárus sér þá lítið fyrir og samdi nýjan texta " ó snorri wium" og við rífandi fögnuð samlanda sinna, sem hvorki héldu vatni né brennivíni yfir dýrðinni.
-
Ég vona að þetta sé rétt haft eftir AP fréttastofunni
Kveðja, látrungs Lalli

Kosningar eftir 73 daga

2007-03-02T15:00:00.000Z

Ég bætti við nokkrum góðum tenglum á bloggið mitt, ég á eftir að fjölga þeim eftir því sem nær dregur að kjördegi. Í dag þá mæli ég sérstaklega með grein eftir Róbert Marshall og svo líka greininni eftir Hallgrím Helgason sem ég sagði frá í gær. Það er nefnilega grafalvarlegt mál ef að frjálshyggjuflokkunum með græna fálkann og grænu kindina verði ekki refsað fyrir að hafa misþyrmt íslensku velferðakerfi undanfarin ár. Þar að auki drógu þeir nafn Íslands í stríð, sem enn í dag nokkrum árum eftir að Bush sagði því lokið með sigri geysar af krafti.
Ég hef reyndar ekki áhyggjur af því að Samfylkingin fái ekki góða kosningu og enn minn áhyggjur eftir að Jakob Frímann gekk úr flokknum (!)(lol), í staðinn fyrir fornmæltann frum-stuðmann fengum við kröftugasta borgarfulltrúa VG í Reykjavík í tíð R-listans.
Síðustu skoðanakannanir á auðvitað að taka alvarlega, en Samfylkingin réttir úr kútnum, VG aftur á móti er að tapa grænasjarmanum og eftir standa Óli kommi, Steingrímur J., Ragnar Skjálfti, Kolbrún Halldórsdóttir í gamal dags baráttu fyrir afturhaldi. VG er nefnilega hvorki framsækinn né opinn og frjálslegur, heldur flokkur sem að sér alltaf bara eina lausn og eina leið til að leysa vandamálin, sína leið.
Heimurinn er bara ekki svo einfaldur og fólkið er jafn margbreytilegt og það er margt.

Lalli ..... kominn í gír;)

kaffibolli og ritter sport

2007-03-01T13:04:00.000Z

Ljómandi! Við erum aftur komin til Vínar og Eyrún fór í fyrsta tímann sinn í dag og ég var að skrá mig í þá tíma sem að ég vil fara í áðan. Einhverja tímana mun ég sitja í þessari fallegu byggingu á myndinni. Skildufög sem ég ætla að taka á þessari önn eru Stjórnmál og Hagfræði, Austurríki og EsB - bæði grunnkúrs og fyrirlestur, Samanburður stjórnmálakerfa - líka grunnkúrs og fyrirlestur. Svo skráði ég mig í tíma sem fjallar um kyn í alþjóðasamskiptum og annan sem að fjallar um OSCE. Svo tek ég líklegast tvo fyrirlestrar áfanga í viðbót, ef að eitthvað vantar uppá eða ég fæ ekki pláss þar sem ég vil vera.
-
Reykjavíkur ferðin var fín, það var gott að hitta alla og gaman að komast óvænt í afmælið hans Heimis á föstudaginn. Laugardagurinn var svo undirlagður fyrir útskriftarveislu frá 16-04:) við Eyrún vorum því skiljanlega þreytt á sunnudaginn, en mamma og pabbi fóru með okkur á sögusýningu Landsbankans og svo á Listasafn Reykjavíkur og því næst í pönnsur til ömmu. Það hressti okkur við.
-
Páfagaukurinn brjánsi er bjánalega blár blúndubani belgtroðinn af blammeringum brasilískum bambusveiðistöngum og kjúkklingabrjóstum.

Ekki reyna að verja það andskotans fífl!
-
Annars langar mig að benda ykkur á grein sem að Hallgrímur Helgason skrifaði og er á heimasíðunni hans. Hann kann að koma orðum á blað sá skallakrati, það er gott að hann skuli vera í réttu liði. Greinin heitir Hið karlæga kvenelti og Hallgrímur á þar marga góða spretti.
-
Tjá
Lalli

Lungu jarðarinnar – í minningu Önnu Nicole Smith

2007-02-15T14:25:00.000Z

Amasón frumskógurinn minnkar með hverjum deginum. Þessi stutta setning felur ekki í sér nein ný sannindi, enginn hrekkur við eða hváir, gamalt vandamál sem ennþá er til staðar sem ekki fær marga dálksentimetra í dagblöðum heimsins og fáir stjórnmálamenn velta fyrir sér. Það sem var vinsælast á mbl.is klukkan 19.15 á Valentínusardaginn 14. febrúar 2007 var:
Nr.1 – Lífvörðurinn kann að vera barnsfaðir Önnu Nicole.
Nr.2 – Upptaka af símtali hjúkrunarkonu Smith við neyðarlínu gerð opinber.
Nr.3 – Fréttastofur gagnrýndar fyrir slælega umfjöllun um andlát Önnu Nicole.
Nr. 4 – Þrír í haldi grunaðir um skemmdarverk í Hafnarfirði í nótt.
Nr.5- Verjendur mótmæla löngum yfirheyrslum í Bausmáli.
Fyrstu þrjár fréttirnar um konu sem var fræg fyrir það vera fræg og nú nýlátin, fjórða fréttin um skemmdarverk unglingspilta í Hafnarfirði og sú fimmta um svartan blett á íslensku samfélagi. Ef til vill er það Mogginn sem aldrei lýgur sem virðist helst setja upp slúðurfréttir á vefinn eða þá að íslenskir lesendur velji sér ekki alvarlegra lesefni.

En ég fór að velta fyrir mér Amasónskóginum eftir að afi minn gaf mér eintak af National Geographic, hann sagði að þar væri grein um Brasilíu sem ég hefði vafalaust áhuga á. Mikið rétt hjá gamla, þar var grein sem hét Amazon – Forest to Farms. Battel to Stop the Land Grab. Hún vakti mig til umhugsunar í flugi milli Englands og Austurríkis. Hún minnti mig á að landið sem að ég var svo heppinn að fá að kynnast í heilt ár 17 ára gamall þarfnast hjálpar frá Evrópskum Jafnaðarmönnum. Evrópa er nefnilega vandamálið, við þurfum ódýr matvæli og til að framleiða þau þarf ódýrt hráefni. Regnskógurinn er höggvinn niður og nautgripum beitt á landið. Eftir að það grær aftur er soja plantað og baunirnar sendar beint til Evrópu þar sem þær eru nýttar, skv. því sem ég sá á BBC, til kjúklingaeldis. Ég veit ekki með ykkur en ég hef lítinn áhuga á því að verða saddur á kostnað þess að Amasón frumskógurinn hverfi. Þeir íbúar Brasilíu sem að reyna að standa upp í hárinu á landræningjunum, lifa við ofbeldi og hótanir og hundruðir þeirra hafa fallið í valinn á síðustu áratugum. Þeir sem að rækta sojabaunirnar eða eiga nautgripina eru ekki hluti landlausra fátækra bænda, heldur stóreignamenn með viðskipasamninga í Evrópu og þeir standa ekki sjálfir í búskapnum. Einn þessara mann er Blairo Maggi, fylkisstjóri í Mato Grosso og einn stærsti framleiðandi sojabauna í heiminum, en hann á yfir 400.000 ha (4000 km2) af ræktarlandi. Alríkisstjórnvöld í Brasilíu, Umhverfisráðuneytið og fleiri vilja stöðva þessa þróun, en á meðan markaðurinn í Evrópu kallar á meira og aftur meira, er lítið hægt að gera. Skógarsvæðið sem á hverjum degi hverfur undir sojarækt fyrir Evrópu er stórt, en land eins og Brasilía, þar sem vandamálin eru mörg og stór, ræður ekki eitt og sér við verkefnið.
Er það ekki athyglisvert að 80% þeirra sem búa við hungur í heiminum búa á svæðum sem nærri eingöngu framleiða mat. Á meðan að við í Evrópu áttum okkur ekki á því að við erum hluti, og e.t.v. rót, vandans þá er hann ennþá til staðar.

Afhverju þarfnast Brasilía og önnur sambærileg lönd hjálpar jafnaðarmanna? Einfaldlega vegna þess að það er í kjarna jafnaðarstefnunnar að líta á heiminn sem heild. Í dag, á tímum alheimsvæddrar peningahyggju og hlýnunar jarðar, er það hlutverk evrópskra jafnaðarmanna að snúa blaðinu við. Hugmyndin um jöfnuð þekkir ekki landamæri. Í fjölmiðlum á Íslandi fangar andlát Önnu Nicole Smith athygli okkar, en á jörðinni okkar eru vandamálin stærri og fleiri. Við höfum vitað af þeim alltof lengi, núna er kominn tími fyrir aðgerðir á öllum sviðum, ef ekki þá er baráttan gegn mönnum eins og Blairo Maggi, peningahyggju þeirra og vanvirðingu gagnvart öðrum íbúum heimsins fyrirfram töpuð.

hafið það gott,
lallinn ykkar

Ruhrgebiet -Metropole

2007-02-07T09:45:00.000Z

Tvær myndir: An Inconvinient Truth og Blood Diamonds.
Fyrri mjög góð til að fá upplýsingar um loftslagsbreytingarnar og sjá að við öll berum ábyrgð og getum gert eitthvað til að hjálpa.
Seinni mjög góð en líka mjög ljót, e.t.v. vegna þess að hún sýnir heiminn eins og hann er, hún segir manni líka að við öll berum ábyrgð í málum sem að við skiljum kanski ekki fullkomlega. Það eru nefnilega þessir hvítu-ríku-kallar sem hafa verið með skítugu lúkur sýnar mitt inní í nánast öllum átökum sem við þekkjum. Það er samt óneytanlega leiðinlegt að fara í bíó og missa trúna á mannkynið, en við erum bara svo vitlaus á köflum , ef ekki öllum köflum.
-
Þegar að við höldum að við gerum allt rétt, politically correct, þá erum við samt svo illa upplýst og með fáa möguleika til að gera eitthvað í málunum að við getum ekkert gert. Neytendasamtök eru engan vegin að standa sig og hafa ekki náð að skapa sér nógu stórt vinnusvæði. Hversu margir myndu til dæmis minnka kjúkklinga át í Evrópu ef allir vissu að sojabaunirnar sem að notaðar eru til að fæða kjúkklingana koma frá Amazonsvæðinu í Brasilíu, þar sem regnskógur er tættur niður svo að við fáum ódýran kjúkling. Þetta væri gott verkefni fyrir neytendasamtök, ekki aðeins geta reikið vöruna til bóndans sem ræktaði kjúklinginn, heldur alla aðra vörur sem notaðar eru í framleiðslunni. Ég kæri mig ekki um að vera saddur ef að Regnskógar hverfa í kjölfarið.
Ef til vill er lausnin við þessu bara bylting.
-
Pælið í því ef að allir peningarnar sem að Bandaríkjamenn hafa eytt í Íraksstríðið hefðu farið í mannúðarstarf? Skólabyggingar? Brunna? Læknastöðvar? .. þessi auma veröld.
-
Á eftir förum við Eyrún til Essen og hittum alla þar! Það verður gaman, það er svo langt síðan við höfum farið til þeirra, núna verðum við frá fimmtudagsmorgni til þriðjudagskvölds og höfum það gott. Maja og Torfi Geir verða pottþétt í stuði og Hanna og Dóri líklega líka, okkur hlakkar til að koma í morgunmat á morgun hjá þeim.
-
Ástar- og saknaðarkveðjur til þeirra sem þekkja mig,
Lalli

Að lokinni prófatíð

2007-01-31T09:31:00.000Z

Þá er ég búinn að klára þessa prófatíð, hún var stutt en ég á líka eftir að skrifa 3 ritgerðir sem ég á að skila á næstu önn. Reyndar grunar mig að ég eigi eftir að taka eitt af þessum prófum aftur, helvítis Politische Theorien, hljómar einfalt og er það líka, nema fyrir mig sem þarf að læra tungumál á meðan ég skil og get skilgreint hugtök, kenningar og hvað þetta heitir allt saman. Í því prófi svilduðu samnemendur mínir svo mikið að mig blöskraði, virkilega, ég sem var e.t.v. sá eini sem hefði getað með einhverju móti "mátt" svindla gerði það að sjálfsögðu ekki. Í prófinu sem ég var í í morgun var þannig uppbyggt að þú getur ekki svindlað, það má taka allt með sér í prófið sem að mögulega gæti hjálpað þér. Prófið, í Politik und Recht, snérist sem sagt ekki um að muna uppbyggingu stjórnkerfa, stjórnarskráa, alþjóðalaga, o.s.frv. heldur að vera klókur að bera þetta saman og geta lesið út úr uppbyggingunni hvernig hún er og þesshátta. Ég held að ég hafi staðið mig ágætlega, vona það besta að minnta kosti. Fyrsta prófið sem ég fór í var auðvelt, Historische Grundlagen der Politik, ég vona að ég fái a.m.k 2 í því.
Kerfið hérna er þannig að einkunnir eru gefnar frá 5-1 og 1 er best, 5 er fall, 4 er slef, 3 er ágætt og 2 er líkast til aðeins meira ágætt.
-
Þvílíkur leikur í gær! Ég vorkenni "strákunum okkar" alveg heilan helling. Eftir að Baunadruslurnar skoruðu síðasta markið hélt ég að ég yrði ekki eldri. En slökunartónlist og róleg öndun reddaði lífinu mínu og því að ég gat haldið áfram að læra eftir leikinn.
-
Núna í febrúarfríinu okkar verður nóg að gera, við þurfum að læra helling, ég að skrifa ritgerðir og Eyrún æfa sig daglega því hún fer í stórt próf í vor. Svo förum við til Hönnu og co . í Essen í tæpa viku og heim yfir góða helgi. Á milli þess förum við í ræktina, kaffihús lesum jólabækur (sem við eigum ennþá inni:)) og njótum þess að vera í Vínarborg.
-
Svo ætla ég líka að vera duglegur að blogga, þætti líka væntum ef einhver kommentaði á þetta hjá mér. Þó svo að þið gerið það ekki þá skiptir það ekki, Íslenska-, Ameríska- og Austurrískaleyniþjónustan skoðar þetta.

Kex í baði,
lalli

Nýtt! nýr nútími

2007-01-11T14:53:00.000Z

Nýtt ár. Nýr Lalli. Það besta við nýja árið, ef að maður skildi ágætlega við það gamla er að maður getur byrjað upp á nýtt, með ný markmið og leyft nýjum hugmyndum að ráða.
Ég fór í tíma í morgun og skilaði síðasta verkefninu mínu í þeim tíma í gærkvöldi, svo seinni partinn fór ég í annan tíma en kennarinn vildi ekki kenna, hann vildi taka þátt í þeim mótmælum sem að staðið hafa yfir undanfarna daga hérna í Austurríki. Þannig er mál með vexti að kosningaloforð SPÖ (sósíaldemókrata) var að afnema skólagjöld á háskólastigi, sem síðasta ríkistjórn kom á og það var þeirra kosningaloforð og það átti að gerast strax eftir að þeir kæmust í stjórn. En þegar að á hólminn var komið og SPÖ áttu engan annan kost en að mynda Stórbandalag með ÖVP (Þjóðarflokknum) og í þeim viðræðum tókst ekki að koma í gegn afnámi þessara gjalda. Ein hugmyndin sem að sett var fram var sú að þeir sem ekki gætu borgað skólagjöldin (ca. 400€ á önn) gætu unnið fyrir þeim með 60 stunda "samfélags"vinnu = 6.5€ á tímann eftir skóla. Þeir fátækustu ættu sem sagt að vinna samfélagsþjónustu til að geta lært. - Afhverju borga þeir þetta ekki með sumarlaununum sínum? Hvað með námslánin? Kerfið er ekki það sama og heima og það er ekki alltaf hægt að stökkva inn á næsta vinnustað og fá vinnu eins og heima.
Ég reyndar stoppaði stutt við núna, þar sem ég þarf að klára verkefni fyrir morgundaginn en þessari baráttu austurrískra námsmann fyrir jöfnum tækifærum til náms er ekki lokið, svo að ég læt ef laust sjá mig næst. Kennarinn sem að fékk okkur til að ganga út úr tíma, sagði okkur meðal annarrs frá því að stofan sem við værum í væri skráð fyrir 160 manns en þegar Leopold Engleitner, sem ég sagði frá um daginn, spjallaði við okkur voru 400 manns í stofunni. Skólinn minn er stór, það eru 60- 70.000 nemendur í honum, en mér líkar vel við hann, þó að það sé annað að vera í stórum sal en ekki eins og í Unak þar sem voru e.t.v. 6 í Nútímafræðitímum.
-
Svo er ég búinn að lesa mikið um Amazon frumskóginn undarfarið og ætla að leita mér að frekari upplýsingum um vandamálin þar. Skógurinn er tættur niður fyrir sojabaunir sem fara á evrópumarkað. Æj hvað það er nú gott hugsa sumir, það getur ekki verið mikið, það eru svo fáir sem borða Sojabaunir... Nei ekki alveg, þær eru notaðar sem fóður fyrir t.d. kjúkklinga. En ég þarf smá meiri upplýsingar og tíma til að vinna úr þessu máli, sem undarlegt en satt virðist ekki brenna á Græningjum Evrópu...

Lalli á spani

Ár

2006-12-30T22:27:00.000Z

Á þessu ári trúlofaði ég mig, við Eyrún fluttum í fallega íbúð og ég byrjaði á fullu í háskólanum í Vínarborg, fyrir mína parta þá er þetta ár gott ár og ég varð að betri gaur á þessum 12 mánuðum. Vonandi verður árið 2007 jafn gott fyrir mig, en um fram allt vona ég að það verði betra fyrir heiminn, fyrir jafnrétti og frið í honum. Árið 2006 endar engu að síður ekki á þann hátt að við getum vonað það. Síðast liðna nótt var Saddam Hussein myrtur, þeir sem að myrtu þann auma einræðisherra gerðu það í nafni frelsis og réttlætis. Morð kalla venjulega ekki á frið og sættir, hví ætti þetta morð að gera það? Hlýnum heimsins er vandamál sem við vitum öll af, en samt er bara rætt um það, en ekkert gert, hvergi nokkursstaðar.
Í síðustu Gallup könnum ársins er Sjálfstæðisflokkurinn með 38% en Samfylkingin aðeins með 24%, þetta þýðir auðvitað aðeins að allir þeir sem vilja sjá réttlátt samfélag þurfa að bretta upp ermarnar og hætta að rífast í öllum hornum og nota kraftana til þess að hlúa að öllum í samfélaginu. Þegar púðri, peningum og kröftum er eitt í að drepa 9 óæta hvali en 5000 börn eru fátæk þá þarf að skipta um stjórn. Við þurfum að taka höndum saman. Hætta að skemma fyrir hvoru örðu og breyta samfélaginu okkar.

Ég ætla að gera mitt til að og ég vona að þið gerið ykkar.

Sameinuð stöndum vér sundru föllum vér,
hjartans óskir um gleði- og friðarár.

Lalli

Jólin koma..

2006-12-23T18:18:00.000Z

Ég rétt svo lauk við að skrifa jólapistilinn minn, ýtt svo á publish og þá sagðist Internet Explorer ekki vilja framkvæma þá skipun, u.þ.b. 5 mínútum áður hafði ég brennt jólagrautinn, þegar ég reyndi að sjóða vatn og kveikti á vitlausri hellu. Við þessum vandamálum eru til lausnir, annarrs vegar henda grautnum og sjóða ný grjón fyrir Ris a la Mand og hins vegar ná í Mozilla Firefox, ég hef nú þegar gert hvort tveggja. Jólin koma þrátt fyrir þetta og ekkert stress. Jólastress þekki ég ekki af eigin raun, ferðaþreyta en ekkert stress.
Jólin eru falleg hátíð og við getum hvert og eitt nýtt okkur það sem við kjósum úr boðskap hennar, um fram allt eru jólin afsökun til þess að vera góður við fólkið sitt, hugsa um kærleika og njóta þess að vera til. Við getum hvorki keypt jólin, bakað þau né eldað, jólin eru ekki neitt eitt sem við finn, fáum eða þurfum að leita að. Jólahátíðin kemur okkar, hvort sem við erum gömul eða ung, rík eða fátæk. Þau ykkar sem viljið fá smá skammt af fallegum jólaboðskap gætuð t.d. farið í Hátíðarmessu í Akureyrarkirkju klukkan tvö, ef að presturinn nær ekki að færa ykkur boðskapinn, þá er ég þess fullviss að hún Eyrún mín færir ykkur hann en hún syngur tvo sálma.
Umfram allt njótum þess að hitta vini og vandamenn og knúsa fólk og brosa til þess, segja hátt og snjallt gleðileg jól!

Lalli

úr -19 í +12

2006-12-21T15:31:00.000Z

Ísland tekur aldeilis vel á móti manni, hamfara hláka og rokrassgat. Ég bíst nú samt við því að það sé algjörlega toppur sjálfhverfunnar að halda að því fram að veðrið breytist fyrir mig.
Fréttirnar hérna á Íslandi hafa undanfarið fjallað um veðrið og dónakalla. Það er lítið sem við getum gert í þessu veðri en þessir bölvaðir ógeðslegu siðspiltu "menn" sem að nauðga og misnota stúlkubörnum og konum, það er ýmislegt sem hægt er að gera við þá. En í því nýfrjálshyggju andrúmslofti sem löglærðir Reykvíkingar, sem stjórna landinu okkar, anda að sér virðist ekki vera rými fyrir þau vandamál samfélagsins sem hægt er að stjórna með "frjálsum" viðskiptum. Laga frumvörp, t.d. frá Ágústi Ólafi, um afnám fyrningarfrests komast ekki í gegn, dómstólar og lögregla sleppa mönnum út þrátt fyrir að þeir hafi í tvígang nauðgað fermingarstúlkum. Karlmenn eiga það til að móðgast ef það er sagt að þetta vandamál sé lýti á karlmönnum sem samfélagshóp eins og t.d. Egill Helgason gerði um daginn eftir að Þórunn Valdimarsdóttir benti á þetta.
En næst ætla ég ekki að benda á það sem er ljótt og leiðinlegt, heldur skrifa fallegan jólapistil og svo í lok desember ætla ég að rifja upp árið hérna á ruslinu mínu.

þangað til næst, þá verða jólin alveg að koma...

lalli

ég vaknaði í morgun

2006-12-14T11:37:00.000Z

Ég sýndi ótrúlegan aulahátt í morgun, ég vaknaði klukkan 07:07 og þegar að vekjaraklukkan hringdi klukkan 07:15 þá fór inn á bað burstaði tennurnar, fór svo í sturtu og að því loknu fór ég aftur inn í herbergi þar sem ég hefði átt að fara í fötin mín en hún Eyrún lá í rúminu okkar svo að ég lagðist við hliðina á henni og knúsaði hana og viti menn ég sofnaði svo ég svaf yfir mig þrátt fyrir að hafa vaknað, burstað og sturtað mig! Ég hlýt að vera eitthvað veikur...
----
Sá einhver Kastljósþáttinn þar sem Ingibjörg og Geir H. Haarde mættust? Mikið rosalega þótti mér Hr. Haarde vera aulalegur í honum. Þátturinn var varla byrjaður þegar að hann kvartaði yfir því að Ingibjög hefði gripið fram í, næst þegar að Ingibjörg fékk orðið greip hann sjálfur fram í og Ingibjörg bað hann um að biðja fólk ekki um að grípa ekki fram í ef hann gæti ekki setið á sér sjálfur. Svo svaraði hann umræðunni um fátækt með því að skýrslan væri léleg, en hún kemur einmitt úr hans ráðuneyti (árinni kennir... líklega illur árasmiður í þessu tilfelli) og rökin fyrir flestu sem rætt var um voru leiðréttingar á hinum og þessum mistökum sem að ríkisstjórnin hefur gert og hann bakkaði útúr hvalveiðiumræðunni og sagði hana bara smámál. Svo undirlokin var hann orðinn pirraður og sagði að Ingibjörg hefði talað allann tímann. Hann hefði nú þá barasta átt að tala meira, ekki var það henni að kenna ef henni tókst að færa rök fyrir sínu máli og hann gat engum nema sjálfum sér um kennt ef hann talaði ekki nóg.
---
Við erum búin að pakka í eina tösku, það er hlunkataskan okkar og í henni eru allir pakkarnir svo það er eins gott að hún skili sér, hún er samt svo stór að það væri gríðarlega erfitt að týna henni. Á morgun er föstudagur og klukkan 03.30 á laugardaginn þurfum við að leggja af stað út á flugvöll, við förum alla leið til Akureyrar í einni lotu og verðum lent á Akureyrarflugvelli klukkan 18:15.
--
Það verður ljómandi gott að komast heim, það verður gaman að hitta fólk, borða mat, labba í snjó, vera kalt á tánum, fara í fjallið, hanga og byrja svo aftur að læra á fullu því prófin eru eftir.
-
Ég vildi að ég væri duglegri við að skrifa um allt sem ég hugsa, kanski verður það áramótaheit, ásamt því að hreyfa mig meira og almennt að vinna í tilgangi lífsins: verða betri maður.

Vesist blesa og sjáumst fljótt,
Lalli

jólaköttur

2006-12-11T12:31:00.000Z

Ég held að jólakötturinn sé stórlega misskilin skepna, hann var gríðarstór og átti hvergi heima, hann var illa hyrtur og með ljót augu, svo vildi hann ekki mýs og mjálmaði aumlega og var þessvegna talinn skrítinn eins og oft vill með þá sem eru örðruvísi en hinir. En hann vildi vel þessvegna lagðist hann á fátæka fólkið sem fékk enga nýja spjör, hann lagðist á þau og reyndi að hlýja þeim! Svo kvæsti hún á þá sem að fengu föt og hvarf svo á braut, e.t.v. var hún bara að hrópa húrra á kattamáli. Við hinum ættum að taka köttinn okkur til fyrirmyndar og passa upp á það að öll börn fái nýja flík, það eru um 5000 börn á Íslandi sem lifa undir fátækrarmörkum
-
Síðasta bloggfærsla var óvenjuleg, enda nenni ég ekki alltaf að segja frá því sem að ég geri hérna í Vínarborg, en hún sýndi e.t.v. að stundum geri ég eitthvað annað en læra, blogga og hugsa um stjórnmál og vandamál.

næst verð ég samt að skrifa um stjórnmál, ef ekki, þá fer ég að hafa áhyggjur af mér.
lalli

TransAktionsNummern

2006-12-10T16:24:00.000Z

Það var frí á föstudaginn í skólum og allstaðar nema í búðum, Maria Empfängnis hét þessi hátíðardagur Kaþólskra, en satt best að segja veit ég ekki 100% tilganginn með honum, eitthvað með erfðasynd heimsins og að María hafi fæðst án hennar, held ég en, æj ég ætla ekki að ljúga að ykkur, þetta var í það minnsta kærkomið frí. Ég var í tíma í skólanum til klukkan 20 á fimmtudagskvöldið og þegar ég kom heim voru Eyrún og Kristín farnar í partý í listaskólanum, svo að ég tók því rólega fékk mér rauðvínsglas og hékk á netinu, eins og ég geri ekki nóg af því. Seinna um kvöldið hitti ég Jón á ágætri Ölstofu og við röbbuðum um heima og geima.
Helgin fór svo í að rúnta um jólamarkaði og í búðir að leita uppi síðustu pakkana, sem fundust að lokum.
-
ljómandi fínt alveg hreint, pís át.. blogga meira og betur síðar..
lalli

Nýtt útlit og nýjir tímar

2006-12-07T11:26:00.000Z

Það var kominn tími á að gera þetta blogg mitt fallegra, var það ekki? Mér fannst það í það minnsta svo ég breytti því og núna þykir mér það fínt. Efnistökin verða ennþá þau sömu, allt það sem hrærist inn í hausnum mínum og mér tekst að koma frá mér, svona næstum skiljanlega.
Bloggmenningin á Íslandi hefur tekið gríðarlegan kipp frá því að mbl.is bauð upp á blogg í tengslum við fréttirnar hjá sér og margir eiga þar mjög góðar síður og loksins virðist umræðan um þjóðmál geta farið fram á vefnum án þess að Egill Helga eða Össur þurfi að skrifa um eitthvað.
Ekki ætla ég að hengja mig aftan í Moggann til þess að ég komi mínum hugmyndum á framfæri, nei bandarísk stórfyrirtæki skal það vera!
--
Ingibjörg Sólrún benti á flís í auga Samfylkingarinnar í ræðu um helgina, auk þess sem að hún sýndi og sannaði að öflugasta stjórnmálastarf landsins fer fram í flokknum. Starfsmenn Timburverksmiðju ríksins voru ekki lengi að hefja hróp og köll um að Samfylkingin væri með flís, en gleymdu að líta sér nær og sjá bjálkana sem þvers og kruss liggja gegnum þau öll. Hæst glumdi samt í gömlu tunnunum sem notaðar voru til að brenna njósnaskjöl frá Sjálfstæðisflokknum, en bergmálið úr tómum sölum Framsóknar var síst minna. Það eru fimm mánuðir til stefnu, það er kominn tími til að við tökum á þessu Íhaldsfuskum. Sameinuð stöndum við sundruð föllum við!
-
Ég var svo að lesa það áðan að Whole Foods í Bandaríkjunum væru hætt að markaðsetja íslenska matvöru vegna hvalveiðibröltsins. Flott hjá ríkisstjórninni, skemma það sem íslensk fyrirtæki eru að vinna að, með því að drepa óætar skepnur.

Lalli

ég ætlaði að blogga um bólu!

2006-11-30T10:39:00.000Z

Ég kláraði "vinnutörn" í skólanum á mánudagskvöldið, síðastliðnar fjórar vikur hafa verið frekar erfiðar þar sem ég skilaði af mér verkefnum, ritgerðum og hélt fyrirlestra í bunum (má maður safna bunum!?). Ég vildi ekki byrja of snemma á svoleiðis hlutum á þessari önn, en heldur ekki vera að því í kringum prófin sem eru í Janúar, svo að þetta var allt á sama tíma, en gekk samt upp... vona ég.
Ég er kominn með allskonar hugmyndir í kollinn eftir þessa törn, sem að þýðir að núna "þarf" ég að skoða það sem mér datt í hug á meðan ég skrifaði þessi verkefni. Það sem mér datt í hug voru m.a. lýðræðisbyltingar, frjálsfélagasamtök, gegnsæji hjá Esb og að endalokum fullkomlega sanngjarn heimur. Eitthvað nýtt? það efast ég um, en það er hollt að hafa eitthvað að hugsa um og vinna að. Hví ekki sanngjarnari heimur? - Tja, fyrst maður má safna bunum þá hlýtur að vera leyfilegt að láta sig dreyma.
--
Kanski verður aldrei hægt að snúa heiminum frá heimsku og græðgi, mér finnst t.d. hryllilegt að hugsa sér að fólk hafi það í sér að þiggja 20. milljónir í mánaðarlaun og ganga með eyrnalokka sem kosta 10 milljónir. Það deyja börn vegna þess að þau fá ekki hreint vatn. HREINT VATN!
Svo gefa svona millar kanski 500.000. krónur í söfnun og láta taka mynd af sér brosandi góðmennsku colgatebrosi. Stundum þegar að fólk eins og ég núna, skammast yfir þessu, þá er það sagt öfundsjúkt, fyrir mér er þetta ekki öfundsýki, ég hef það ágætt. Þeir sem að fá 500.000 á mánuði og eiga það skilið vegna dugnaðar, menntunar, hæfileika eða hvað annað sem telur, það er ekki hvorki vandamálið né hættulegt. Því að það er heimskulega mikill munur á svona velstæðum einstaklingi og siðblindufólki sem tekur margar milljónir fyrir að vinna vinnuna sína, sem á sínar eigin skútur og einkaþotur til að færa sig á milli hallanna sinni og mælir lífshamingju sína í hagvexti.
Við eigum ekki að vera feimin við að segja það að þetta sé rangt.
Skelfingaröfund er þetta í mér!
-
Annað, ef að svo færi núna að kreppa kæmi, eins og svo oft áður hefur gerst og sagan segir okkur að líklega komi aftur. Hvernig fer þá fyrir okkur? Hvernig fer fyrir íslenskum heimilum? Ungu fólk sem að skuldar 200.000 í yfirdrátt?

Ekki nóg með að ég verði að læra stjórnmálafræði og stjórnmálaheimspeki til að komast að því sem ég hugsa heldur verð ég að skilja hagfræði líka.

ég hef ekki tíma fyrir þetta, því að ég fæ bara námslán í nokkur ár...
lalli

Leopold Engleitner

2006-11-23T16:16:00.002Z

Stundum þá finnst mér að ég sé allt að því einfaldur í pólitíksri rétthugsun, rétt skal vera rétt og rangt rangt. Það er auðvitað hættulegt því að ekkert er alveg svart og hvítt, heitt eða kalt og maður á hvorki að trúa öllu né engu sem maður sér og heyrir.
Það kom t.d. upp umræða hérna í Austurríki um daginn eftir að þingmaður Freiheitliche Partie Österreichs (Frjálslyndaflokksins) svaraði spurningunni hvort að ríkisstjórn Hitlers hefði gert eitthvað gott játandi, hann útrýmdi atvinnuleysi árið 1933 á erfiðustu krepputímunum. Afhverju gerði hann það? Ég veit það ekki sagði þingmaðurinn, ég var ekki fæddur þá. Ef til vill til að undirbúa stríðið, bryggja vopnaverksmiðjur og vegi sem að nýttust því að skapa Þjóðverjum "Lebensraum" í austri, sagði fréttamaðurinn og fékk ekkert svar...

Í skólanum í dag sat 101 árs gamall Austurríkismaður, Leopold Engleitner að nafni, í hjólastól fyrir framan 200 háskólanema og með aðstoð ævisöguritarans síns sagði frá ævi sinni í máli og myndum. Hann hitti Franz Josef keisara árið 1914, en sagði hann hafa verið slæman einvald en ágætan veiðimann. Leopold var fátækur í æsku og heima hjá honum var varla til brauð en keisarinn var með gullmedalíur í jakkanum sínum þegar hann heilsaði krökkunum. Eftir fyrri heimstyrjöldina fékk hann Spænskuveikina og var vart hugað líf en hann þraukaði. Árið 1932 gerðist hann Votti Jehóva og fyrir það var honum mismunað um árabil og að lokum var hann sendur í fangabúðir Nasista t.d. KZ Buchenwald og KZ Ravensbrück. Núna er hann elsti eftirlifandi fangi þeirra búða og líklega allra hinna líka. Hérna er hægt að lesa söguna hans.
Ótrúlegt svona fólk sem stendur á sínu, neitar að láta kúga sig. Hann neitaði að skrifa undir skjal þar sem hann gæfi upp trúnna sína. Einfaldur bóndi frá Austurríki sem trúði ekki á stríð og morð.

Ég bara varð að skrifa eitthvað um þennan mann á bloggið mitt, þó svo að hann eigi meira skilið en þessi fátæklegu orð. Hann vill ekki láta líta á sig sem hetju, heldur vill hann að fólk sjái að það sé hægt að standa á sínu þó maður sé einn og lítill, þess vegna ferðast hann um Austurríki og raunar heiminn t.d. þvert yfir Bandaríkin í Maí og segir frá ævi sinni. Hann vildi hitta Arnold Schwarzenegger í Californinu en ríkistjórninn komst ekki svo hann sagði: "I'll be back!" og brosti. Hress gamall karl.

Lalli litli

think globally

2006-11-22T09:13:00.000Z

Í gær var frétt á Vísi að á laugardaginn væri alþjóðlegur "ekki kaupa neitt dagur", gott og blessað og hvað um það, ég kíkti inn á tengil frá þessum samtökum þar voru m.a. gervi-auglýsingar frá ýmsum stórfyrirtækjum. T.d. Esso, Nike og fleirum. klikkið á þær til að geta lesið smá letrið
--
Ég hef svo sem ekkert fyrir mér þessu, ég sá þetta og þótti áhugavert. Stundum þegar við hugsum um svona mál þá detta okkur alltaf í hug svo greinilegir og stórir hlutir en við gleymum þessum smáu. Eins og með hluta af umhverfismálum, ef við á Íslandi sem miðað við umræðuna þykjumst allt að því umhverfisvæn myndum vera það í verki. Til dæmis varðandi litla hluti: labba út í búð, nota innkaupapoka aftur og aftur eða bara bakpoka, flokka sorp, kaupa mat sem er lífrænn og e.t.v. í endurunnum umbúðum sem við settum svo aftur í endurvinnslu o.s.frv. þá myndi margt breytast hjá okkur. Við myndum eitt og eitt ekki umbreyta heiminum með byltingu en á endanum ætti umbreyting sér stað. Ef að hvert og eitt okkar breytir sinni hugsun, þá þýðir það að sjálfsögðu það að þeir sem að vinna í eða reka fyrirtæki og stofnanir gera það líka því þau eru bara venjuleg eins og við. Kanski á ég einhvern tíman eftir að vinna í fyrirtæki eða stofnun, svo að ég ætla núna að breyta minni hugsun og passa allt þetta smá sem ég geri, því margt smátt...

kv.

lalli ljóstillífandi rauðgrænþörungur

lhá

2006-11-18T14:50:00.000Z

Það hefur verið og verður nóg að gera í skólanum, sem er hið besta mál, ég er duglegastur að læra þegar að ég þarf að gera eitthvað. Þess á milli á ég það til að detta niður í smá leti, þessvegna hef ég óbeit á tilgangslausum fríum sem slíta í sundum þann tíma sem ég vil nota til að læra. Ég er þannig skilyrtur að ég má oft ekki við svoleiðis truflunum. Eftirhádegi á mánudaginn á ég að skila ca. 2-3 blaðsíðna "ritgerð" um alþjóðlega aðlila sem hafa komið að málum Eystrasaltslandanna frá 1989. Mér finnst það áhugavert og bísna spennandi. Svo heldur skólinn áfram og ekkert frí svo að ég næ að halda mínu striki. Ein af greinum sem að ég las í dag til að kynna mér umbreitingarnar sem hafa átt sér stað, fjallaði örlítið um hvort þjóðríki séu nauðsynleg á 21.öldinni. Mér þykja þessar pælingar vera áhuga verðar og ætla að kynna mér þær frekar. Er skynsamlegt og nauðsynlegt að líta á sig sem einstakling frá sérstöku landi? Þetta ætla ég að skoða.
--
Jólamarkaðurinn hjá ráðhúsinu í Vín opnar í dag, Bürgermeister Häupl kveikir á trénu klukkan hálf sex. Dr. Häupl er eins mikill Bürgermeister og þeir geta orðið, með bumbu, yfirvaraskegg. Við Eyrún ætlum að skella okkur þangað, enda finnst mér að Häupl eigi alfarið að stjórna því hvenær jólaundirbúningur má hefjast og það er best að byrja hann með því að slappa af á fallegum stað í Vín með Glühwein í bolla.
-
Skrítið hvað það þarf stundum stóra viðburði til þess að hreyfa við fólk, maðurinn bíður og bíður þar til hann verður að taka stökk áfram til að detta ekki. Hlýnun jarðar er dæmi um þetta, ekkert hefur verið gert fyrr en allt í einu þarf að gera eitthvað í einu stökki. Við vanrækjum umhverfið og okkur sjálf þar til við sjáum að það gengur ekki lengur og tökum stökk. Ef samfélagið okkar og við sjálf væri í raun og veru skipulög væri þetta vandamál ekki til staðar.

ciao,
lalli

90.000€

2006-11-12T11:25:00.000Z

Við Eyrún förum stundum í labbitúra, stundum í fallegum görðum, stundum í hverfinu okkar og stundum í miðbænum þar sem við skoðum í búðir og búðarglugga. Á Kohlmarkt eru fínustu búðirnar í Vínarborg s.s. Armani, Gucci, Chanel þar getur ríkt fólk keypt sér föt við hæfi. Í þessari götu eru líka fínar skartgripabúðir sem hæfa vel fína fólkinu eins og Tiffany's og Carter, þar eru verðmiðarnir sérstaklega stílaðir á mold-skíta-ríka. Þegar við löbbuðum í gegnum Kohlmarkt um daginn litum við í gluggann hjá Carter, verðmiðinn á einum eyrnalokkunum skar sig úr, litlar 90.000€, er ekki í lagi heima hjá fólki? Ætli sá eða öllu heldur sú, sem að gengur með gullglingur fyrir næstum 10 milljónir hangandi í eyrunum á sér hafi enga samvisku gagnvart umheiminum? Það væri hægt að finna fínt glansandi og glitrandi dót fyrir 25€ eða jafnvel 250€ eða hjá þeim eiga mikla peninga 2500€.
Ef ég myndi hitta svona manneskju myndi ég líklega segja við hana "stansaðu! Skammastu þín og snáfðu burt!" en það myndi líklegast ekki breyta neinu því sumu fólk er held ég ekki við bjargandi.

argandi gargandi,
lalli

n 1 x

2006-11-03T16:16:00.000Z

Ég er í býsna áhugaverðum áfanga á föstudögum, Grunnkúrs í Alþjóðastjórnmálafræði þar sem aðallega er horft til átaka sem blossað hafa upp í fyrrum Sovétríkjum, Transformationsländer. Fyrstu tímarnir hafa mest megnis farið í að tala um þau hugtök sem tengjast þessu svæði og aðra theoríu en í dag kom til okkar kona frá samtökum sem kallast International Labour Organization, ILO, í Rússlandi. Það var margt áhugavert sem hún benti okkur á varðandi Mið-Asíu og Kákasus löndin, land eins og Kasakstan t.d. sem á vesturlöndum er ekki talaðum nema minnst sé á Borat á undan, er 2,717.300 km2 og þar búa samt bara 15 milljónir manna meðan að Frakkland er 543.965 km2 og þar búa 60 milljónir.

Þetta var auðvitað ekki aðalatriðið, en pælið því í stærðinni og hvað veit venjulegur maður um landið? Ekkert. Hvað veit maður um Tajikistan? Ekkert. Það eina sem fréttist frá Turkmenistan er að Saparmurad Niyasov, öðru nafni Turkmen Basi, stýrir öllu þar með alræðisbrölti. Í þessum löndum eru Non Govermental samtök bönnuð, það að vera meðlimur Amnesty er lífshættulegt og Evrópubúum er alveg sama um þetta svæði. Það er varla hægt að kenna olíunni um það því að t.d. eru olíulindir í Kazakstan og Turkmenistan, peningunum frá þeim er svo vandlega ekki deilt á meðal ríkisborgaranna. Ekki vantar Islamista til að berjast við því þeir liggja og fela sig á landamærum Kasakstan, Úsbekistan og Tajikistan. Mannréttindi eru brotin á íbúum þessara landa daglega og þau eiga meira sameiginlegt með Evrópu heldur en Asíu þó svo að þessi heimshluti kallist Mið-Asía. Staða barna í þessum heimshluta er efni í annan svona pistil, en hún er vægast sagt ömurleg.

Í Kákasuslöndunum virðast svo deilur milli Armena og Azerbaijana engan enda ætla að taka og Georgíumenn hafa þurft að þola eins og öll hin löndin á þessu svæði ótrúlegan yfirgang frá Rússum allt frá falli Sovétríkjanna. Moskvustjórnin heldur þessu svæði í erfiðri stöðu eins og dæmin sanna; þegar að -30°c frost var í Gegoríu í fyrra vetur skrúfuðu þeir fyrir gasið. En samt er Moskvustjórnin sú eina sem að fær einhverja athygli frá öðrum ríkjum heimsins.

Hvað gera Evrópuþjóðir? Þær líta ekki á þessa stöðu sem sitt vandamál, heldur draga línuna við Úkraínu og reyna að hjálpa íbúum Hvíta-Rússlands sem býr við alræðiðstjórn.

Það er hræsni af okkur að fordæma mannréttindabrot og berjast gegn fátækt hér og þar, svona eins og okkur hentar til að friða sálartetrið, en horfa svo framhjá hinum hlutunum. Einræðis- og harðræðisstjórnir eiga allar að fá skömm, en svo þarf líka að styðja fólkið til að brjótast úr ömurleikanum og til mannsæmandi lífs.
-

En núna þarf ég að stuðla að eigin heilsu, bæði líkamlegri og andlegri með því að kyssa konuna mína, elda mat og drekka bjór með íslenskum öðlingum.

kv.
Lalli

p.s. hvað þýðir titillinn?

brunavarðapistill

2006-10-29T16:41:00.000Z

Upp og niður sigann í húsinu okkar hafa í dag hlaupið fullklæddir brunaverðir, það flokkast líklegast með óþægilegri heimsóknum sem maður getur fengið. Þeir létu okkur samt ekki vita hvað væri að gerast, svo að við ákváðum að kíkja út og athuga hvort við kæmust að því hvað væri að. Þá var búið að loka stóru götunni sem að okkar gata liggur út frá og lögreglu- og brunaliðsbílar með blikkandi ljós voru út um allt, í rauninni stóðum við í miðju öryggissvæðinu sem afmarkað var með bílum og borðum, svo töltum við út fyrir það. Það virtist ekkert sérstakt vera að og þegar ég spurði einn slökkviliðsmanninn hvað væri að sagði hann að vinnupallurinn utan á húsinu var laus og það þyrfti að festa hann betur. Það var hvasst og því hætta á því að pallurinn myndi hrynja.
-
Brunaliðsmenn í Frakklandi eru búnir að slökkva eld í nokkrum bílum eftir ólæti. Einhvern veginn virðist mér eins og fjölmiðlar heimsins býði eftir því að aftur sjóði uppúr, þeir byrjuðu fyrir löngu að segja að líklega yrðu aftur ólæti líkt og í fyrra. Í rauninni virðast þeir bara hafa beðið eftir því að eitthvað fréttnæmt gerðist og svo fara þeir í fýlu ef ekkert gerist. Svona eins og þegar allir fjölmiðlar á Íslandi mættu á Keflavíkurflugvöll í sumar og biðu eftir því að logandi þota frá BA kæmi til lendingar, en svo voru þeir bara hundfúlir þegar það var enginn eldur.
En það væri nú svo sem ekki skrítið ef eitthvað gerðist því aðstæður þessa fólks í París hafa ekkert batnað frá fyrir ári, samkvæmt því sem ég las í Suddeutsche Zeitung er það alveg eins. Enginn hefur reynt að gera neitt til að aðstoða þessa íbúa Frakklands sem að búa við bág kjör. Við heima á Íslandi ættum að læra af hinum fjölmörgu misstökum Evrópubúa og hugsa vel um það fólk sem setst að hjá okkur með því t.d. að veita þeim góða íslenskukennslu. Það er nefnilega ekki sjálfsagt mál að aðlögun að nýja samfélagi gangi fyrir sig án þess að samfélagið taki á réttan hátt við þeim sem koma.
-
Sjálfur er ég í aðlögun, eins og barn á leikskóla og gengur vel þó að ég hugsi stundum til þess hvort að mamma og pabbi komi ekki bráðum.

Lalli

Smjörklípusteiktur hvalur

2006-10-20T15:24:00.000Z

Ef það hefur farið framhjá einhverjum þá kenndi Davíð Oddsson Íslendingum smjörklípu aðferðina í viðtali í Kastljósinu fyrir ekki alls löngu. Vafðist það fyrir ykkur hvernig þessi aðferð virkar í Praxis? Allt er um það bil að verða brjálað vegna leyniþjónustu Sjálfstæðisflokksins og þá er skellt inn hvalveiðimálinu. Tilgangslaust mál sem breytir engu nema því að Sjallarnir fá frið og tíma til að brenna skjöl í olíutunnum.
Hvalveiðar sitja undarlega djúpt í sálum Íslendinga, ég sá t.d. skoðanakönnun þar sem mikill meirihluti Íslendinga taldi að hvalveiðarnar myndu ekki skaða ímynd Íslands. Meirihluti Íslendinga virðist ekki fatta að það er ekki bara hryðjuverkamaðurinn Paul Watson sem er á móti hvalveiðum, RÍKISSTJÓRNIR Breta, Ástrala, Bandaríkjanna og Evrópusambandið hafa mótmælt okkur. Ekki það að við megum ekki fara geng því sem þeim er þóknanlegt, þá hefur þetta að sjálfsögðu áhrif á ímynd okkar. Þetta eru ekki bara Greenpeace (sem eru risa-NoGo-samtök) eða eitthvað þessháttar, þetta eru þjóðkjörnir fulltrúar annara landa. Auðvitað eru þeirra rök ekki fullkomin, frekar en okkar. Þetta skemmir bara fyrir því að hlustað sé á okkur, þ.e. að við hlustum ekki á aðra. Það er ekki sjálfsagður hlutur að hlustað sé á Ísland á alþjóðavettvangi og það bætir ekki fyrir þegar við látum jafn lítið mál og hvalveiðar trufla það. Hvalveiðar í vísindatilgangi voru ágætur millivegur í skrítnum heimi. Sú aðferð hefur undanfarið veitt okkur ágætt magn af hrefnukjöti, ég veit ekki til þess að það hafi verið skortur á því.
En aftur að smjörklípunni, sem betur fer eru hvalir sjávardýr og innihalda mikla fitu svo að smá smjöklípa rennur bara af þeim og við getum haldið áfram að rannsaka leyniþjónustumálið.

góðar stundir,
Lalli litli

þar er gleði birta ylur

2006-10-17T08:09:00.000Z

Það er farið að kólna hérna í Vínarborg, kanski kominn tími til og það er reyndar ekkert algjörlega slæmt, þegar haustið kemur færist smá ró yfir alla, hún varir fram að jólun og tekur svo aftur við í febrúar. Í gær kom maður frá Vaillant að kíkja á gashitarann okkar, hitarinn í íbúðinni vinnur ekki stöðug heldur hefur átt það til að rjúka upp í þrýstingi þegar við þurfum að hita vel. En vonandi virkaði hreinsunin hjá honum. Svo kom pípari í morgun að kíkja ofnan, en þeir hitna ekki algjörlega, vegna þess að einhver sem bjó hér áður hefur brotið litla tappann á ofninum sem að notaður er hleypa lofti út. En þessi pípari ætlaði að skipta um þessa tappa, vonandi virkar þetta bara og íbúðin okkar nær að hitna almennilega. En ef þetta virkar ekki, verðum við annaðhvort að flytja inn gám af lopapeysum eða vinna í lottói og kaupa nýjann hitara.
-
Á morgun fáum við flygilinn okkar, við leituðum lengi uns fundum einn flygil. Það er varla hægt að bjóða Eyrúnu uppá það að vera í tónlistarnámi en hafa ekki hljóðfæri hérna heima og í Vínarborg eru flyglar til í nokkrum eintökum. Í næsta húsi við okkur fundum við píanósmið sem að seldi okkur flygil í toppstandi, stilltan og fluttan í íbúðina okkar fyrir sanngjarnt verð.
-
Stundum birtast greinar eftir mig á uja .is
-
En núna er kominn tími til að halda áfram að læra.

lalli kveður, á bleikum náttkjól!

heimurinn l nnirumieh

2006-10-12T20:41:00.000Z

Ég er ekki viss, en ég hef sterkan grun um að heimurinn snúi eitthvað undarlega þessa dagana. Á Íslandi er ólögleg leyniþjónusta og hún hefur að öllum líkindum njósnaðu um t.d. fyrrum Utanríkisráðherra landsins. Það þykir reyndar ekki merkileg frétt, því frekar er maðurinn spurður að því af hverju hann hafi ekki sagt einhverjum, t.d. þeim sem líklega njósnuðu um hann frá því. Jón Baldvin sagði líka frá því að njósnakerfi Bandaríkjamanna næðu til sín upplýsingum frá allri Evrópu með gervihnöttum. Maður sem var sendi- og utanríkisráðherra hlýtur að hafa eitthvað fyrir sér í þessum efnum. Ekki nema hann sé orðinn nógu bilaður til að fara í Seðlabankann.
Svo eru Bandaríkjamenn og Kínverjar sammála. Hverjum hefði dottið það í hug? Nema út af því atriði að önnur þjóð er að troða sér inn í kjarnorkuvopnaklíkuna þeirra. Þjóð sem reyndar hefur átt kjarnorkuvopn frá 2003, miðað við fyrri yfirlýsingar stjórvelda eins og USA og Íslands.
Það sem að sannfærir mig aftur á móti að þetta eru bara tvær tilviljanir er það, að þegar enskusnillingurinn Valgerður Sverrisdóttir og Norðmaðurinn Geir Hilmar Haarde mættu til fundar við Condi Rice þá bauð hún ráðherra Írlands velkomna! Er þetta ekki fólkið sem að náði að "bjarga varnarsamningum" með því að samþykkja tilboðið: Við förum og þið takið upp skítinn okkar, ok? -- Betra hefði verið að reka ósómalýðinn af landi með skömm! -- Eða eigum við kanski að taka til eftir þá á fleiri stöðum, næg yrðu þá verkefnin, blóðslóðin liggur þvers og kruss um höttinn.

lifið í friði
surál / lárus

Samyrkjuþrotabú

2006-10-09T19:59:00.000Z

Ég fór í fyrsta tímann á þessari önn í dag, ProSeminar Grundkurs Politischen Theorien, hann er alls ekki jafn flókinn og nafnið gefur til kynna. Það er að sjaldnast með nokkuð hérna í Austurríki, hlutirnir eru bara gerðir töff með því lengja og flækja nafnið. Reynar er ég bara að bulla, ég á það til stundum kemur það mér í klandur og ég segi upphátt hluti sem aðeins "vinnustaðagrínarinn" eða "Trúðurinn sem hafði ekkert að segja" úr fóstbræðrum myndu segja. Þá skammast ég mín og hugsa ég er ekki ég ég er annar það segi ég þér.
-
Sjálfstæðisflokkurinn hefur rekið leyniþjónustu í fjölmörg ár og njósnaði um hættulega vinstri menn. Líklegast hefur Bjarni Ben, pabbi Björns Bjarnasonar, þá verið ábyrgur njósnum um Einar Olgeirsson, ekki nóg með það að þeir hafi unnið á sama vinnustað, þá voru börnin þeirra Björn og Sólveig dóttir Einars leikfélagar. Ó þú litla Ísland. Einar er vafalaust einn þeirra stórhættulegu kommúnista sem höfðu mikil tengsl við Ráðstjórnarríkin, þó svo að hann hafi ekki verið einn þeirra sem hafi fengið þjálfun í vopnaburði. Einhver þau mestu illvirki sem hann framdi voru líklegast baráttufundir með verkamönnum og skrif um málefni jafnaðarstefnu. Meðal þeirra sem lærðu vopnaburð í Rússlandi var söguhetja bókarinnar Yfir Eborfljótið, hann fór til Spárnar til að berjast gegn Franco, þvílíkt og annað eins illmenni hlýtur sá maður að hafa verið, að vera til búinn til þess að fórna lífi sínu svo fasismi nái ekki fótfestu á Spáni.
Þegar um þetta mál hefur verið fjallað af öðrum fjölmiðlum en La-Rusl þá hafa menn bent á það að í landinu hafi verið hópur kommúnista sem þurft hafi að njósna um. Hvergi er minnst á það að peningum hafi verið skotið undan til þess að reka pólitískt apparat sem fylgdist með ákveðnum hópi Íslendinga.
-
Davíð og Halldór rufu 85 ára gamla yfirlýsingu Íslendinga um ævarandi hlutleysi. Sjálfstæðisflokkurinn hefur um ára bil njósnað um pólitíska andstæðinga sína. Er ekki tími til kominn að breyta um stjórnarhætti á Íslandi. Ég hef heyrt um mjög sniðuga hugmynd hérna á meginlandinu hún kallast lýðræði. Mikið ósköp væri það gott ef Ísland myndi hér eftir þróast eftir fyrirmynd þeirrar hugmyndar.

kveðja,
lalli

1 vika búin

2006-10-06T11:12:00.000Z

Fyrsta vikan mín í fullu námi í Háskólanum í Vínarborg er liðin og í hausnum á mér liggur enginn vafi á því að ég stóð mig best allra í þessari viku og ég efast ekki um það að svo verði áfram.
-
Aldrei þessu vant hef ég verið að velta stjórnmálum fyrir mér, hérna í Austurríki og heima í Klakanum. Austurríkismenn eru núna að bíða eftir því að stjórnmálamenn frá Sósíaldemókrötum og Þjóðarflokknum komi sér saman um að starfa saman í stjórn, ef það gengur ekki þarf líklegast að kjósa aftur, því enginn myndi sætta sig við að fá yfir sig stjórn Þjóðarflokksins og rasistaflokkan tveggja sem eru viðurstyggileg samtök sem draga yfir sóðaleg málefnin sín lök í mildari litum, en hver sá sem sjá vill sér Rasismann og hatrið sem þeir boða.
Heima er ástandið skárra, en samt finnst mér sem einhver ólga sé undirniðri. Sumir í mínum flokki gætu farið að verða pirraðir ef ekki fer að ganga betur í að draga á Íhaldið, sem aftur á móti er orðið þreytt á því að við séum alltaf að skjóta á þá þegar upp kemur um svik þeirra og pretti í gegnum tíðina. Framsókn þarf að fá minnst þrjár auglýsingastofur til að fegra sína ímynd.

Ég er kátur en samt er svartsýni undirliggjandi hjá mér. Ætli það sé ekki bara veturinn sem er á leiðinni. Íslendingar eru snjallir að hafa kosningar á vorin, þá eru allir hressir.

Friður með yður
Surál da la-rusl ritstjóri.

nýjir tímar

2006-09-29T22:03:00.000Z

Hvað á þetta eiginlega að þýða Lárus, að bregaðst hinum fjölmörgu dyggu lesendum La Rusl með þessum hætti?!?
-
Ég veit ég veit, þetta var illa gert af mér, ég hefði átt að blogga í allt sumar, það var, og er væntanlega mjög gott netsamband í Klettaborg og Eyrarlandsvegi. Jæja, það þýðir ekki að kvarta yfir því núna, bara líta björtum augum fram á veginn og skrifa bloggfærslur af miklum móð.
-
Ef einhverjir eru forvitnir um það hvað ég gerði í sumar, þá bendi ég á bloggið hennar Eyrúnar.
Henni tókst að koma heilu sumri fyrir í bloggfærslu sem tók aðeins hluta af seinni hálfleik Barca og Bremen að skrifa.
-
Utanríkisráðherra Íslendinga er, fyrir utan það að vera gjörsamlega vanhæf í það ráðherra embætti sem og önnur, með enskukunnáttu sem að er ekki.. tja lífveru? neh, íslending? neh, aha ekki einu sinni Framsóknarmanni bjóðandi. Heyrðuð þið bort úr ræðunni hennar á þingi S.Þ. uss. -
Lífið í Vínarborg er ljúft eins og alltaf og á næstunni skal ég taka á því í blogginu, ég veit þið saknið mín.. pís

la-rusl lalli

sumar frí frí sumar frí frí sumar -

2006-07-24T19:10:00.000Z

Núna er eitthvað liðið af sumri og lítið verið um færslur hjá La Rusl, ekki vegna þess að ég hafi ekkert gert heldur vegna þess að ég nenni ekki að hanga yfir tölvunni og þvælast um veraldarvefinn.
Síðustu helgi fór ég með mömmu og pabba í útilegu, Eyrún komst ekki þar sem hún var að vinna alla helgina (á meðan ég tók því rólega í tjaldferð). Reyndar tók ég því ekkert svo rólega því við tókum gönguskóna okkar með og fórum í 8 klukkustunda labb frá sundlauginni í Reykjahlíð fram hjá Reykjahlíðarfjalli, yfir hraunið í áttina að Leirhnjúk og Kröflustöð og síðan yfir Þríhyrning og niður hjá Námaskarði og til baka að Reykjahlíð. Þessi fjallganga var um það bil 30 kílómetra löng og við höfðum mjög gott af henni, það var kanski síst hún Lukka sem þurfti að fara svona langt því hún var dauðþreytt daginn eftir og neitaði að labba um Lakagíga þegar við skoðum þá daginn eftir. Eftir gönguna grilluðum við okkur lambakjöt sem við krydduðum með blóðbergi og pipar.

Næstu helgi förum við aftur í útilegu, áfangastaðurinn hefur ekki verið ákveðinn en það er pottþétt að gönguskórnir koma með aftur og Eyrún verður í fríi svo ferðin verður ennþá betri. Hver veit nema veiðistangir fái líka að fara með, ég á nefnilega eftir að vígja nýju flugustöngina mína.

Svo verða Sigurrós og Amina að spila í Ásbyrgi um versló, svo það er aldrei að vita hvort við skellum okkur.

friður,
lalli

heim á morgun

2006-07-05T13:30:00.000Z

Núna er þetta fyrsta ár okkar Eyrúnar hérna úti að verða liðið, við leggjum af stað frá Kupkagasse um klukkan 05 í fyrramálið og lendum á Akureyri klukkan 22 um kvöldið. Það er allt um það bil að verða orðið klappað og klárt, töskurnar dansa á yfirvigtarlínunni eins og aðrir vesturlandabúar og spurning hvort okkur verði refsað fyrir það. Undarlegt að maður hafi ekki leyfi til að taka meira með sér þegar maður flytur, núna verðum við á svipuðu flandri næstu árin og það er frekar leiðinlegt að þurfa alltaf að passa sig á því að taka ekki of mikið pláss, meðan að fólk sem kemur úr tveggja vikna ferð fær sama pláss. En jæja, þetta kennir manni ef laust að maður ætti bara að vera sjálfum sér nægur, með góðum félagskap.

Það er hálfleiðinlegt að fara, en það verðum mjög frábært að koma heim og hitta alla, svo að mjög vinnur hálf! Ég er bara orðinn töluvert spenntur fyrir því að komast til sveita-þorpa-borgar-bæjarins Akureyrar.

hressandi purmp!
lalli

ég hlæ bara

2006-06-30T22:22:00.000Z

Í gær klukkan 19:35 kláraði ég síðasta prófið mitt á þessari önn í UniWien, það var ótrúlega ljúft og ég held að ég hafi barasta staðið mig ágætlega, fínt flott gott, þ.e.a.s. ef að kennararnir taka inn í myndina að ég skrifa þýsku á minn hátt.
-
Við fórum svo út að borða á Kulin sem er mjög ágætur mexikóskurstaður hérna ekki svo langt frá okkur. Þar fengum við okkur góðan mat og Caipirinha, svo fórum við og fengum okkur 3 bjóra á kaffihúsi.
-
Ísraelsmenn eru aldeilis að hjálpa til við það að gera heiminn að friðvænlegri stað þessa dagana, bölvaðir svínamenn að koma svona fram við fólk. "palestina und irak, 1000 leute jeden tag" "israel usa menschenrechte hahaha"
-
lifið heil og sæl og ef þið eruð í Vín þá er party í kupkagasse á morun..
pís át
lalli

war is not politiks

2006-06-22T08:54:00.000Z

Bush kom og fór, greyið karlinn þurfti að stytta dvöl sína í Vín úr 3 dögum í 20 klst. vegna þess að hann var ekkert velkominn. Mótmælagangan var stór og fjölbreytt, þarna var fjölskyldufólk, fólk eins og við Eyrún og Jón, svo voru auðvitað pönkarar Vínarborgar á svæðinu, fjölmargir töffarar og a.m.k. fjórir strípalingar sem að marseruðu með okkur á sprellalingunum og með berann rassinn. Margir voru með fána og borða þar sem rituð voru slagorð gegn Bush & co, gegn heimsvalda- og nýlendustefnu, gegn mannréttindabrotum, friðarslagorð voru líka vinsæl og svo sáum við eina konu með bandarískt vegabréf á spjaldi þar sem stóð "þetta ætti að standa fyrir eitthvað betra". Leiðinlegast þótti mér að nokkrir bílar fóru með göngunni og sumir þeirra spiluðu tónlist alveg rosalega hátt "harðkjarna danstónlist", en það vil ég kalla þetta, ótrúlega hávaðasama og leiðinlega tónlist, þeir hefðu ekkert þurft að vera þarna. Margir sem að þarna voru mótmæltu eflaust öllu sem að þeir gátu mótmælt, svo voru auðvitað einhverjir sem að þurftu að þamba bjór alla gönguna sem að nýttu svo tækifærið við Hofburg við að gríta dósunum í vígbúna lögrelgumenn sem fylgdust með göngunni. En flestir voru þarna bara til þess að biðja um frið í þessum harða heimi. Við löbbuðum tvisvar nálægt hópum af múslimum sem að voru með Palestínskafánann og voru með skilti sem stóð á "hendurnar burt frá íran". Reyndar sáum við líka bandarísk hjón fylgjast með göngunni og ég heyrði konuna segja þegar hún tók mynd af vígalögrelgumönnunum "ná æ ken sjó þem bekk hóm, þat jú ver prípered". Einhverjir aðrið heyrðu líka í henni og buðu þeim hjónum að taka þátt í göngunni, ekki líkaði karlinum það sérstaklega og sagði "æ dónt marts in þiss pöþetik þeing".
En hvað sem því nú líður þá vorum við ánægð með okkar marseringu í hópi góðs fólks sem að vill ekki meira af stríði, blóðsúthellingum og örðum ófögnuði sem að nokkrum "stjórnmálamönnum" fylgir og við vorum þreytt og sveitt þegar við komum heim, en umfram allt ánægð með vel nýttan tíma.

lalli

velkominn?

2006-06-19T09:54:00.000Z

Það er ekki landsins forni fjandi sem að stefnir til Vínar núna á morgun, heldur heimsins mesti vandi sem er líklegur til borgarinnar. George W. Bush kemur og íbúa Vínarborgar býða nú lokanir á helstu götum, leyniskyttur á þaki Hofburg og einhver hundruð alvopnaðir her- og lögreglumenn. Á miðvikudaginn klukkan 17.00 hafa verið skipulögð mótmæli gegn Bush og hans athöfnum og hugmyndum innan Bandaríkjanna og utan þeirra. Mér sýnast þessi mótmæli vera skipulögð meðal annarrs af kommúnistum og örðum sem oftast væru líklegast vinsta megin við mig, eða nei þegar betur er að gáð eru það minnst 18 samtök sem taka þátt í þessu. En það er nú bara þannig að við verðum að standa saman - Svo ég mæti í það minnsta meðan að ekkert hættulegt er á ferðinni, en um leið og einhverjir fara að vera með læti þá fer ég í burtu, því ofbeldi er aldrei lausnin. Það er algjörlega tilgangslaust að lemja á bílum ókunnugra til að mótmæla morðæði Bush. Enda virðist það ekki vera á dagskránni og var heldur ekki svoleiðis þegar að leiðtogar EU og S-Ameríku hittust hérna um daginn.
Leyniþjónustumenn CIA hafa verið í nokkrar vikur í Vín að undirbúa allt fyrir komu Bush. En það hafa líka aktivistarnir gert og eiga núna heimasíðuna www.bushgohome.at
Ef þið viljið senda Bush kveðju skiljið hana þá eftir í kommentunum hjá mér og ég skal taka hana með mér í mótmælin og rétta honum hana ef ég kemst nægilega nálægt;) - það væri sem án vafa hættulegt.
Við ræddum um þetta 17.júní hátíð Íslendingafélagsins á laugardaginn og eftir að upplýsingarnar um hvar lokanirnar verða og hver áhrifin verða á íbúa Vínar, sagði einn: "Hver vill eiginlega fá svona gest?"
Ég las ævisögu Kennedy einu sinni og hann fór í velheppnaða Evrópureisu, þar sem hús, torg og fleira var nefnt eftir honum. Núna þar líklegast að flytja inn amerísk börn til að veifa fánum fyrir Bush.

ykkar mótmælandi,
Lalli

meinl's kaffespezialitäten

2006-06-12T09:53:00.000Z

Ég hjólaði ekkert smá hratt áðan, það fór bíll framúr mér tvisvar en ég náði honum í bæði skiptin á ljósum og svo var ég langt á undan þegar ég kom að gatnamótunum. Stigið, glímið... Lalli vann!
-
Það sem mér hefur þótt skemmtilegast við byrjun HM er að litlu liðin eru að standa sig mjög vel, eins og Trinidad og Tóbak, Angóla og Fílabeinsströndin og líka bara Paragvæ og Ríka Strönd. Svo er bara að sjá hvort þetta haldi áfram, ég bíst nú varla við því að þau komist langt en það er bara svo skemmtilegt að sjá svona lið standa sig frábærlega, það gerir keppnina að hátíð.
-
Ég man eftir því að hafa fyrir nokkru síðan skrifað um hvernig oft væri talað um að stjórnmálaflokkar þeyttust frá hægri til vinsti eins og kantmenn á flakki. Í dag las ég pistil eftir Þorstein Pálsson þar sem hann sagði eitthvað á þá leið að Samfylkingin væri líklegast á leiðinni leiðinni aftur yfir til vinstri. Mér þykir þetta alveg jafn undarlegt og áður, að flokkar sem eru allir með fastar línur til að vinna eftir, hendist til og frá eftir hentisemi blaðamanna eða í þessu tilfelli frv. forsætisráðherra. Afhverju ætti það að teljast til tíðinda ef að flokkur sem að var stofnaður úr þremur félagshyggjuflokkum nái frá miðju og til vinstri. En jæja öll vitleysan er ekki eins og það er ef til vill eins gott að hún sé það ekki því að þá hefði ég ekkert til þess að "pirra" mig og nördast yfir. Afhverju er ég ekki bara Star wars nörd?

Lalli á hjóli

popp í poka

2006-06-10T20:05:00.000Z

Hún Eyrún mín söng svo undursamlega fallega í gærkvöldi/nótt í Péturskirkjunni hérna í Vín, hún söng aríur úr Gloriu eftir Vivaldi með Stúlknakór Akureyrarkirkju og stóð sig Vá! svo vel. Þær gerðu það líka hinar stelpurnar og undir lokin risu viðstaddir á lappir og hlýddu á Lofsöng okkar Íslendinga og settust svo ekkert niður þegar lófatakið hófst. Kirkjan var þéttsetin og þegar Eyrún söng sá ég nokkra lygna aftur augunum með sælubros, en ég var of montinn til þess að geta leyft mér það:) Brosti bara og horfði á kristilega gullið og marmarann í kringum mig.
-
Blessað boltasparkið byrjað með öllum sínu, það byrjar bara býsna vel. Deutschararnir voru sprækir og núna í fyrri hálfleik hafa Fílabeinsstrendingar skemmt mér þrátt fyrir að vera 0-2 undir. Auðvitað er hægt að minnast á margt slæmt sem fylgir mótinu, ofbeldi, kynþáttahatur og þess háttar, en í dag fylgir þetta manninum verst er með þetta hórerí sem er á mönnum það er viðurstyggð. En seinni hálfleikur hefst vonbráðar...nó diggidí nó dát, pís jó æm át!
larus feiknaóði

Bland

2006-06-06T13:16:00.000Z

Mikið rosalega var gott að fá Hönnu og krakkana í heimsókn, krúttarakrakkarnir sáu um að halda uppi stuðinu í Vínarborg og gerðu það með sóma. Þeim fannst allt skemmtilegt, hvort sem það var að vera á róló eða á listasafni, frábærir gestir. Svo átti mamma afmæli í gær, hún eyddi afmælishelginni sinni í að gera garðinn tilbúinn fyrir sumarið, ég get ekki beðið eftir að eiga góða daga á pallinum í sumar.
-
Ég er ekki frá því að Framsóknarflokkurinn sé eitt undarlegasta stjórnmálafyrirbæri sem þekkist á byggðu bóli, svona fyrir utan rasistaflokka með bláeigða frambjóðendur sem kalla sig "echte Wiener". Svo benda þeir á Finn Ingólfsson sem bjargvætt sinn, ef þeir vilja endalega fá á sig ímynd lítillar og spilltrar valdaklíku þá er hann líkast til rétti maðurinn. Hann fældist frá pólitík vegna þess að þar var fylgst með því sem hann gerði og fór svo fyrir S-hópnum í bankasölubruðlinu, er það ekki einmitt það sem íslensk stjórnmál þurfa, hugsjónasnauðan peningastrák?
-
Ég er búinn að taka eftir kommentum á Samfylkingarsíðunni á Akureyri og það eru greinilega ekki allir sáttir við X-S og X-D bandalag í bæjarstjórn, aftur á móti held ég að það sé besti kosturinn, listi VG var einfaldlega ekki nógu vel mannaður til að vinna með honum, þó að Oddur hafi verið til í slaginn. Ég held að það hafi ekki strandað á Samfylkingunni að mynda meirihluta, VG voru bara ekki til í að gera málamiðlanir, sem er einmitt það sem meirihlutaviðræður snúast um.
-
Nóg um það, það er kalt í Vín en sumarið kemur aftur, svo er farið að styttast í að við komum heim. Ljúfa litla borg, það er nýja Indíánanafnið á Akureyri.

:Lalli

100%

2006-05-28T14:34:00.000Z

Í nótt vakti ég til klukkan 05 og starði á tölvuskjáinn, undarlegt þar sem ég vissi ósköp vel að ekkert myndi breytast en mér fannst samt betra að fara að sofa þegar ég væri orðinn alveg viss. Ég býst fastlega við því að í kjölfar þessara kosninga hitni örlítið í pólitíkinni heima, menn sjá hvað sjá núna hvar tækifæri sín liggja fyrir næsta vor og hvar þeir eru veikastir fyrir. Auðvitað sjá menn þetta þá líka hjá hinum og geta þá eitthvað byrjað að undirbúa sig. Alltaf skemmtilegt að sjá og heyra formenn flokkanna ræða svona mál rétt að loknum kosningum, allir vinna auðvitað og geta bent á hina og sagt að þeir hafi tapað. Svo þegar tveir til þrír eru búnir að því þá tekur næsti við og ætlar nú ekki að vera segja hinum hvernig þeir stóðu sig, "minn flokkur var fínn" o.s.frv. Það síðasta sem ég sá áður en ég lagði mig voru tölur yfir allt land þar sem fylgi flokkana var sett í landsmeðaltal og spáð hvernig þetta væri nú allt. Í þær tölur var ekki hægt að lesa neitt öðruvísi en það sem nýjustu skoðana kannanir segja. Íhaldið stendur í tæpum 40%, X-S í tæpum 30% VG í tæpum 15%, exbé og frjálslyndir undir 10. (allt sirka, því annarst eru þetta 105%) Og löngu látið fólk kýs ekki ennþá á Íslandi. Spurning hvernig næstu skoðana kannanir mæla svo landslagið. Ég er bjartsýnn og held að Samfylkingin eigi nokkuð inni.

Hanna og krakkarnir koma á morgun! Jibbí, það verður svo gaman að fá þau í heimsókn ég er alveg viss um að þau eiga öll eftir að vera ánægð hjá okkur og hafa það gott. Annarrs er hugur Akureyringa hjá áhöfn Akureyrinnar og fjölskyldum, líkast til ein af þeim erfiðustu raunum sem hægt er að leggja á menn og þeir eru hetjur.

lalli

supernörd

2006-05-25T15:44:00.000Z

Það er líklegast satt hjá Ella um daginn að hérna þýðir ekkert fyrir mig að predika um illsku Íhaldsins. Þar sem lesendur mínir eru fullkomlega færir um að átta sig á henni. Ef til vill vegna þess að ég skrifa sjaldnast um annað. Stundum eru bloggin mín ok og hressandi, en aldrei eins og þeir sem blogga best, segja eitthvað fyndið og frumlegt og búa til skemmtilega lista og eru svakalega kúl. Ég veit að ég er ekki svakalega kúl svo ég reyni ekki að vera það á netinu. Stundum reyni ég að vera kúl fyrir Eyrúnu, en það endar oftast í nördisma, þar sem ég sýni henni annað hvort nýtt trix sem ég var að búa til (sem er bara eitthvað bull) eða dansa eins og kjáni við hressandi tónlist. Þegar ég hugsa um það þá minni ég líklegast á karldúfu í tilhuga dansi, fátt hallærislegra. Ég hugsa að dúfur séu þau dýr sem verst fara útúr velmengunar sjúkdómum okkar tíma. Enda þurfa þær ekkert að hreyfa sig og lifa á McDonalds afgöngum og lifa í skítugum miðbæjum. En ég er samt ekki svoleiðis, enda á ég hjól og elda hollan mat á kvöldin.
Lifið heil, og hvað sem þið gerið ekki setja x-við D! Ég mæli sjálfur með S-i
Lárus(l)

bleikar sauðagærur

2006-05-24T09:58:00.000Z

Það er rosalega mikilvægt að maður trúi því að maður geti gert hlutina sem maður ætlar sér. Það er einnig rosalega mikilvægt að maður geri eitthvað í því sem kemur manni á þann stað að hlutirnir séu framkvæmanlegir. Þess á milli er mikilvægt að slappa af. Því næst hugsa um hlutina. Þá kanski skilur maður þá nógu vel til þess að geta framkvæmt hugmyndina.
-
Ég held að Sjálfstæðismenn hafi hlerað símann hjá veðurstofunni og frétt af þessu kuldakasti sem átti að koma rétt fyrir kosningar og þessvegna skellt sér í bleika sauðagæru, svona til að verjast hretinu.
Undarlegt samt hvað þeim virðist þykja eðlilegt að hlera síma hjá fólki sem var með ólíkar skoðanir. Setja það fram eins og það séu rök fyrir pólitískum njósnum að viðkomandi aðilar hafi verið á móti NATO. Það er nú bara ekkert eðlilegra en það í lýðræði að einhverjir séu með aðrar skoðanir, en ekki þykir Íhaldinu það, best að njósana bara um þá. En það eru einmitt svona gaurar sem klæðast bleiklitaðri sauðagæru þessa dagana 0g þeir fara úr henni um leið og kjörstöðum lokar.

lalli

pólitík

2006-05-21T12:35:00.000Z

Er það ekki skrítið hvað Sjálfstæðisflokkurinn er með mikið fylgi í skoðanakönnunum út um allt land? Finnst ykkur það ekki vera undarlegt? - Flokkur sem að setur það fram í stefnuskrám sínum að ekkert sé eðlilegra en að einkavæða skóla, leikskóla, elliheimili, sjúkrahús, ungliðarnir þeirra setja það fram að ekkert sé eðlilegra að sveitarfélögin komi ekki að menningarstarfsemi. Samt tala þeir ekki svona, þeir ræða mest um að hugsa þurfi um gamla fólkið og leikskólabörn, en svo eigi að losa foreldra þeirra undan "skattpíníngu". Hvernig á að hugsa um aldraða og skólafólk ef að við leggjum ekki öll saman í púkk til að reka þær stofnanir sem að eru til þess gerðar? - Þetta er auðvitað ekkert nema hræsni að halda því fram að lausnin á vandamálunum sé "frelsi" til að borga sjálfur fyrir þessi grunnþjónustu! Lausnin felst í því að við hjálpumst að og hugsum um náungann og þar með okkur sjálf. Orðið samfélag felur það nú einu sinni í sér að við erum saman í félagi, sem við viljum gera sem best fyrir alla. Flokkar sem að vilja ekkert frekar en að einkavæða grunnþjónustuna okkar eru ekki að því til að bæta lífið fyrir alla, heldur gefa fáum tækifæri til þess að frá forskot í kapphlaupi þar sem allir eiga að eiga sama rétt.
-
Annarrs fórum við í Tívolí í gær, það var afbragð!

Kveðja Lalli

bara fyrir lúða

2006-05-19T13:31:00.000Z

Í gærkvöldi komu saman í Vínarborg ungir Íslendingar, sem gátu vart beðið eftir að sjá íslenskt spaug sent frá Aþenu í gengum tyrkneska sjónvarpstöð. Allir vita hvernig sjóferðin endaði, frumlegasta skipinu var sökkt af pú-skotum skilninglausra Evrópubúa.
Mér skildist að Silvía Nótt hafi sagt í viðtali eftir keppnina að keppnin væri bara fyrir lúða og þess vegna ættu íslendingar ekki að taka þátt. - Það er nú alveg ýmislegt til í þessu. Reykjavík á víst að vera ein svalasta borg í heimi og ég las það meira að segja síðast í dag í viðtali Der Standard við Hallgrím Helgason og fleiri, að Reykjavík og Ísland væri töff (tremma í hel?). Kanski er það bara málið, við eru töff og misskilin. Eyrún var svo að lesa áðan viðbrögð Íslendinga við þessum heimsögulega atburði, þar komu svör eins og: "Hún sýndi keppninni óvirðingu" og "hverskonar landkynning er þetta eiginlega?" - Hei, þetta er Júróvísjón og það þarf nú varla að sýna söngvakeppninni virðingu og þó að einhverjir hafi misskilið brandarann, þá þurfum við ekkert að skammast okkar. Svo er að mínu mati skárri landkynning að senda grínista, leikara, lífvörð og Siggu Beinteins út í heim að skemmta sér og okkur, heldur en að senda bimbó sem kemur fram á nærfötunum og talar endalaust um hvað allt í heiminum sé frábært.
Við erum bara misskilin og afrekin okkar eru ekki virt af verðleikum hjá frændþjóðum okkar á meginlandinu. Sama hvað við reynum að kaupa mörg misheppnuð fyrirtæki hjá þeim og gera þau góð, sama hvað við sendum góða tónlistarmenn að spila fyrir þá, þá eru þeir bara púaðir niður og gert grín að fötunum þeirra og sama hvað við reynum í alla staði að vera hress, þrátt fyrir að vera öll bullandi þunglynd 9 dimma mánuði á ári. Þá vilja þeir bara ekkert með okkur hafa og tala oftast bara um Víkinga þegar þeir hitta okkur.
Við erum bara öðruvísi lúðar, íslenskir lúðar. Með auðsæranlegt sveitastolt og okkar hrútar og hryssur eru alltaf flottust.

íslárus

hér er næs, ógeðslega næs

2006-05-16T19:37:00.000Z

Laugardagurinn síðast var ljúfur, sem geit. Við vöknuðum snemma og fórum ásamt öðrum Íslendingum í rútuferð á hestabúgarðinn Stefanshof (var það ekki?). Þar sem ungir og gamlir fengu að stíga létt á bak á nokkrum af þeim 70 íslensku hestum sem þar eru. Við gengum svo upp á hól þar rétt hjá þar sem mannvistarleyfar frá því á steinöld hafa fundist. Á hólum var fallegt útsýni og nokkrir virtust vera í húsbyggingarhug, það má alltaf bóka að Íslendingar sjái framkvæmdatækifæri þar sem þeir stoppa. Um hádegisbilið fengum við okkur bita og dreyptum á víni beint frá vínbónda í nágreninu. Vínið var hreinasta afbragð, við Eyrún keyptum eina flösku til að eiga á einhverjum góðum degi bráðum. Þegar við komum í bæinn settumst við unga liðið á pöbb og fengum okkur eina kollu áður en við héldum í Karokie - sem var ótrúlega hressandi hreint. Að loknu þessu löbbuðum við Eyrún heim, enda vorum við búin að fá okkur meira en fjögur rauðvínsglös og því ekki í standi til að keyra, og að auki eigum við ekki bíl.
-
Það er í það minnsta ein áhrif sem að hrakfarir Eyþórs gætu haft á aðra en Sjálfstæðismenn í Árborg, núna er hægt að fara á fullt skrið með herferð gegn ölvunarakstri. - Það er fyrir augum okkar dæmi um það hvernig er hægt að klúðra málunum með svoleiðis asnaskap, en þetta dæmi er lítilvægt vegna þess að enginn slasaðist eða lést. Hefur einhver labbað skakkt þegar hann hefur fengið sér örlítið of mikið í vinstri tánna? Flestir sem lesa bloggið mitt eru líklegir til þess, ásamt mér. Treystir einhvert ykkar ykkur til þess að keyra bíl á 50-100 km/hraða í því ástandi? Þetta er með því heimskulegasta sem fólk getur gert. - Svo við tölum nú ekki um mann sem er 10 dögum frá því að verða bæjarstjóri í örtstækkandi bæ, síðasta könnun sagði að Íhaldið hefði 51% þar. Úbbs.
-
Ég er bara búinn að fylgjast með þessu á netmiðlunum og sjá Kastljós viðtalið, þeir eru ekkert mikið að þjarma að honum. Enda kanski ekki ástæða til, atvikið dæmir sig og ökumanninn sjálft. Þetta veltir upp mörgum spurningum, t.d. hvort kjörnir fulltrúar eiga að vera "fullkomnir", eða hvort strangari reglur þurfi fyrir þá. Þegar við veljum okkur fólk í störf á vegum okkar, hversu mikils megum getum við ætlast til af þeim. - Fyrir og svo eftir kosningar. Er bæjarfulltrúi, bara fulltrúi bæjarins á meðan að hann er á fundi?
En annarrs þykja mér íslenskir fjölmiðlar vera ósköp ljúfir eitthvað undanfarið. Það vantar alltaf að þeir spyrji spurninganna sem að gætu komið einhverju af stað, opnað á eitthvað nýtt. Þeir taka allt of oft svörum viðmælandann sem sjálfsögðum hlut. - Vantar alltaf, en sorry, þetta meikar bara ekki sens hjá þér! (Svona fyrir utan DV, sem að spyrja líklega sjaldnast spurninga, bara skjóta)
-

Við keyptum hjól í dag og það meikar alveg sens fyrir mér!
Lalli

surlaw eht ma i

2006-05-11T09:01:00.000Z

Las það áðan að núna væri það fólk sem ákveður hvað það les og hvað það telur fréttnæmt en ekki ritstjórnir fjölmiðlanna, vegna þess að maður sækir þær fréttir sem maður vill lesa á netinu. Jú, auðvitað les maður ekki það sem maður hefur ekki áhuga á að lesa, en það hefur fólk alltaf gert. Núna eyðir maður meiri tíma í að athuga hvort vinir og kunningjar skrifi eitthvað sniðugt, en sjaldnast er það fréttnæmt, merkilegt eða þessháttar. Það sem helst hefur breyst er að núna les maður fréttirnar styttri og í copy/paste-stíl og oftar en ekki virðast þær eftir óreyndari eða "lélegri" blaðamenn, að minnsta kosti er á hverjum degi hægt að sjá fréttir sem eru með heimskulegum villum. Eins og að setja sama textann tvisvar inn eða svoleiðis, það myndi enginn maður skrifa svoleiðis. Ekki það að þetta trufli mig eitthvað mikið, núna les ég bara í staðinn, Fréttablaðið og Moggann og mbl.is, visi.is, ruv.is, diepresse.com. Svo að ég les sömu fréttina frá Reuters á sex mismunandi stöðum og á bæði þýsku og íslensku, ég bæti svo við enskum news.bbc.co.uk og globo.com.br ef ég er í stuði.
Hvernig væri að ég færi að skoða eitthvað annað á netinu, annars enda ég eins og hver? Tja ég veit það ekki ég þekki engan annan sem geri þetta...

annars fór ég í klippingu í gær.
lalli

ég skokkaði á vegg

2006-05-08T11:53:00.000Z

lausnin við gátunni sem enginn tók þátt í: Love street með The Doors - Undirtektirnar voru mjög litlar, í bæði skiptin commentaði enginn á færsluna, en þess má geta að þessi leikur var endurtekinn því enginn nennti að taka þátt í honum.
-I see you live on Love Street, there's a store where the creatures meet. I wonder what they do in there, summer sunday and a year. I guess I like it fine so far.

Ég skokkaði reyndar ekki á vegg, nema þá vegg lífsins sem umlykur alheiminn og stjórnar honum í brjáluðum dansi. En á skokk ferð minni hugsaði ég mikið um deyfð yfir miðbæ Akureyrar og lausn vandans.

Miðbær - duga gömlu skórnir hans Ronaldinho?
Stundum þá getur nýtt sjónarhorn hjálpað manni að skilja umhverfi sitt betur. Þegar ég fór í morgunskokkið mitt í Vínarborg í dag voru skipulagsmál á Akureyri mér ofarlega í huga. Sumum þykir það eflaust undarlegt, að ekkert meira spennandi hafi skotið upp í kollinum á ungu manni, en ég er nú einfaldlega bara þannig gerður. Ég hljóp af stað, beygði til vinstri og hljóp framhjá leikvelli, hönnuðum með þarfir barna og foreldra í huga, flottum leiktækjum og góðu skjóli og bekkjum svo að foreldrarnir geti lesið blaðið meðan börnin leika sér. Þegar ég hélt leið minni áfram tók ég eftir því að á húsunum voru nánast aldrei svalir, en á öllum neðstu hæðunum voru verslanir eða kaffihús. Svona hélt þetta áfram alla leiðina niður að stofnbraut sem liggur hringinn í kringum miðborg Vínar. Ég herti hlaupið til þess að ná grænakallinum, þegar yfir götuna var komið hljóp ég í hringi í öðrum garði, þessi er frægari og stendur fyrir framan ráðhús Vínar, fallega byggingu í Gothneskum stíl. Þar sat fólk og las, hópar skólabarna skoðuðu styttur af skáldum ljóða og tóna og menn byggðu svið fyrir sumarhátíð. Á þessu torgi stóð ég ásamt 120.000 öðrum jafnaðarmönnum að morgni 1.maí í fjölmennustu samkomu sem ég man til þess að hafa tekið þátt í. En ég var ekki í leiðangri til að frelsa heiminn núna, heldur hressa mig við. Eftir að hafa hlaupið milli styttna og blómabeða í dágóða stund var tími til þess að halda heim á leið. Önnur leið varð fyrir valinu og ég skokkaði áfram og þegar frá garðparadísinni var komið litu húsin alveg eins út og áður. Stórar blokkir, sem héldu áfram svo langt sem augað eygði, og allstaðar það sama, íbúðir án garða og verslanir. Þó svo að ég þekki aðrar borgir Evrópu ekki jafn vel og Vín, þá þykir mér líklegra en ekki að þær séu í svipuðum stíl. Þessi stíll er einmitt að sem heillar okkur smábæjar fólkið, við sjáum þetta í hyllingum og hugsum okkur að það yrði nú yndislegt að setja niður svona torg hjá okkur, nú eða sýki. En hvernig er þetta öðruvísi? Eins og ég tók eftir ná blokkirnar niður heilu göturnar, byggð á þeim tíma þegar aðeins þeir ríku gátu leyft sér að bæta við svölum og garðar voru eitthvað sem aðalsmenn leyfðu sér. Í seinni tíð hafa byggðirnar svo þróast út frá borgunum og í nýrri hverfi sem oftar en ekki svipar til okkar íslensku bæja. Afhverju ætti þá lausin á deyfð yfir miðbæjarlífi í íslenskum smábæ að vera að búa til hluta af því umhverfi sem gerir miðborgirnar svona heillandi? Ættum við að “feika” borgarstemmingu í smábænum okkar? Skoðum þetta frá örðu sjónarhorni. Ef að foreldrar þráðu ekkert heitar en sonur þeirra yrði heimsklassa fótboltamaður, sem hann væri þó ekki, myndi það breyta honum ef þau fjárfestu í gömlu skónum hans Ronaldinho? Nei, líklegast ekki því hina hlutina vantar. Það er ekki alltaf hægt að kaupa allt, menning er byggð á tilfinningu og því sem fyrir er. Ef að við setjum niður sýki í miðbæ Akureyrar og segjum að það eigi að vera í stíl við Ný Höfn í Köben, breytum við þá einhverju? En hver er þá lausnin á deyfð í miðbæ Akureyar? Fyrir mér er það nokkuð augljóst, við þurfum fólk en ekki fiska. Háskólagarðar eða svipaðar byggingar á Akureyarvelli myndu e.t.v. skila miklu, með fram því að hressa aðeins upp á miðbæinn. Svo myndi það líklegast ekki kosta Akureyarbæ 350 milljónir og íslenska ríkið 500? Og þeim gífurlegu fjármunum gæti verið varið á betri hátt, þjónustu við aldraða, skólamál og alla hina málaflokkana sem eiga ganga fyrir.

-
kanski að ég reyni að koma þessu á víðlestnari stað en þennan hér

lalli

there is this store...,...

2006-05-05T13:36:00.000Z

Jæja, er einhver þarna sem getur eitthvað í leiknum sem engu máli skiptir og öllum er sama um? Að þessu sinni, eins og reyndar alltaf áður er keppt um ekki neitt.
Botnið titilinn: there is this store...,...

Við Eyrún vorum að koma af reiðhjólauppboði, en þar voru engin fín hjól, bara skrítinir karlar að kaupa notaða gamla og ljóta gsm síma - bless
Lalli

alltaf eins

2006-05-04T21:34:00.000Z

Las það í dag að kvennréttinda félög á Íslandi væru að mótmæla vændi í þýskalandi, sem n.b. mun aukast á meðan HM er í sumar. Einhverjum körlum þótti þetta óþarfa hnýsni og undruðust að konurnar hefðu ekki setta þetta fram fyrr, en hvernær er betri tími en þegar augu heimsis beinast til Þýskalands. Eggerti Magnússyni þótti líka ömurlegt að fá ráðleggingar frá Kirkjunni sem hann sagði að ætti fyrst að líta í eigin barm. Hérna í Austurríki var um daginn skrípamynd af formanni SPÖ og formanni ÖVP, það er nú ekki frásagnarvert nema vegna þess að þeir voru einmitt báðir með fötur af skít á hausnum og bentu á hvorn annan.
Svo var á mbl.is sagt frá því hvernig Seðlabankinn liti á efnahagsmálin heima á Íslandi. Þar kom Davíð fram og lagði fram tillögur og bað ríkisstjórnina vinsamlegast að gera eitthvað. Einhver skítalykt af því líka. Að maðurinn sem stjórnaði Íslandi í rúman áratug og tók ákvarðanirnar sem leiddu til þessa ástands, standi núna illa lyktandi í öðru húsi og bað menn að moka úr skítabingnum sem hann skildi eftir sig.
Að lokum, Þorsteinn Gylfason skrifaði grein í Fréttablaðið þar sem hann gaf það í skyn að ráðning Davíðs í stöðu Seðlabankastjóra, hefði ekki einu sinni gengið í gegn í spiltustu Afríkuríkjum. Reyndar fannst mér eins og ég hafi áður lesið svipaða grein eftir hann, eins og einhverjir hafa líkast til lesið svipað blogg eftir mig.
--
friður,
lalli

120.000 manna útifundur!

2006-05-01T11:01:00.000Z

Þessi langa helgi er búin að vera dásamleg hjá okkur í Kupkagasse, við höfum farið í göngutúra í rigningu en annarrs höfum við verið heima og tekið því rólega, eldað góðan mat og horft á dvd. Á milli þessara ánægjustunda hefur Eyrún farið á kostum í vefsíðugerð og ég hef tjáð gremju mína varðandi 1.maí á Akureyri.
Ég vaknaði klukkan 08 í morun og heyrði strax í trumbluslætti inn um gluggan, svo ég bjóst við mannfjölda fyrir utan dyrnar mínar. En svo var nú ekki, ég missti greinilega af kröfugöngunni, enda vissi ég ekki af henni og gat því ekki mætt í hana. Ég gekk svo rösklega að ráðhúsinu í Vín og beið Jafnaðarmannanna, sem brátt komu í tugþúsundatali úr öllum áttum og af öllum stéttum. Skreittir fánum og kröfuspjöldum auk fjölda lúðrasveita og trommara. Þáttakendur í göngunni skiptu sér upp í fylkingar(félag járniðnaðarmanna sér, socialnemar osfrv.) og gengu þannig saman í hópum framhjá ræðupallinum þar sem kröfur þeirra voru lestnar upp. Undirlokin fluttu svo borgarstjórinn og formaður SPÖ ávörp. Þegar kröfugangan var búin var sólin farin að skína í Vín og fólk fór á "Rauða markaðinn" sem komið hafði verið upp hjá Burgtheater.

Eyrún var núna komin til mín og við fórum í aukakröfugöngu áleiðinni heim og hlýjuðum okkur svo með góðu kaffi í kotinu okkar.

Hoch 1.mai!
lalli

Alþjóðasöngur Verkalýðsins

Fram, þjáðir menn í þúsund löndum,
sem þekkið skortsins glímutök!
Nú bárur frelsis brotna á ströndum,
boða kúgun ragnarök.
Fúnar stoðir burtu vér brjótum!
Bræður! Fylkjum liði í dag -
Vér bárum fjötra en brátt nú hljótum
að byggja réttlátt þjóðfélag.
þó að framtíð sé falin,
grípum geirinn í hönd,
því Internationalinn
mun tengja strönd við strönd

Á hæðum vér ei finnum frelsi,
hjá furstum eða goðaþjóð;
nei, sameinaðir sundrum helsi
og sigrum, því ei skortir móð.
Alls hins stolna aftur vér krefjumst,
ánauð þolir hugur vor trautt,
og sjálfir brátt vér handa hefjumst
og hömrum meðan járn er rautt
þó að framtíð sé falin o.s.frv.

Vér erum lagabrögðum beittir
og byrðar vorar þyngdar meir,
en auðmenn ganga gulli skreyttir
og góssi saman raka þeir.
Nú er tími til dirfsku og dáða.
Vér dugum, - þiggjum ekki af náð,
Látum bræður því réttlætið ráða,
svo ríkislög vor verði skráð.
þó að framtíð sé falin o.s.frv.

Höf.: Eugén Pottier
Þýðing Sveinbjörn Sigurjónsson

there is a store where the... ,...

2006-04-29T23:10:00.000Z

Ef einhver las síðasta blogg, þá þótti það einhverjum líklegast "halló", en svona er það bara. Sama þó að fólk vilji ekki mæta á útifund, íþróttaviðburði, listasýningu eða hvaða w.t.f.-hlut sem er, þá er það ömurlegt að þeir sem eiga að skipuleggja viðburðinn leggji árar í bát: Ekki hefur Glímusamband Íslands hætt störfum þrátt fyrir að enginn sýni því áhuga. Heimurinn er bara svona núna, kaldur og harður, með sprengjuregni og fátækt en við þurfum samt sem ekki að taka því þegjandi og hljóðalaust. Hvar eru t.d. allir þeir sem kveða um vandamál heimsins í rokk og rapptextum þegar kemur svo að því að taka á hlutunum, vandamál heimsins verða ekki leyst yfir kollu af bjór, þó það sé ljúft að ræða þau yfir slíkri. Hvar eru svo líka kynslóðin sem ól upp mína kynslóð? Ættu þau ekki að láta sjá sig...
Nei, ef til vill ekki, en það er nú bara svona, blessað frelsið..
--
En til að létta aðeins andrúmsloftið á blogginu þá ætla ég að skella inn öðrum leik, sem engu máli skiptir og veitir enginn fríðindi (hvorki hjá Iceland Express né Iceland Air). Það eina sem leikurinn á að veita er ánægja, sem að sjálfsögðu skortir í heiminum...
Enn og aftur er spurt botnið Titlinn á blogginu. (svo væri hljómsveitar og lags nafn vel þegið)
there is a store where the... , ...

ykkar óvenju-harðorði bloggari
Lalli

28. apríl, í tilefni af 1.maí

2006-04-28T11:04:00.000Z

1. maí kröfugöngur á Íslandi eru um það bil að deyja. Til dæmis verður engin kröfuganga á Akureyri á mánudaginn næsta, þess í stað er bara skemmtidagskrá og kökuhlaðborð. Stjórnarmenn í alþýðusamböndunum segja að kröfugangan sé barn síns tíma, og það sé ekki áhugi fyrir hendi að taka þátt í kröfugöngum, né öðrum baráttuaðgerðum. Það að ekki sé áhugi fyrir hendi er í sjálfu sér ekki óeðlilegt á Íslandi, landi þar sem meira en nóg virðist vera af öllu en hugmyndin á bak við félagshyggju og samstöðu verkamanna er að gruninum til ekki bundin við einstök bæjarfélög og þegar að við höfum náð ákveðnum árangri þá á það ekki að þýða að baráttunni sé lokið. - Öreigar allra landa sameinist - Ekki það að alþýðusamböndin eigi að marsera taktfast á eftir marxískum hugsjónum, þá er ömurlegt að þeir leggi árar í bát og hætti við kröfugöngu. Kanski sýnir þetta öðrufremur að þeir sem eru í fremstu línu til að berjast fyrir réttindum launafólks, séu ekki með hugsjónir og réttlætið að leiðarljósi. Til dæmis eru lög að ganga í gildi sem opna íslenskan vinnumarkað fyrir vinnuafli frá nýju ESB-löndunum. Í landinu eru starfandi leigumiðlanir sem að borga verkamönnum lægri laun en samið hefur verið um, þetta er til dæmis hluti af þessu alþjóðlegasamhengi sem ég minnist á.
Rjómartertuát er ágætt, en ekki leiðin til þess að halda á lofti hugsjónum félagshyggju og réttlætis í heiminum! Það er ekkert mál að sameina baráttu og gleði í eina hátíð, en það verður þá að gera það almennilega, og ekki hætta baráttunni þegar okkur líður vel. Það minnsta sem hægt væri að gera er að heiðra minningu þeirra sem að ferðuðust um landið þvert og endilangt til að taka á gráðugum kapitailistum. Það er nefninlega ekki langt síðan og réttindi komu ekki til okkar að sjálfu sér. Ekki bara rétturinn til að fá veikindafrí.. ect. ect. ect. Nánast allt sem við sjáum fyrirframan okkur í dag eru hlutir þurfti að berjast fyrir = frelsi til að vera þú sjálfur.

Ég hugsa að ég rölti niður á Ráðhústorg í Vínarborg og taka þá í útifundi sem að verður haldinn kl:09 þann 1.maí.

Lalli

fagurt galaði fuglinn sá

2006-04-26T14:21:00.000Z

Ég er búinn að fara í tvo fyrirlestra í skólanum, ég hef skilið þá og glósað slatta, en ég er ekki alveg kominn á það stig að geta velt þessu fyrir mér á staðnum: fundið svör og spurt spurningar, en það kemur.
Í gær horfði ég á Lord of War, mynd um vopnasala sem var leikinn af Nicolas Cage. Fyrir myndina var auglýsing frá AI þar sem AK-47 hríðskotabyssa var seld í sjónvarpsmarkaði og auglýst "svo einföld að jafnvel barnahermenn geta notað hana". Myndin var í svipuðum tóni, kaldhæðnum og beittum, ég hvetþig hér með til þess að kíkja á hana. Í endann (ég er ekki að gefa upp neitt plott...) var bent á það að fimm lönd sem eiga fastsæti í Öryggisráði S.Þ. séu stærrstu vopnasalar heims.En svo eru auðvitað G8- löndin eru öll í þessu.

Heimsósóma fífla asni!

Friður,
lalli

fáfræði fagurgala

2006-04-23T11:20:00.000Z

Ég get byrjað í skólanum fyrir alvöru í vikunni, eftir því sem ég sé best á netinu er reyndar ekki tími á morgun, sá fyrsti ætti að vera á þriðjudaginn. Markmiðið fyrir þessa önn er að verða enn betri í þýsku, læra á kerfið í skólanum og standa mig í þeim tímum sem ég kemst í. Ég ætla að sjá til hvernig þeir eru áður en ég kem með lýsi því yfir að ég nái eða falli.

Undanfarna viku hefur verið umfjöllum um Kína í "Die Presse" sem ég fæ ókeypis sent heim til mín daglega. Tækifæri og hættur er þessi umfjöllun kölluð, stundum finnst mér eins og vesturlandabúar sjái tækifærið sem sitt tækifæri til að græða en ekki tækifæri íbúa Kína til þess að lifa betra lífi. Landið er ógnarstórt og íbúarnir komnir vel yfir milljarð og ennþá lifir yfir helmingurinn af landinu. Mætti túlka það svo að iðnbyltingin er ókomin til Kína? Nei það væri ekki rétt enda eru borgirnar þar stórar og framleiðsan mikil, en hún er ennþá á leiðinn til mikils hluta íbúanna. Og aðstæður á vinnumarkaðnum eru villandi, vinnulöggjöfin er öflug og eftir vestrænni fyrirmynd en það er ekki alltaf farið eftir henni. Ef að allir þessir íbúar myndu móta sér sama neyslulífstíl og við á vesturlöndum myndu auðlindir heimsins vera klárast á skömmum tíma. Kanski er best að þakka fyrir að þeir gera það ekki. Eða hvað? Ef þessi "ógn" væri ekki til staðar, já "ógn" því afhverju ætti velmegnun milljarðs manna að ógna okkur? Jú því hún gæti dregið úr okkar. Ef þessi ógn væri ekki til staðar þá værum við ekki að hugsa okkar gang. Það sem verst er að ráðamenn einbeita sér frekar að því að berjast um síðustu olíuna heldur en að leggja peningi í rannsóknir. Hvað ætli stríðin undanfarin ár hafi kostað mikla olíu?

Ég verð samt sem áður líka algjörlega stíflaður í hausum á því að hugsa um þetta, hvað veit ég um Kína og heiminn? Kanski meira en margir og minna en sumir. En almennt þá er maður skammarlega fáfróður um heiminn og þá sem hann byggja.
Svo ég ætla í bili að hætta að skrifa og lesa þess í stað.
kveðja úr Kupkagasse,
Lalli

0987654321°

2006-04-22T14:34:00.000Z

Ætli kreppa sé á næsta leiti? Krónan stefnir upp upp og upp á fjall og olíuverð líka. Íranar virðast ætla að koma sér upp atómbombu og þá eiga nú allir eftir að verða spinnegal. Svo las ég það um daginn að Brasilíu menn séu með svipaða stefnu í kjarnorkumálum, það er auðga meira úran og svo gætu þeir átt nóg í sprengju. En það er augljóslega munur á utanríkisstefnum landanna, Brassar eru óneitanlega betur liðnir en Íranar, svo þeirra sprengja er ekki jafn stórt mál fyrir stóru strákana/freku strákana.
-
Það er sólarsömbu veður í dag og hefur verið undanfarna daga.
samba-lalli

afsakaðu

2006-04-12T19:56:00.000Z

Við Eyrún komum heim frá Essen í dag, við skelltum okkur í ferð yfir helgina, í upphafi páskafrísins. Við fórum að sjálfsögðu með lest, á leiðinni til Þýskalands fengum við tveggja manna klefa þar sem morgunmaturinn okkar var borinn inn í klefann og annað fínerí. Við keyptum okkur nú bara svoleiðis miða því aðrir svefnklefamiðar voru ekki í boði. Á Laugardeginum var Dóri að keppa, við Eyrún fórum með Hönnu og krökkunum á leikinn og hrópuðum áfram Tusem. Honum lauk að sjálfsögðu eins og þeirra var von og vísa, með sigri, þeim 28. í röð og því eru Essen komnir upp um deild eins og reyndar ljóst var fyrir löngu. Leikurinn endaði 27-34 Essen í vil, og reyndar voru þeir komnir í 10 marka mun á tímabili, en þá fengu óreyndari menn að spreyta sig í leiknum. Eftir leikinn fórum við fullorðna fólkið svo út á lífið með liðinu og skemmtum okkur vel. Liðsfélagar Dóra eru flestir hressir, Helmuts markmaður sagði mest megnis "danke" og ruglaði svo í fólki, á meðan að Hvít-Rússinn Igor sagði mér frá stjórnmálaástandinu í heima landinu sínu. Við tókum svo aftur lestina til baka, en fengum okkur bara pláss í 6 manna klefa, enda er annað bruðl og vitleysa.
--
Eftir tvo tíma fáum við svo heimsókn, en mamma og pabbi Eyrúnar ásamt systrum hennar eru á leiðinni frá Bratislava. Páskarnir verða því íslenskir í Kupkagasse og við fáum ef til vill íslenskt lambalæri og ef við verðum heppin súkkulaði... En alveg pottþétt góða gesti sem njóta páskanna með okkur.
--
Þýskaland er um það bil að missa sig í heimsmeistaramóts brjálæði, auðvitað eru þeir með duglegir við að ná í auglýsingasamninga og reyna að selja sem mest tengt mótinu. En þegar ég sá "baðlínu" (sápur, handklæði, bursta og ilmkerti) í fótboltamynstri og þýskum fánalitum var mér öllum lokið. Svo ég settist dapur niður undir næsta tré og grét....
--
Ef til vill á eftir að vera lítið um færslur yfir þessa páska, ég vona nú samt að ég verðir ekki svo uppáþengjandi gestgjafi að ég gefi gestunum ekki frí frá mér í minnsta kosti 10 mínútur til að pikka inn á veraldarvefin skilaboð til páskahéra..

Hinn fornfrægi spurninga- og skemmtileikur sem skiptir engu máli er hér með tekinn upp aftur á síðunni.
Botnið titilinn á þessari bloggfærslu rétt: Afsakaðu...

Lalli í Vínarborg